【#翻開虛構夜誌】
//投票能力者//
小息嘅時候，麥麗芬襯冇人見到，捉咗我入去體育用品室。
我問佢，點呀，有咩同我講呀？
佢話，下，你知架啦。
我話，你唔好玩啦，我幫你唔到㗎。
佢話，下，你先唔好玩啦，我由識學一年級，識到你依家中五啦，我會唔知你幫到我？
我話，下，你唔好搞笑啦，你知道嗰啲嘢，全部都係巧合嚟嘅啫。
佢話，咁就求下你啦，比埋呢個巧合我。
我話，巧合呢啲嘢，我俾唔到你喎。
佢話，咁就當係支持我囉，咁多年朋友，我選中咗學生會會長，唔會虧待你架喎。我會比好多着數你架喎。
我話，我唔想要你啲著數喎。
佢話，唔好講咁多，一句講晒，你投唔投我呀？
我話，比我諗下啦。
其實冇咩好諗，我唔會投佢一票囉。就係識咗咁多年，我會唔知佢係一個點嘅人？佢咪就係一個擦鞋婆囉，乜都係自己嘅利益行先，所以如果佢做到學生會會長，佢只會聽聽話話，做老師同校長嘅小僕人，呢啲我全部都知道，我唔係未中過伏啦，以前啲選班長呀，風紀呀，我都有投票俾佢，咁多年嚟，我都夠晒支持佢啦，但係學生會會長喎，係影響到全間學校所有同學嘅福利同埋自由，我知道如果佢當選，佢一定會幫校長手修訂校規，收窄所有同學嘅行動，言論同埋思想自由。一諗到呢一點，我知道自己一定唔可以投佢。
我知道自己一定唔可以投佢一票，唔單止係原則嘅問題。麥麗芬識咗我十年，係唯一一個知道我嘅秘密嘅人，所以我真係唔可以投佢一票。係，我以前曾經同佢係朋友，所以將我嘅秘密能力話咗比佢知，關於呢件事，我都真係好後悔。但係唔講都講咗，我可以點呢？咪唯有緊守自己嘅底線囉，點都唔到佢一票囉。
至於我自己 － 我係幾時意識到自己嘅能力嘅呢？其實我都唔算係敷愆緊麥麗芬嘅，因為就算我意識到自己嘅能力，都唔代表我驗證到自己嘅能力，所以可能... 真係巧合嚟嘅。
我仲記得小一嘅時候係我人生第一次得到民主比我嘅成功感 － 動植物公園，山頂，烏溪沙 ，老師叫我哋投票，想去邊度秋季旅行。果陣時我聽到啲同學討論，似乎個個都想去動植物公園，有動物睇丫嘛，得我一個想去山頂，因為～我想去以前喺山頂嗰個咩信不信博物館。
於是我帶住有得揀就揀，必輸無疑嘅堅持投咗山頂，點知點票嘅時候，奇怪嘅事就發生啦。居然，大部份嘅同學都係投山頂。就連坐我隔離嘅朱文彪都係投山頂，但係佢足足講咗自己好想去動植物公園講左一個星期。我覺得好奇怪，於是我就問朱文彪，喂... 點解你會投山頂嘅？你唔係想去動植物公園嘅咩？
佢話，下，你都傻嘅，我邊有講過呀，我想去山頂好耐啦！
就係嗰一次，我開始懷疑自己有呢種能力 － 無論係乜嘢投票，只要我肯投，結果都會如我所願。冇錯，無論大大小小，班長選舉又好，風紀選舉又好，食Lunch投票去邊食又好，同朋友睇戲睇邊套又好，連我年尾上881903.com投我最喜愛男女歌手組合都好，我投親嘅人，都會贏。知道自己有咁嘅能力，除咗唔小心講咗俾麥麗芬聽之外，我當然都無講比人知。而麥麗芬亦都對我呢種能力珍而重之，冇講過俾任何人聽。佢當然珍而重之啦，好似頭先咁講，咁多年嚟我都幫過佢唔少次。
我同佢小學中學都讀同一間，去到今年，呢個由細細個開始已經機心滿滿，好識得阿諛奉承嘅人，決定要選學生會主席喎。
其實就，如果學生會主席呢啲嘢唔係學生投票，而係老師欽點嘅，佢都100%當選架喇，咁多年嚟，真係得佢一個同學，生存嘅目標就好似係為咗得到老師校長嘅認同咁㗎囉。老師問問題，佢一定第一個舉手答。老師要人幫手，佢一定第一個衝出去幫。校長上台講廢話，佢一定係第一個拍手歡呼。咁所以，好明顯，呢種人就完全唔會受同學歡迎，咁佢又點可以承受到算唔中學生會主席嘅呢種侮辱呢？就係因為咁，佢嚟搵我幫手。
佢喺小息時間搵我，lunch time就係投票嘅時間。其實我唔介意同佢絕交，所以我真係無投到佢一票。我本住自己嘅良心，投咗票畀另一位候選人梁同學。梁同學佢係真心為同學仔謀福祉，捍衛我哋喺學校嘅自由。冇錯，佢唔係操行最好嘅同學，但係，傻仔先至信操行分嘅啫。
然後放學之前嗰一堂調咗咗學生會時間，校長出嚟公佈邊日個候選學生會主席當選，可以籌募自己嘅內閣。校長行上台，啪啪支咪，我當然冇預算會有任何驚喜，因為我從來都無投錯過票。之後，校長開始講嘢。
「各位同學，今屆嘅學生會主席選舉已經有結果。我哋歡迎新一屆嘅學生會主席 － 麥麗芬 同學！」
我聽到校長宣佈結果之後，我呆咗。點解會咁既呢？唔通我已經無咗我嘅超能力？定係其實，以前嘅一切一切，都真係只係巧合呢？我諗極都唔明，就係呢個時候，我收到麥麗芬whatsapp我。
放學，體育用品室等。
於是，十五分鐘之後，我喺體育用品室等麥麗芬見面。
佢問我，點呀，係咪估唔到呀？
我無答佢。
佢話，你係咪覺得自己嘅超能力冇咗呢？
我耷低頭。
佢話，放心啦，你嘅能力，仲係度。
我望住佢。
佢話，呢個呢，其實一早就唔係選舉啦。扮出嚟嫁咋。校長呢，一早講好咗比我做學生會主席架啦。所以呢，啲選票一早燒晒架啦。
我呆咗，繼續望住佢。
佢話，我叫你投票俾我，純粹係睇下咁多年朋友，你會唔會支持我嘅姐。點知你真係咁唔畀面。話你知呀，呢一年，你都唔會有好日子過呀。
講完，佢就出咗去。
我企咗喺體育用品室，望住一對污糟邋撻嘅排球。污糟邋撻。
果然，就算有超能力，只要本身個選舉係唔公平唔正常唔係根據一個合理嘅制度，呢個都唔係選舉，我都係鬥佢唔贏。但係我知道自己要點做。
我拎個電話出嚟，食咗個錄音功能，save低頭先麥麗芬嘅說話，打開whatsapp，廣播咗比全校所有同學。我知道，戰鬥依家先開始。
