【PO09】
翻開 機械人渣主人 的虛構夜誌
我都唔記得係由幾時開始，啲人叫我身邊呢個我引以為傲嘅機械人PO09做機械人渣。
由細到大，大家都話我係天才，尤其係科學範疇，喺學校我永遠都攞第一。我細細個就立志做發明家，18歲嗰年我成功發明左我人生第一個機械人，亦都係跟到我而家嘅呢隻機械人，我嘅助手、我嘅保鑣、我嘅朋友- PO09。當然佢係有不停咁進步啦，佢開頭唔係好似人類，無論係外型上定係行為上都好明顯係機械人，但係我發明嘅人工智能裝置，最出色嘅就係佢嘅學習能力。佢可以透過觀察人類嘅行為同埋接收我嘅命令，分析人類嘅心理狀況同埋行為習慣，繼而得出佢自己計算出嚟嘅行動指令。
一開頭佢同一般嘅居家機械人冇乜分別，甚至係同嗰啲放喺地下吸塵機機械人都一樣，只係識啲基本嘅指令，行左行右行前行後。之後慢慢佢識痞低起身，手指都開始靈活，識得幫我拎嘢，之後識得主動幫我拎嘢。後來佢可以自己出去幫我買餸煮飯，再後來更加識得審判美醜幫我買裝飾品同衫褲。PO09只係用咗幾年，就學到咁多嘢，生活上方便咗我我當然開心，但係我最開心係呢個科學上嘅成就，技術上嘅突破。
直至到有一次，我叫佢出去幫我買嘢，當時佢嘅形象都仲未太似人類，仍然係有種鐵皮人嘅感覺。佢自己一個經過啲品流品流比較複複雜嘅地區，比啲社團人士搞。
佢哋㩒佢佢落地下打下踢踢下，又拎走佢一啲零件。好彩，因為嗰班人冇乜科學嘅頭腦，無無搞到PO09嘅核心裝置，佢仲識得自己起身行返屋企。果次之後，我要令佢學識保護自己，所以我將佢改裝又重組，令佢可以使用少少武力，例如係受到襲擊嘅時候識得擋、識得跑走、必要嘅時候識得揮拳。佢學識左呢啲技巧之後，一切變得更加暢順，我唔使擔驚受怕之外，有時我睇返佢身體入邊嘅影像記錄，佢甚至識得幫人；觀察到身邊嘅人遇到意外佢會出手相助，什至有一次有兩架車相撞，司機打交，佢識走出去分隔兩個司機。呢一切舉動都令到我非常驕傲。
後來佢慢慢變得比較似人，當然啦，無論係外表定行為都唔可以100%同普通人一樣，但係至少擦身而過未必睇得出。變得似人之後我會同佢一齊行出街，好似朋友一樣去買下野，食吓飯，佢都比到啲基本對答我，令我唔洗成日自己一個咁悶。
仲記得嗰日出街，喺旺角，好多好多人喺前面，唔記得點解我嗰日心情好差，差到想四圍發脾氣。前面啲人頂住晒我覺得好煩，要是我叫PO09推開嗰啲人。佢當然有照做啦，仲好大力推跌晒啲人。我冇諗過呢一個舉動會令到佢有啲改變。呢一次，係佢第一次接受命令要主動攻擊人。而家諗返，或者嗰一次就係契機，成就我今時今日咁嘅權力同地位嘅契機。
自從個一次喺旺角之後，PO09逢親同我出街都會推開啲人。有人會嘗試推返佢，但係穩重如山嘅佢會令到嗰啲人反彈跌落地。我幾滿意佢嘅做法，幫我開晒路，出街暢通無阻。後來我搭車，佢就開始推開啲車，有人鬧我，佢就出拳打人。你可以當我有啲病態，但係我享受呢種感覺。正常人令到其他人受傷害可能會覺得內疚，內疚嘅其中一個原因係因為驚自己會承受乜嘢惡果；但係我唔會，因為PO09會幫我承受一切惡果。我哋開始出名，媒體開始影我哋，吖，好似就係呢個時候開始。有人叫佢做機械人渣，就係由媒體開始。
當然有市民開始想擊倒我哋，但係PO09都一路進化，成日大大力推開啲市民還擊。咁我點呢？你認為我會阻止佢？我當然冇。有佢喺度，我喺呢個世界一蚊都唔使用，便利店嘅飲品我隨手拎黎飲，見到睇唔順眼嘅人就推開，因為有力量無限大嘅PO09喺我前面。我做乜都得，冇人奈得我何，冇人可以批評我、質疑我嘅決定。
到近排，我開始發覺PO09唔聽我嘅指令。對於唔影響我哋生活嘅人，佢都開始攻擊同虐待無辜嘅人，仲開始用自己體內嘅零件自己轉移同製作一啲新嘅武器 - 佢開始識噴有毒嘅煙、有毒嘅水，見人就噴見人就打。我覺得情況有啲失控，但係佢未打到我，又好似冇乜必要阻止，始終佢幫我趕走阻住我嘅人，我就好似稱皇稱帝咁。比起覺得佢唔聽我嘅命令，我更加覺得佢係主動幫緊我過更加開心嘅生活。
直至到今朝。我發現，我打唔開我而家身處嘅呢間房嘅門。
我嘗試望一望屋企嘅閉路電視裝置。我居然見到，係PO09將我鎖住咗。我喺房搵咗一個錘仔，打爛個鎖行出去，點知PO09一下就將我推返入房，捉實我，然後用鎖鏈鎖住左我隻腳同張床。於是我而家只可以趴喺度，一路用呢雙手一路打呢篇日記 - 但係究竟出面俾佢破壞成點呢？似乎都已經唔係我控制範圍之內。如果你係街上面見PO09，唯有勸你一句小心啦。
#失眠藥
#翻開虛構夜誌
