中國與各國之間的衝突持續升溫，拳腳無眼，特朗普掀起的科技戰、貿易戰似乎招招到肉；美國以外，印度喺抗中方面，可以話走得好前。短期內會唔會收手？好難吧。
中印邊境爆發嘅衝突，已進一步引爆兩國之間的科技角力。 印度由6月底至今，一共禁咗224個中國App，覆蓋範圍極廣，包括TikTok、微信、微博……對當地影響好大，大到最近印度有人因為冇得玩《絕地求生》食雞，屋企上吊身亡。
正正因為影響大，印度更加無路可退，要趁今次反中情緒「戒奶」，減低對中國依賴。2018年，印度Google Play下載頭100位App，共有44個來自中國；去到上年第二季與第三季，印度Google Play和App Store前200下載量App，中國App仍佔38%。
中國App過去之所以冒起得咁快，多多少少係因為自己起咗道牆，成功阻截其他國家嘅科技巨企，尤其係美國企業攻入中國，令中國科技產業有發展空間。
咁印度今次某程度上，都係跟中國學嘢，先大包圍式封殺中國App，令當地科網公司有二次投胎機會。好似TikTok被禁後，標榜「印度製造」嘅替代品，例如連名都似嘅Tik Kik瞬間爆紅；Mitron更曾衝上Google Play下載榜首。
再者，中國做咗世界工廠都咁多年，大家受嘅氣亦唔少。印度同中國一樣，人多地大，一樣有做世界工廠嘅條件。印度總理莫迪由2014年競選時，已不斷提倡大搞「印度製造」品牌，等咗咁多年，終於畀佢等到呢個千載難逢嘅機會，就係全球集體去中國化，畀着你都會食住上「搶客」吧？
印度交通部長賈德卡利（Nitin Gadkari）之前受BBC專訪，講得就更白：「中國的全球地位衰退，對印度而言是『因禍得福』。」莫迪政府自3月起，為吸引放棄中國嘅外資公司進駐，特別係電子製造業，已陸續推出相關投資優惠，而且亦好快地，蘋果已開始喺印度組裝iPhone，三星亦計劃印度建生產線。同中國反面，令自己有上位機會，又唔係冇勝算，又何必咁早同你握手言和？所以相信未來，中印之間嘅花生亦只會越來越多。
之前專欄都寫過，國際間「去中國化」共識已成事實，亦都回不去了。中國品牌於國際間的下場，恐怕逐步會被分屍，一係好似中興（763）、華為咁直接被封殺；一係好似TikTok咁逼你賤賣；再唔係就好似南韓出嘅《絕地求生》，收返騰訊（700）印度經營權咁，唔同你做生意。
如果唔怕畀人話面皮厚嘅，咪好似小米（1810）咁，直接將印度小米招牌「Mi」換成Made in India，嘗試扮唔係中國貨。畢竟小米上年全年手機出貨量1.25億部，印度佔4,360萬部，仲多過中國。
面對印度處處挑釁，何解戰狼外交冇咩反應？不如睇睇「中國第一五毛」胡錫進點解釋：「中國對印政策是以實力為後盾的，大家都不怕印方挑釁者，解放軍何來面對他們的膽怯？國家又何來面對印度的軟弱？大家要相信，中國相對於印度是絕對的強者，我們手中掌握著各種主動性，無論是談是打，解放軍都不會讓印方占我們中國的便宜。」
完
by千頌C@堆填區
