九月尾小編放大假，放大假就當然要去旅行喇。今次小編就去做泰國嘅一個叫喀比嘅市鎮。小編心裡面只期待住陽光與海灘，比自己好好咁叉下電，悠悠閒閒咁放低平日嘅煩惱事。但係估唔到嘅係，去到喀比呢個渡假好地點，波Boot竟然都有唔少，本身諗住只去陽光海灘嘅我，就花咗成大半日去睇波Boot，都係求快樂啫，值得嘅！
小編果日就出咗去喀比市，食咗陣間嘢，就見到一間叫Vogue shopping centre嘅商場。唔好睇佢好似好噏得咁，裡面頂層間Sports World真係令人大開眼界（圖1）。喀比主要入嘅款式為平版波Boot，岩晒平價粗著嘅波友。先睇Nike嘅牌子（圖2，3，4，5，6），佢有連香港都無嘅最平版本，當中包括Tiempo Rio III同Magista Ola；貴啲嘅款式嚟講，佢淨係得Tiempo Genio Leather同Magista Onda，响香港嚟講屬於平版。再睇下Adidas款式（圖7），呢度就淨係得Ace16.4嘅最平款式，同樣地，適合平平地粗著嘅波友。至於價錢，佢有啲款式更加係會做九折，簡單啲講，平版分分鐘二百幾港紙就買到。
如果去泰國嘅波友，又想買番啲泰國牌子返去做紀念，小編建議可以試下PAN呢個泰國自家牌子（圖8，9），佢就有哂釘Boot同平底，佢啲配色都算幾Sharp，且帶點泰國嘅風味，質素上就千祈唔好預到好好，始終摸落去塊皮個感覺係有啲生硬嘅。至於平底款，小編就睇中咗呢對粉紅色嘅款，摸落去質感算好，同時佢白色個塊膠摸落去似係避到震過類嚟，不過都係傾向硬身。價錢上，大家預番二百至五百港紙到，視乎波BOOT嘅款式同級數。
除此之外，Vogue shopping centre竟然有香港絕跡嘅Kappa波Boot（圖10），原來款式已經無以前咁老土。臨走前，小編見到Joma嘅室內平底波Boot！！其實Joma响五人足球界享負盛名，响外國，唔少踢五人足球嘅球員就係著呢個牌子，响呢個商場仲竟然有唔少款式，當中呢對粉紅色嘅Super Regate簡直係小編嘅心水（圖11，12），仲只需約五百港紙嘅價錢，嗚嗚，鬼叫自己最近買得太多Boot，唯有放棄，影咗就當買咗算。
除咗Vogue shopping centre，喀比嘅BIG C都係一間值得推介嘅商場，裡面間Super Sports都會令波友們有唔少嘅驚喜！入到去，Come on!一堆Umbro平底Boot做緊Sale（圖13），二百蚊港紙到有對中價嘅平底Boot係咩玩法？呢啲款式响香港絕對無，如果有Quota嘅朋友，我真係諗唔到咩原因唔買對翻香港踢波，又唔使擔心同人撞鞋。小編响啲Boot裡面就搵到對之前介紹過嘅Velocita Pro平底款（圖14），價錢對返港紙都只不過係二百蚊到！其實Umbro而家啲款真係越出越靚，而且質素唔差，小編真係忍唔住要為Umbro發下聲！再望下Umbro釘Boot，同樣都係做緊Sale，一對貴版Boot賣成五百幾港紙。。款式重要算係新，當中包括UX 2.0 pro同Velocita II Pro HG，絕對係抵買同抵買（圖15，16）！
响Super Sports睇埋Nike（圖17），最吸引係Tiempo Legacy II FG做緊半價（圖18），約五百蚊港紙就有對次貴版嘅Tiempo買，真係算咁上下，不過第六代嘅Tiempo嘅耐用程度一直係一個問題（除咗Rio III同Genio II Leather），所以都係唔入喇。除咗Tiempo，Nike嘅款式都係同香港差唔多，最好嘅版本通常為中價版。
小編響度諗，嚟得泰國喀比，無理由唔買返啲足球嘢俾自己做紀念嘅。小編就咁啱响Super Sports裡面見到新出嘅泰國國家隊波衫（圖19，20），只需990泰銖，姐係約220港幣到，真係抵到爛，小編最尾就揀咗橙紅色呢件嘅泰國作客波衫，因為得作客有中碼，嗚嗚。。
BIG C最高個層係一間大型超級市場，好有外國Feel嘅，啫係預你渣車嚟買一星期屋企要嘅嘢咁嘅個款商場。唔好睇佢一間好似百佳咁嘅超市，佢裡面竟然比小編搵到啲五人足球，啫係Size細個四號波，但係個波係會唔彈個隻，色彩重要係幾斑斕下嘅（圖21，22）。小編見機會難得，就買咗個橙色嘅，比自己得閒响屋企練下基本球感同逆足嘅技術咁樣。如果驚女朋友詐型嘅波友更加唔使驚，小編就響度搵到個Hello Kitty嘅足球（圖23），到時候自己買對Boot，跟手買埋個Hello Kitty波俾女朋友，講聲「我特登搵俾你，希望你鍾意啦。」，女朋友花心怒放，波Boot就輕鬆過關啦～
小編真係估唔到去喀比旅遊會遇到咁多足球產品，某程度上地方賣嘅嘢都反映緊當地重視足球嘅程度。雖然泰國係較為貧窮嘅國家，所以入嘅款好少機會係貴版，但係佢嘅波Boot種類真係算多，而且款式都算Update，最厲害嘅係佢哋有唔少自己嘅足球品牌，而且係响泰國足球界立足到。此外，泰國响五人足球嘅重視程度係好高，佢哋有佢哋嘅五人足球聯賽，仲會有唔少真球迷去睇同打氣。話說其實之前泰國就响五人足球世界盃有份踢，仲踢到去十六強添。
有時自己都會諗，响香港，地係少啲，最容易接觸到嘅一定係小型球，但係要踢香港足總嘅五人足球，好得意嘅係你要入咗踢十一人嘅球會先，你先大機會有得踢。小編就認為十一人足球同五人足球係兩種運動嚟，要咁樣先踢到的確有啲本末倒置。老實咁講，香港有幾多專係踢五人嘅球會？又有幾多賽會專係搞五人足球嘅？有時啲確感到婉惜，望望五人足球世界盃，亞洲球隊嘅表現的確係唔錯，入到去決賽周嘅亞洲球隊就有泰國，越南，亞塞拜疆，烏茲別克，哈薩克同伊朗。而伊朗仲贏咗有法卡奧嘅巴西，最後更加拎咗世界盃季軍。五人足球俾十一人更講求腳下技術，所以高大力量型嘅球員未必咁著數，因而引申到細粒腳下功夫好嘅亞洲球員得意响世界舞台立足。
落一落香港嘅街場走翻轉，年輕嘅球員跟隊，响五人場內磋下波，擺嚟擺去，有默契嘅球隊，踢全能足球，無固定位置，用整體走位製造空位。假若，配以專業嘅訓練，加上有高水平易接觸嘅賽會，五人足球，認真响香港係有得諗。
#喀比 #泰國 #喀比足球 #泰國足球 #泰國波boot #平價波boot #panfootball #五人足球 #香港小型球 #futsal #五人足球世界盃 #supersports #sportsworld #hellokitty足球
