🚫嚴禁劇透
🚫粗口自行過濾
🚫免批評外表人身攻擊
·
[1230隔夜超短劇評][ViuTV][歎息橋][EP15 大結局]
·
[讚]
真係畀劇組捉咗入局，我知今集係最後機會令我搵多啲線索，去說服自己角色係朝住我想嘅方向發展。身為觀眾呢種感覺好正，佢唔係drive你個情緒咁簡單，有時甚至唔做呢件事，佢係鋪啲嘢出嚟等你搵，但又唔講到盡，等你自己搵你想去嘅方向。我喺最後出roller時真係睇Sammy睇到實一實，到底佢拎到Thomas張畫嘅時候會唔會諗返細個喺旺發慶祝生日時原來張畫係Thomas畫呢？不過金睛火眼都睇唔出嚟，都好嘅，如果講咗就破壞呢套嘢由得觀眾諗嘅宗旨特色。
·
今集最有韻味係阿南嗰個角色。佢一無所有又經歷過一次佢自覺唔係鍾意自己嘅婚姻，面對Sammy，除咗一開始用計介紹上海黃總畀Sammy識之外，其餘時間都係溫柔的等待，到咁上下就問吓Sammy到底係點諗。
·
佢都深深認識Thomas同Sammy，所以先會喺Sammy決定同佢一齊唔去郵輪之後。都要推佢去。佢大可以就咁同Sammy去上海，但佢知道咁樣唔夠「真」，就正如佢覺得前妻只係鍾意佢啲員工福利咁。
·
南同Sammy分別時，嗰吓真係吻別咁拍法，又背晒光得個影。睇返Thomas同Sammy「一家人」時鬼死咁光猛。唉，睇到呢度我覺得Sammy都係會揀返Thomas喇，雖然又唔知會折騰幾多年。阿南一消失，佢哋兩個嘅關係應該又回復原狀，互相消磨至死方休。
·
[彈]
終於到Sammy，亦都終於對住觀眾講到出口，話怕自己會好似Judy咁一向Thomas告白即絕交，所以咁多年嚟佢鍾意Thomas都唔表白。不過呢個一早就估到喇，對比起其他角色啲峰迴路轉係少咗啲層次。
·
Sammy着重承諾又「記仇」，記住邊個承諾過佢而無做到。後生時候佢應承咗Thomas頂更又應承咗睇阿南比賽，然後履行咗對Thomas嘅承諾。呢個亦都唔意外，所以嗰段都冇乜衝擊力。
.
如果玩啲轉嚟轉去嘅羅生門，可能會好啲。例如偷返一集Kevin畀阿南而又唔係講阿南，而係好似Kevin咁用佢個角度睇吓Sammy同Thomas嘅世界，扭吓啲劇情情節，會豐富同有趣得多。
.
一開始一鏡落喺旺發見晒咁多位主角出現，應該係嗰啲命運一早交織嗰啲嘢？要拍呢啲好用時間，亦都幾有趣，不過我覺得有啲多餘。Joyce同Ken出現得好冇謂。
.
[又]
唔只一位觀眾留言話Joyce自己結局嗰集點解冇講到昌叔係咪死咗，話想知道。我認為係唔講得㗎，Joyce依家有咗BB，係個決定同Ken一齊定分開嘅重要元素。如果昌叔佢只係傷咗，咁Joyce就可能為咗BB頂住，唔同Ken離婚。如果昌叔佢係死咗，咁就好大可能會同Ken玩完。Joyce嘅結局講到呢度就要完，如果唔係太強引導，成套劇一直努力營造嘅嗰種「觀眾覺得點就點」嘅感覺同玩法就會冇咗。我鍾意Joyce嗰集完嗰個位。
·
[演員表] 林保怡、陳健朗 飾 李子勇 Thomas / 周家怡、談善言 飾 方小薇 Sammy / 衛詩雅、楊偲泳 飾 何樂兒 Joyce / 陳奐仁、黃定謙 飾 胡啟源 Ken / 伍詠薇、唐寧 飾 梁淑媛 Catherine / 潘燦良、凌文龍 飾 鍾懷安 Ryan / 秦沛、艾威 飾 何永昌 / 陸駿光、黃溢濠 飾 黎銘南 / 劉皓嵐 飾 李小陸 / 岑珈其 飾 鍾家俊 Kevin / 黃文慧、邵美君 飾 Ken母 / 劉兆銘、郭峰 飾 李文滔 / 易健兒 飾 嘉嘉 Milky / 李楓 飾 大姐強 / 李思函 飾 戴可迪 Judy
·
·
#1230隔夜超短劇評 #ViuTV #歎息橋 #林保怡 #周家怡 #陳奐仁 #伍詠薇 #潘燦良 #陸駿光 #談善言 #黃溢濠 #黃定謙 #衛詩雅 #陳健朗 #楊偲泳 #黃文慧 #邵美君 #唐寧 #秦沛 #劉晧嵐 #劉小華 #劉兆銘 #岑珈其 #凌文龍 #易健兒 #郭峰 #李楓 #李思函
劉晧嵐 在 CommonLoser 04 聽我說ft. 劉晧嵐(Official Visualizer) - YouTube 的美食出口停車場
劉晧嵐 Written by Wallis ChoLyrics by Scott LauMusic by 伍卓賢Visualizer prod. by KENIPresented by F.E.A.R.Special Thanks to Dumb Youth▻ ... ... <看更多>