連續十次教仔失敗（上）
我叫阿芬，係一個單親媽媽。
比好多單親媽媽幸運嘅係，老公生前留低咗一筆遺產，我冇乜經濟壓力。
雖然唔算大富大貴，但至少唔洗一路湊仔，一路返工。
但就算有少少錢，一個人養育一個小朋友，都係好大壓力。
我好愛我老公，我唔會再婚。
我好愛我個仔，從此，佢就係我生命中唯一嘅親人。
我只係想仔仔開心快樂咁成長，永遠陪住我，我唔需要佢成材。
所以我從來都唔逼佢讀書，佢鍾意咩我就買咩，佢鍾意食咩我就煮咩。
但係唔知點解，仔仔嘅脾氣愈嚟愈差。
有時候，我只係煮飯慢咗少少，就會俾佢鬧一餐。
我都試過鬧番仔仔轉頭㗎，但我一鬧佢佢就喊，佢一喊我就心痛。
我覺得都係好小事啫，冇理由為咗咁小事，影響母子關係。
但我嘅遷就，冇令我哋嘅關係變好，反而仔仔成日對我呼呼喝喝，剩係會吩咐我畀錢同做家務。
仔仔中三輟學後，冇讀書又冇返工，群埋一班唔三唔四嘅朋友，夜晚出街，日頭先返嚟瞓覺。
呢個時候，我先發現，我做咩都冇辦法教好仔仔。
我喊過鬧過，令仔仔更加討厭返屋企，佢開始幾日唔返嚟，唔知去咗邊。
終於有一次，仔仔失手殺咗人。
「失手」係佢講嘅，我坐喺法庭上，聽住檢控官講，佢哋一班人為咗娛樂，點樣虐殺一個女仔，毫無人性……
我終於意識到，佢係一個失敗嘅人，我係一個失敗嘅阿媽。
我暈咗，我醒番嗰陣，發現自己戴住一個頭盔。
我除低頭盔，記憶好似潮水一樣湧入腦海。
我的確叫阿芬，但我唔係一個單親媽媽，我啱啱結婚，我一直都想做媽媽，於是就嚟考牌。
冇錯，時至廿二世紀，生仔已經要考牌。
夫妻雙方都考到牌，就會得到生育證，可以合法生育。
考試唔合格嘅話，每年都可以重考。
只要合格一次，就可以得到生育證。
考牌嘅方式非常先進，係用VR遊戲嘅方式，測試者會進入隨機嘅新人生，成為父母。
子女各有各嘅問題，好似現實一樣，冇一個小朋友係完美嘅。
喺遊戲裡面，你會忘記自己考緊試，以為係一個真實嘅人生。
考試合唔合格，唔係視乎子女嘅成就。
只要你可以養育出一個品格良好，對社會利大於弊嘅下一代，就算係合格。
咁樣講法，合格唔係太難。
但偏偏呢次，我就因為過度溺愛個仔而唔合格。
我好失望，我離開考場，就喺門口見到我老公。
佢都啱啱考完試，一次就合格。
老公安慰我：「唔緊要啦，我都唔一定要生小朋友，二人世界咪幾好。」
「我一定要生仔！」做阿媽，係我一直以來嘅夢想。
老公又講：「咁下年再考過囉，又唔係冇機會。」
我點點頭。
第二年，我又嚟到考場。
戴VR頭盔前，我念念有辭：「唔可以溺愛……」
呢一世，我依然叫阿芬。
我同老公都出身基層，勤力讀書，成為專業人士，躋身中產階層。
所以，我哋深明讀書嘅重要性，自從阿女出世後，就帶佢去參加各種嘅興趣班、補習班，務求令佢贏在起跑線。
阿女好勤力讀書，名列前茅。
直到有一日，我發現阿女喺度拉小提琴。
我問：「後日就考試啦，你做咩仲小提琴？」
「今日我聽到一首好好聽嘅歌，我想試吓拉。」阿女眼仔碌碌咁望住我。
我有一瞬間嘅心軟，但腦裡即刻響起一把奇怪嘅聲音：「唔好溺愛……」
「考完試先啦。」我一手搶走佢嘅小提琴。
下集：https://bit.ly/3jVKW77
Patreon訂閱即時睇下集，快人一步：https://www.patreon.com/tomato28
#短故 #短篇 #小說 #陳美濤 #廣東話 #粵語 #tomatochan #連續十次教仔失敗
