譚耀宗真係十年如一日，屹立不倒嘅應聲蟲，忠誠廢物嘅典範。
還記得 10 年前，當年（2011 年）仲係記者嘅無綫記者喺《新聞透視》談及遞補機制方案，記者當面質問譚耀宗：「政府提出嘅原方案，你支持。修訂嘅，你支持。唔諮詢，你哋支持。到要諮詢，你哋都支持。感覺係，你嘅立場喺邊呢？」譚耀宗一呆，似笑非笑地面容抽搐咗幾下。
十年後，即 2021 年嘅 8 月，譚耀宗以中國全國人大常委嘅身份前往北京參加人大常委會，去之前不停放風，先對外聲稱預料人大要將《反外國制裁法》納入《基本法》〈附件三〉，即使外資反對聲音此起彼落，但譚耀宗就好似皇帝前嘅太監一樣，上頭叫佢做乜，佢就自動揣摩上意，添油添醋咁講一大堆支持上意嘅說話。
一時叫人唔需要擔心，一時叫外資要深明大義，一時又要求外資向所屬國家政府施壓唔好作出「霸凌行為」，一時又話相信本地立法工作將會謹慎地進行，一時又話唔驚外資會走人，仲拍晒心口話香港個金融貿易中心地位唔會受到《反制裁法》影響。
好喇，上到去之後先知道原來中國政府決定褪軚，暫援表決《反外國制裁法》納入《基本法》〈附件三〉，譚耀宗又即刻衝出嚟，話唔表決都唔出奇，又幫上面講盡門面說話，乜嘢叫「（唔表決）唔係好特別嘅情況」，乜嘢叫「過去都有試過」，跟住又話「多啲時間去研究，我覺得都好啲」。
幾日之間，由「支持表決」到「支持褪軚」。
對呢種人，用番十年前嘅問題去同佢對質，係完全無過時：「你個立場喺邊呢？」
諗深一層，佢立場真係無變，因為佢個立場就係做忠誠嘅廢物，呢啲人唔知有冇為自己有塊咁厚嘅面而震驚。
🔑 【超務實長清單整理，和你加強資訊保安、私隱保護（2021年8月更新）】 https://www.patreon.com/posts/54385202
▶️ 請訂閱 Patreon 頻道，支持不受干預的獨立創作及評論 | www.patreon.com/pazu
