［世事無絶對，只有真情趣］相當counter intuitive，「因為」疫情，「所以」暫停裁員？唔係因為疫情，所以先要炒人？至少好多其他行業係咁。今次唔止匯控，好多間歐美銀行都係咁。搞乜？
1. 係咪因為有良心？你話呢？做過做緊匯豐嘅可以講幾句。但肯定嘅係，唔止佢地係咁，歐美絶大多數銀行都係咁，「因為」疫情，「所以」唔炒人。咩邏輯？
2. 你諗下，十年前多啲，金融海嘯，金融界炒咗幾多人。雷曼之類直頭成間消失咗，全部人香晒。打後咁多年，金融業，好景時照炒人，唔好景時炒得更多。埃汾亦係2012年先被炒，點講都唔係特別差嘅一年。另外，舊年咪有「德意志銀行大屠殺」（https://bit.ly/3bzfjsP）。根本過去十幾年成個金融業都單嘥時緊，中資除外（＊）。
3. 咁，去到今次，出面啲行業，飲食呀酒店呀航空呀手起刀落，美國一個星期三百幾萬人去首次申領失業救濟。點解金融業反而齊齊唔炒人？良心發現？點諗都唔明喎。
4. 故事就要睇遠啲啦。其實最先係歐洲（包埋英國）嘅銀行普遍話唔炒人，之後先到美資跟機
5. 花旗講到明唔會炒人住（當然冇講實限期，但你懂的，短期咪即係呢一兩個月唔會），摩根士丹利，出名殘酷嘅大摩，居然講到明今年唔炒人，CEO出埋memo，好似前所未見。要知道投行嘅嘢，三更窮五更富，最好景時都成日炒人（不過人地炒嗰時拎舊錢係你搵十年甚至成世都搵唔到）。大摩講明今年唔少人，世界變。
6. 歐洲嗰邊呢，就再早少少。其實一早講明要「精簡架構」，匯控之前講明炒35000人，而家反而叫停。德意志同萊斯Lloyds都係一早講咗，而家要停。其他瑞信呀，德國商業銀行呀，法興SocGen等等都話一係唔炒，炒都至少減慢
7. 搞乜鬼？
8. 官方嘅講法，就梗係話而家咁環境，唔想同事更加慘上加慘。哈哈，當我第一日出嚟行，你好景時炒我我就唔慘呀可？（＊＊）
9. 冇事冇幹，因為疫情炒人，好多行業都有，不足為奇。而家銀行仲要係剛好相反，原本話炒而家唔炒，好可疑
10. 原因？就梗係，政治啦
11. 正係銀行大鑊，先至唔炒得人。小鑊都仲可以炒人，大鑊反而唔炒得人！原理同嗰句，你爭銀行一百萬，你就大檸樂。你爭銀行一百億，就到佢大檸樂。
12. 係咪好玄妙？再講白啲
13. 講到尾，首先係形象工程，講到好似銀行洗底，而家幫大家幫社會幫國家咁，繼續借錢出街。但更重要，都係政治。
14. 開估：銀行要政府救，就不能炒人咯。
15. 你話，唔係喎，雷曼嗰時，政府又救，銀行都係咁炒人喎，仲要啲高層自肥，加人工出花紅。
16. 正係當年遺留落嚟嘅問題。可能外國人冇咁善忘，或者真係民主真好。但上次救完雷曼等等，大家發現啲高層冇受罰仲出大舊花紅，低層就畀人炒，仲要乜都貴晒，明明一心想睇華爾街肥貓仆街，點知富者越富。你話有幾憤怒？近年啲種種社會不隱（你見民主政體一樣有），唔多唔少都關呢樣事，甚至侵侵上台，英國脫歐，民粹政治大行其道，都係上次危機嘅惡果。近來兩篇文都有寫過（https://bit.ly/39nnM0F）（https://bit.ly/2JiYq9z）．印銀紙咩人最受惠？當然係有產階級。
17. 亦都所以，未到銀行出問題前，大家知啲航空公司呀，或者波音呀之類，危危乎了，一定要國家打救。但真係fool me twice shame on me，今次啲議員學精晒，講到尾一定要一堆條件。高層限人工限花紅，唔準炒人，亦唔畀回購股份。有啲仲要求唔畀炒人 — 成個世界好似忽然幾左。但世事無絶對，都係嗰句，QE嘅副產品，畀人呃咗十幾年仲呃多次？
18. 都唔記得講，親，美國嘅航空公司，過去十年，用咗96%嘅現金流去回購股票谷高股價（https://bloom.bg/2wH0Uff）。除咗大股東有so，當然高層都有so-畢竟佢地有大量認股權證（option），或者出花紅係出股票。
19. 而家，Airline 就話，冇錢呀，洗晒啦，甚至係借錢發債回購股票（息咁低，唔借就笨）。而家就話冇晒錢，拎納稅人嘅錢打救。你話會點？
20. 傳統企業管治講principal agency，講alignment of interest，如何保證CEO（打工仔一個）同股東嘅利益同一陣線。有乜規則就有乜玩法，你出option出股票，我咪谷高個股價咯 —但直到要伸手，咁政府而家嘅玩法呢，救可以救，但最先係等間公司唔使破產，還到錢畀銀行同十派牙，然後就保住啲員工（唏，今年美國大選添喎，冇話你知？）。之後？仲要保證啲股東受下苦，等你好景時使錢谷股價咁過癮丫拿
21. 相信亦都係因為咁，波音都仲係唔想畀政府入股。頂得幾耐得幾耐，畀政府入股，高層啲人工凍過水。
22. 咁而家銀行情況一樣，未咁快去到要政府入股，但，之前又要放寬啲資本要求呀，又或者要政府擔保啲中小企貸款呀咁，都係有代價的。一路拎政府著數一路炒人，政府就唔放過你咯，因為選票。
23. 我地順手可以睇下另一種玩法。冇民主選舉（或者話，唔使選舉）嘅中國，就唔同，係搵銀行去補貼企業。具體做法可能唔畀你收咁高息啦，或者畀人拖數啦，甚至重組啲貸款咁。咁冇問題丫，左袋右袋啫，啲兄弟水深火熱，銀行仲賺咁多錢，於理不合。但銀行都要維持住一定盈利喎，點搞？實務上係用利息政策，大陸仲係好大程度由政府定，咁就減存款息 —即係咩人埋單？存戶咯。固然有啲都係企業（特別係保險公司），但更多係普通散戶。see？冇免費午餐，總有啲人埋單，不過係咩人就真係好多玩法。
（＊）但中資似乎都只限於non bank．銀行員工都係一路減，不過大陸銀行國情獨特，之前極之臃腫，養得太多人。
（＊＊）不過其實係真的，唔止講話好景時易搵工。金融從業員有一個好大嘅先天問題，就係你份工同個投資環境係正相關嘅。咁會點？即係啲股票呀樓呀最貴時，你就加人工出花紅，然後去摸頂。到啲股票呀樓呀跌到好抵買時，你就失業，甚至要低位打靶開飯。古語有云 the poorer you are , the more frequent that you see ghost就係咁解。
the ghost玩法 在 想听爽玩尖叫的慫樣這影片絕對大放送! | The Ghost - YouTube 的美食出口停車場
【恐怖生存遊戲】EP1 只要躲10分鐘就贏? 問題是鬼會穿牆!!! | 想听爽玩尖叫的慫樣這影片絕對大放送! | The Ghost | 爽玩频道You were getting your ... ... <看更多>