看完藍奕邦給Eric Kwok的公開信，我不禁深深嘆一口氣。
其實呢單野我也一直在掙扎應否婊揚。
唔婊揚嘅主因，我當時（我強調係當時）係相信人性本善，或許只是無心之失，香港地娛樂圈一向肉麻當有趣，寫完好似仲幫左宣傳咁，無理由蝕俾佢，此其一。而重點係：我唔想大家覺得同志好小器，開個政治不正確的玩笑都要婊揚，所以就算介意，都係要硬食。因為「玩唔起、小器」喺社會上係一種死罪，認真就「L」了，你唔想俾人叫同運L嘅話，只能硬食。
但我本人其實都唔太明白：點解我無端端要俾你玩？又或是我做咩事要撐大個器去包容你？彷彿我好像天生有一種義務，是被你拿來當笑話似的。
Eric kwok同藍奕邦的恩怨，我作為外人很難說、Eric Kwok是否恐同，我不是他本人，也很難說。但Erick Kwok有一個觀點，我挺想說的：
我身邊都有好多同志朋友，所以我唔恐同。
其實兩者無必然關係，難道我身邊好多鍾意女人嘅朋友，所以我又會變直？
又，其實以我平時交手的經驗，其實呢個社會真係無幾多個人會認自己恐同，我相信你問我地嘅「戰友」鳴肛社，佢地都唔會認為自己係恐同。
好多典型似是而非的論調，例如「我唔反對同性戀，但唔該唔好喺我面前出現」、「我唔係話同性戀係精神病，但佢地唔正常囉」、「我接納但我唔支持」、「我好多同志朋友，但我換褲會貼埋牆換」。
說以上說話的人，會覺得自己好「開明」，也絕對是同志友善，其實心底裡都係一句 「喂！家陣我唔拎荔枝柴黎燒死你班死基佬已經好好啦，我允許你生存在這個世上，仲同我呼吸住同一口空氣，你仲想點？」的確，由痛恨變成討厭，係一個大讓步，我們再說什麼，就是強人所難。所以，最難纏的對手，唔係一睇就知硬膠，例如那堆成日關心同性戀會否令佢唔識教下一代，但見到教會搞細路仔又覺得無乜野的奇異教徒，而係呢種自稱自己係友軍，但做出來的事，完全難以令人信服是朋友的人。
最後，我想講嘅係，唔好怪藍生大反應，同志權益係真的需要寸土不讓地捍衛— 歷史上每一次社會動盪，第一時間被當權者拎出黎祭旗的，一定係同志。二次大戰時，你知道德軍殺猶太人殺很兇吧？但你可知道集中營內，還有一種粉紅色的臂章？那是專為同性戀者和強姦犯而設的。
同志這個身分，不如你想像中的輕鬆，只要時代一動盪，這個身分絕對會招來殺身之禍。在這個一點也不令人感到安全的華人社會裡，我明白為什麼有些人怎樣也不肯出櫃，因為櫃外的世界不一定是那麼美好，而那怕是現在美好，十年後誰說得準？
今天一個電視節目關上門讓你舉手出櫃、十年後也可以在人民批鬥大會裡迫你從櫃裡走出來。不要說文革很遙遠，回歸不過是二十年，你看這裡的政府墮落成怎麼樣，世事變幻總是無常。再看現在網上批鬥座每日都有人跪玻璃、道德法庭每日都透過起底和網絡攻擊讓人在現實生活裡丟工作，而網上也不過是一輪熱身，終有一天，文革式批鬥還是會再次降臨在這片土地上。
作為一個同志，我心裏的不安，你根本不懂。
#所以好努力儲錢買農場
#我唔係講笑
#我係真心想避世
#人類真的太危險
#衰極我都仲可以接埋香港班死八婆黎避難嘛
#仲有一貨櫃的舊情人
#躲在山區自給自足開後宮你咬我食啊
#八婆難民營
#諗起都覺得好嘈
