我一生人同朋友去旅行好多次，就算去到英國日本台灣都會約當地嘅人出嚟玩。就算大家性格可能唔係太啱最多唔好再聯絡大家做普通網友就算。
聽日係一位冇辦法再一齊相處嘅朋友嘅生日。
我哋冇再聯絡嘅原因就係因為旅行。
我冇一日忘記過佢生日、但係我亦冇可能再聯絡佢去講生日快樂。
有啲人就算你當佢朋友，大家性格唔啱喺埋一齊做嘢就注定會鬧交。唔係嗰個人人品唔好又或者佢想陷害你，而係兩個人堅係會火星撞地球。
我哋試過去旅行每一日都鬧交，每晚都怒氣沖沖各自返房、每日朝早都會有千字文互相WhatsApp解釋。都幾辛苦，夜晚係酒店發脾氣同自己講要包容朋友，第二日要好聲好氣道歉解釋，因為珍惜嗰段友誼。
朋友本來平日偶爾見面、食餐飯、係唔會反面的。平日呢位朋友真係一個好人，又有禮貌又斯文仲好準時。
所以普通朋友好難反面，只有好朋友見得太多、對對方有期望、有啲嘢要一齊合作完成先容易產生磨擦。
如果相處太過疲累嘅話保持距離會係好事。冇必要再將以前唔開心嘅嘢成日掛係嘴邊。明知自己講嘢會傷害對方、對方亦會傷害到自己，咁就不如唔好見面，唔好聯絡。知道對方過得好就已經足夠。
聯絡唔係強迫就可以做到。
我已經真心疲累、唔想再鬧交、唔想再解釋、亦都唔想再包容。講到明真係相處唔到不如唔好再聯絡。
封鎖WhatsApp但唔解除Facebook朋友關係，因為仲當你朋友先會互相望下對方仲健在。
當我一早已經話咗唔想再聽唔想再講，硬係要Facebook寫一篇文然後tag我睇，即係強迫我一定要聽呢位朋友講嘢。
為咗唔想俾呢位朋友tag 我唯有取消朋友關係。
然後呢位朋友走上粉絲專頁用好有禮貌嘅詞語喺留言嗰度公開問我可唔可以二十四小時之後留訊息俾我，我以為係放我上枱公審？
我真係唔想睇明知再講又係鬧交收場何苦？如果呢位朋友有尊重過當初話咗唔想再聯絡嘅想法，係咪可以放過我呢。
為咗唔想俾人再禮貌地請我一定要聯絡，我唯有在粉絲專頁都封鎖埋呢位朋友。
然後我粉絲專頁就被投訴。
今日呢位朋友就去咗我嘅網站嗰度係曾經有佢出現過嘅文章裏面留言話唔想比我用佢嘅相片免費宣傳。
不如我哋講下星座。
獅子座嘅女人係冇可能俾人威迫的。
我當初講咗唔會再聯絡就係唔聯絡。
你殺咗我我都唔會就範。
——
講得出以上說話我就預咗好多人過嚟食花生，又或者會話同人去旅行就會有以上風險你自己咎由自取。
仲有就係問：
「點解唔再～俾個機會佢解釋？你都一定有錯，而家你恃住自己KOL寫篇文都係公審人係咪？」
「如果唔係你條友仆街又點會成為仆街磁石有咁多麻煩友黎纏住你？」
「等睇炎上🤩🤩🤩」
「當中一定有啲姦情😏」
我都好肯定會有Haters暗中笑覺得有免費笑話真開心。
因為嬲還嬲，其實我睇睇下都覺得幾好笑。
我自己真係未試過同人絕交仲要去阻住對方。以前我比男朋友飛（肯定唔係一次添啦！）都係。
朋友絕交唔一定係其中一個人錯哂。
大家唔啱玩就算，唔使搞到大家都有壓力。
——
嗱，你哋唔使認同我嘅朋友觀㗎！好似我啲咁嘅人其實佢早啲同我絕交睇清楚我份人有幾咁賤格對佢都有好處😊
我從來都冇話過自己係一個好人，一向都話我係方丈、港女、仲要係年紀大冇人要嗰啲更年期症狀，你哋唔知道咩？☺️
呢度冇廣告冇宣傳我應該唔會影響任何品牌。
身敗名裂都係我自己一個，所以各位唔需要替廣告商擔心，香港GDP唔會受到影響㗎！
