Search
歡迎收聽今回 Ming’s Radio，主持係 per se 的 Sandy，同大家分享填詞人 奧仕卡 寫嘅《#翻開虛構夜誌》裡面嘅《復仇的村民》。
戴起你的耳機，讓 storyteller 帶你穿梭書海，在星期一的夜晚好好享受這個 me time，其實 Monday is not Blue。
你有喜歡的故事想交給誰閱讀嗎？請留言告訴我們！
#MINGS #MINGSRadio #Sandy #Perse #粉碎糖果屋 #翻開虛構夜誌 #復仇的村民
___________
FOLLOW US NOW
➜ WEBSITE www.mings.hk
➜ INSTAGRAM www.instagram.com/mings.hk
➜ YOUTUBE www.youtube.com/mpwmings
➜ MEWE https://mewe.com/p/mings
➜ eBOOK https://ebook.mpweekly.com/bookshelf?active=mings
【#翻開虛構夜誌】
//自動hashtag filter用家//
其實真係好得意咩？
呢個世界上嘅人係有幾唔鍾意真實嘅自己，先至會覺得呢啲咁嘅無謂野真係好得意？
唉，但係得唔得意都係見仁見智，最慘係搞到啲人冇晒自知之明，醜樣嘅人又覺得自己靚，老嘅人又覺得自己後生，喺網上嘅世界真係已經分辨唔到乜嘢先係真實。
可能係我憤世嫉俗，乜嘢都睇唔順眼，用咗智能電話咁多年，社交媒體都玩左咁多年，我真好接受唔到filter呢樣嘢。用個filter嚟呃自己，有咩意義？我真係諗極都唔明。
我有個10零歲嘅姪女，就係沉迷玩filter嘅年輕人，冇錯就係嗰啲都以為自己好特別，其實一個招牌跌落扑暈一百個嘅普普通通年輕人。只不過，我都當佢係自己個妹㗎啦，由細睇住佢大亦都由細就到佢大。
嗰日家庭聚會，一家大細男女老幼坐晒喺度，佢係咁話要同大家影相，唔係影一般嘅相，係用filter影相，仲揸住咗部電話，話要教我用呢啲filter喎，又要變下做狗仔又要變下做貓仔又要變返做兔仔，之後又無啦啦變紅色藍色黃色紫色、之後又無啦啦生多幾個頭出嚟、又無啦啦我個頭喺洗衣機度轉來轉去，有一個仲過分，搞到我成身着火添。
我就梗係冇佢咁好氣啦，應酬佢影咗幾張相就算數。佢當然唔放過我啦，仲拎咗我部電話裝咗個唔知乜鬼嘢filter app，叫我返屋企試吓玩，依家最興㗎喎，我話得啦得啦得啦就打發咗佢去同其他親戚玩。
嗰晚我返到屋企沖完個涼行入房，就準備熄燈早啲瞓覺，因為我聽日準備返新工啦。點知突然之間部電話就響，有個notification。
「你下載的新app《reality tag》正在等你使用！主人，快來試試看！」
我梗係唔理啦，我㩒熄個mon，震機模式，瞓返落床。10秒之後，個電話再響。
「《reality tag》正在等你使用！主人，來玩你不會後悔！」
明明校咗靜音，究竟係邊個國家設計嘅程式可以咁樣校咗靜音都有聲出咁高科技呢？都是我較好鬧鐘，直頭熄埋機瞓。
10秒之後佢再響。
「《reality tag》已經準備好給你使用！主人，你會喜歡我的！」
我開始覺得奇怪，亦都察覺到面前得兩個選擇。一係就刪除咗呢隻app，一係就打開佢睇吓有乜嘢咁特別。唔知點解嗰一刻，我覺得就算我delete咗佢，佢都一樣會出返嚟。於是神推鬼擁，我就真係開着個螢光幕，嘗試咁着個app。
一打開，介面嘅操作非常簡單，就好似開着相機app，係一個準備影相嘅狀態。畫面上面有少少文字。
「請對準自己以外任何人的樣子，以進行 reality tag 的偵測。」
呢一隻app第一個奇怪嘅地方就係佢冇得前後鏡頭對換。佢只可以用嚟影其他人⋯ 又會咁古怪嘅⋯ 但係今晚我屋企冇人，於是我嘗試打開電腦，是但搵張相嚟試吓。我就去咗我個姪女嘅Facebook嘅profile picture，用個app影咗佢一張相。
#單純 #交際力強 #活潑
喺姪女嘅面上面出現咗呢三個詞語。係非常適合佢嘅性格嘅三個詞語。只不過呢三個詞語其實都好大眾，普遍嘅人至少有一半都可以用呢啲性格你形容，於是我不以為意，又試吓另一張相，碌一祿facebook, 見到我舊同學Peter post咗一單新聞，咁今次就試吓我舊同學Peter啦。
#內向 #奇怪 #孤僻
就係Peter引起我對呢個app嘅興趣。呢三個形容詞簡直非常準確咁講到Peter嘅性格。當年喺班裏面佢簡直係隱形人，仲會對住舊擦膠自言自語，的確係內向奇怪加孤僻。
我再試埋我老竇。
#霸道 #豪邁 #大方
呢三個形容詞，都一樣，平時都好似已經刻在我老竇額頭咁樣，今次仲真係喺佢塊面上面有呢幾個字。
我開始對呢隻App好好奇，因為佢所選擇嘅詞語都唔係啲普遍地可以形容所有人嘅詞語，唔係嗰啲係人都覺得準嘅心理測驗或者星座推測。於是我就WhatsApp 姪女，問吓佢究竟呢一隻係咩app。點知佢覆我居然話俾我知，佢幫我download個隻app叫做 cool filter，只係將啲人影到好似動物咁嘅 filter app。咁即係話一係就係佢download錯咗，一係就係呢隻無啦啦出現咗係我個電話。
嗰晚我有啲眼瞓好快就瞓咗，第二日我就早啲起身返新工。我對呢隻app嘅好奇心仍然旺盛。搭緊巴士返新公司嘅時候，我就嘗試打開隻app對住車上面嘅所有人。鏡頭入面嘅人，面上面都有三個詞語。我一路喺度研究，突然之間㗎巴士急煞左一下，大家都向前跌咗一跌。有一個好暴躁嘅大叔大大聲鬧個司機點揸車，個司機就不停咁講對唔住。我拎起部電話用filter scan呢兩個人。
大叔嘅 hashtag 係
#狂妄 #暴躁 #愚昧
司機嘅 hashtag 係
#懦弱 #細心 #善良
果然，冇出乎我意料，呢隻app好準確咁形容左呢兩個人嘅性格。我繼續沿路進行左啲測試，確定呢隻app應該真係好準確，心裏面就萌生左一個念頭 - 啱啦，返新工嚟講，呢隻app最好用。我可以首先鑒定一班新同事究竟係點嘅人，先至決定同邊個熟絡同邊個生疏。
我返到公司，admin同事帶咗我去我個位，我靜靜地填左一啲表格，處理下手頭新入職嘅事務，就到lunch time。估唔到用呢個app嘅時間就嚟啦。我個部門計埋我有三個同事，有一個上司mary叫我出去食lunch，另一個上司jenny就話要留喺公司食外賣。得佢兩個都唔一齊食，好明顯兩個人就唔啱。我究竟應該陪mary出去，定陪jenny呢？於是我就偷偷地用隻filter影低佢哋。
Mary: #自私 #挑剔 #貪心
Jenny: #幽默 #受歡迎 #有禮
喺咁嘅情況之下，有邊個會唔揀jenny呢？
於是嗰日我就留咗喺公司陪Jenny食外賣，之後亦都開始同jenny越來越熟絡，日日一齊食飯，傾好多計，做咗幾唔錯嘅朋友，而冇乜同Mary交流。
幾個禮拜過去，日子都非常暢順，直至到嗰日，我無啦啦收到解僱信。大老細同我講，上司話我工作散漫、態度無禮，所以過唔到試用期。我嗰一刻心諗，一定係Mary呢個自私、挑剔又貪心嘅女人見到我同Jenny感情好，覺得我唔屬於佢嘅黨派所以就將我踢走。
但係⋯⋯ jenny點解唔將我保住呢？照計都應該可以幫我講一句半句好說話吖⋯我有啲嬲，其實嗰刻可以話係好嬲，於是我就問老細。你點可以淨係聽Mary嘅片面之詞㗎？你唔問下jenny我嘅工作表現係點？
老細聽完之後笑咗笑，同我講，就係Jenny話要炒我。
我好嬲好傷心，覺得自己比好朋友出賣。呢幾個月以來我之後一路用嗰個filter，佢從來都冇出錯。我再用個filter影多一次Mary同Jenny,
Mary: #自私 #挑剔 #貪心
Jenny: #幽默 #受歡迎 #有禮
啲文字依然係冇變化。炒我嘅呢一日jenny冇返工，我係咁打電話俾佢佢都唔聽。臨到收工嘅時刻，出乎我意料地，Mary居然邀請我食一餐farewell晚餐。
嗰一晚我哋坐咗喺公司樓下嘅茶餐廳。我問佢，Mary姐，其實Jenny係個點樣嘅人?
「佢個人？都幾好笑㗎，成日開開心心咁，又好有禮貌，好多同事都好鍾意佢。但係我同佢夾開做嘢就知啦。佢為咗上位好多時候都可以不擇手段。今次佢咁樣玩你，好明顯係覺得你做到嘢，驚你要脅到佢嘅地位啦。」
我都冇諗過Mary講嘢會咁直接。我唔可以話比Mary知我有隻可以睇穿人性格嘅filter app, 所以既然Jenny不仁我都不義，我同Mary咁講：「下，但係jenny話你個人又 自私又挑剔又貪心，我仲以為⋯⋯你先至係炒我嗰個添。」
「哈。我哋做品質管理㗎，如果唔挑剔，咪好似Jenny咁囉，做嘢求求期期淨係靠受歡迎攀附關係上位。自私？貪心？呢個世界個個都係㗎啦，但係我就覺得自私得來、貪心得來，做人都要有原則有良心嘅，咁所以我覺得佢咁講我冇錯㗎，只不過我唔會做啲傷害人嘅事囉。」
Mary講完呢番說話之後我對佢另眼相看。然後我開始諗起嗰個app。好似自從有呢隻app出現之後，我冇再認真咁樣嘗試過了解身邊嘅人。我只係用一個一個hashtag去標籤佢哋，用三個形容詞就決定咗佢哋係我生命中嘅重要性。嗰一刻，我拎咗個電話出嚟，delete咗隻app。
我始終都係好憎玩filter。之後我同Mary食呢餐飯傾得好開心，仲有繼續約出嚟食飯。
而今晚，我就係想特登寫呢篇日記佢紀念呢一日。因為我同Mary正式開始拍拖啦。係呀冇錯。係嗰個 #自私 #挑剔 #貪心 嘅 mary，同時都 #有趣 #可愛 #堅強 #勇敢 #中直 ⋯⋯⋯ 一個人，一個立體嘅人，就係應該有千千萬萬個hashtag先啱㗎嘛。
【#翻開虛構夜誌】
//投票能力者//
小息嘅時候，麥麗芬襯冇人見到，捉咗我入去體育用品室。
我問佢，點呀，有咩同我講呀？
佢話，下，你知架啦。
我話，你唔好玩啦，我幫你唔到㗎。
佢話，下，你先唔好玩啦，我由識學一年級，識到你依家中五啦，我會唔知你幫到我？
我話，下，你唔好搞笑啦，你知道嗰啲嘢，全部都係巧合嚟嘅啫。
佢話，咁就求下你啦，比埋呢個巧合我。
我話，巧合呢啲嘢，我俾唔到你喎。
佢話，咁就當係支持我囉，咁多年朋友，我選中咗學生會會長，唔會虧待你架喎。我會比好多着數你架喎。
我話，我唔想要你啲著數喎。
佢話，唔好講咁多，一句講晒，你投唔投我呀？
我話，比我諗下啦。
其實冇咩好諗，我唔會投佢一票囉。就係識咗咁多年，我會唔知佢係一個點嘅人？佢咪就係一個擦鞋婆囉，乜都係自己嘅利益行先，所以如果佢做到學生會會長，佢只會聽聽話話，做老師同校長嘅小僕人，呢啲我全部都知道，我唔係未中過伏啦，以前啲選班長呀，風紀呀，我都有投票俾佢，咁多年嚟，我都夠晒支持佢啦，但係學生會會長喎，係影響到全間學校所有同學嘅福利同埋自由，我知道如果佢當選，佢一定會幫校長手修訂校規，收窄所有同學嘅行動，言論同埋思想自由。一諗到呢一點，我知道自己一定唔可以投佢。
我知道自己一定唔可以投佢一票，唔單止係原則嘅問題。麥麗芬識咗我十年，係唯一一個知道我嘅秘密嘅人，所以我真係唔可以投佢一票。係，我以前曾經同佢係朋友，所以將我嘅秘密能力話咗比佢知，關於呢件事，我都真係好後悔。但係唔講都講咗，我可以點呢？咪唯有緊守自己嘅底線囉，點都唔到佢一票囉。
至於我自己 － 我係幾時意識到自己嘅能力嘅呢？其實我都唔算係敷愆緊麥麗芬嘅，因為就算我意識到自己嘅能力，都唔代表我驗證到自己嘅能力，所以可能... 真係巧合嚟嘅。
我仲記得小一嘅時候係我人生第一次得到民主比我嘅成功感 － 動植物公園，山頂，烏溪沙 ，老師叫我哋投票，想去邊度秋季旅行。果陣時我聽到啲同學討論，似乎個個都想去動植物公園，有動物睇丫嘛，得我一個想去山頂，因為～我想去以前喺山頂嗰個咩信不信博物館。
於是我帶住有得揀就揀，必輸無疑嘅堅持投咗山頂，點知點票嘅時候，奇怪嘅事就發生啦。居然，大部份嘅同學都係投山頂。就連坐我隔離嘅朱文彪都係投山頂，但係佢足足講咗自己好想去動植物公園講左一個星期。我覺得好奇怪，於是我就問朱文彪，喂... 點解你會投山頂嘅？你唔係想去動植物公園嘅咩？
佢話，下，你都傻嘅，我邊有講過呀，我想去山頂好耐啦！
就係嗰一次，我開始懷疑自己有呢種能力 － 無論係乜嘢投票，只要我肯投，結果都會如我所願。冇錯，無論大大小小，班長選舉又好，風紀選舉又好，食Lunch投票去邊食又好，同朋友睇戲睇邊套又好，連我年尾上881903.com投我最喜愛男女歌手組合都好，我投親嘅人，都會贏。知道自己有咁嘅能力，除咗唔小心講咗俾麥麗芬聽之外，我當然都無講比人知。而麥麗芬亦都對我呢種能力珍而重之，冇講過俾任何人聽。佢當然珍而重之啦，好似頭先咁講，咁多年嚟我都幫過佢唔少次。
我同佢小學中學都讀同一間，去到今年，呢個由細細個開始已經機心滿滿，好識得阿諛奉承嘅人，決定要選學生會主席喎。
其實就，如果學生會主席呢啲嘢唔係學生投票，而係老師欽點嘅，佢都100%當選架喇，咁多年嚟，真係得佢一個同學，生存嘅目標就好似係為咗得到老師校長嘅認同咁㗎囉。老師問問題，佢一定第一個舉手答。老師要人幫手，佢一定第一個衝出去幫。校長上台講廢話，佢一定係第一個拍手歡呼。咁所以，好明顯，呢種人就完全唔會受同學歡迎，咁佢又點可以承受到算唔中學生會主席嘅呢種侮辱呢？就係因為咁，佢嚟搵我幫手。
佢喺小息時間搵我，lunch time就係投票嘅時間。其實我唔介意同佢絕交，所以我真係無投到佢一票。我本住自己嘅良心，投咗票畀另一位候選人梁同學。梁同學佢係真心為同學仔謀福祉，捍衛我哋喺學校嘅自由。冇錯，佢唔係操行最好嘅同學，但係，傻仔先至信操行分嘅啫。
然後放學之前嗰一堂調咗咗學生會時間，校長出嚟公佈邊日個候選學生會主席當選，可以籌募自己嘅內閣。校長行上台，啪啪支咪，我當然冇預算會有任何驚喜，因為我從來都無投錯過票。之後，校長開始講嘢。
「各位同學，今屆嘅學生會主席選舉已經有結果。我哋歡迎新一屆嘅學生會主席 － 麥麗芬 同學！」
我聽到校長宣佈結果之後，我呆咗。點解會咁既呢？唔通我已經無咗我嘅超能力？定係其實，以前嘅一切一切，都真係只係巧合呢？我諗極都唔明，就係呢個時候，我收到麥麗芬whatsapp我。
放學，體育用品室等。
於是，十五分鐘之後，我喺體育用品室等麥麗芬見面。
佢問我，點呀，係咪估唔到呀？
我無答佢。
佢話，你係咪覺得自己嘅超能力冇咗呢？
我耷低頭。
佢話，放心啦，你嘅能力，仲係度。
我望住佢。
佢話，呢個呢，其實一早就唔係選舉啦。扮出嚟嫁咋。校長呢，一早講好咗比我做學生會主席架啦。所以呢，啲選票一早燒晒架啦。
我呆咗，繼續望住佢。
佢話，我叫你投票俾我，純粹係睇下咁多年朋友，你會唔會支持我嘅姐。點知你真係咁唔畀面。話你知呀，呢一年，你都唔會有好日子過呀。
講完，佢就出咗去。
我企咗喺體育用品室，望住一對污糟邋撻嘅排球。污糟邋撻。
果然，就算有超能力，只要本身個選舉係唔公平唔正常唔係根據一個合理嘅制度，呢個都唔係選舉，我都係鬥佢唔贏。但係我知道自己要點做。
我拎個電話出嚟，食咗個錄音功能，save低頭先麥麗芬嘅說話，打開whatsapp，廣播咗比全校所有同學。我知道，戰鬥依家先開始。
來跟著夜間遊牧人遊走奇幻世界，翻閱四十多名虛構人物的夜誌。投票能力者、顏文字管理員、魔法少女系大叔、天氣先生的兒子、香口膠先生、小說內的小說作家⋯⋯一個又一個怪 ... ... <看更多>
翻開虛構夜誌 在 Per se成員Sandy 正在為你閱讀《#翻開虛構夜誌》 - YouTube 的美食出口停車場
歡迎收聽今回Ming's Radio，主持係Per se 的Sandy，同大家分享填詞人Oscar Lee 寫嘅《# 翻開虛構夜誌 》裡面嘅《復仇的村民》。戴起你的耳機， ... ... <看更多>