我是說故事的人，在寫別人的故事，但我不希望是你的故事。
其實社會上好多人都係冇退路，覺得挫敗同埋冇希望嘅時候，並冇所謂嘅避風港，電視劇太美好，劇情總係唔如意嘅時候返屋企，家人就會開門迎接你，任你喺懷內放聲狂哭，但現實中更多嘅係，當你失意同無助之際，屋企人畀你嘅壓力仲更加大。
或者人嘅本性始終係欺善怕惡，好多父母甚至會將脾氣同埋情緒發洩喺仔女身上，因為佢哋比起外人更加好蝦，而且華人社會好多父母似乎唔太尊重仔女，將自己嘅價值觀硬套上去，將自己想行嘅路硬塞畀下一代，說穿了，有部分父母最愛嘅係佢自己。
＝＝＝＝＝＝
《我朋友去咗佢姐夫公司做臥底 5》
之前聽姐夫講過，Louis係sales team做得最長，即係開國功臣，所以係大大佬，Daniel同Gilbert差唔多同期入嚟，而肥仔風就再之後先join，其他人物性格就冇講喇，姐夫應該唔想我對任何人先入為主，最好自己摸索同感受。
Louis冇乜機會接觸，我同Daniel、肥仔風交手比較多，Gilbert喺公司太低調，所以佢主動叫我一齊去利豐見客，即使Cliff同Rick兩個露出詭異笑容，我都好想跟埋去睇睇咩事。
開利豐名唔係要講呢間公司壞話，而係想畀更多人有清晰概念，究竟上利豐見客係咩一回事。
如果你上過去，又或者曾經（or現時）喺利豐做，應該知道裡面大約係點，由於我本身並唔係做呢行，之前以為利豐就係利豐，一個名就係一個客，點知唔係嘅，絕對可以玩一個下晝，入面係有好多個客。
**為咗唔影響人，以下牌子名並唔係當日真實**
首先你上到去reception就講約咗利豐邊一組，個伏位其實喺Gilbert身上，佢係一隻牛嚟嘅！
Gilbert對Receptionist講：「我哋約咗Mary，DKNY嗰組。」
好喇，入得去，Gilbert帶住我去DKNY嗰組打招呼，叫我派卡片，跟住聽佢同Mary係咁吹吹吹，其實人哋唔係好睬佢，都唔難理解嘅，你返緊工都唔想應酬啲sales啦！由於平時好難約利豐各組team head，個個當我哋係臭四，難得入到去個office，Gilbert完全唔放過任何一個機會，呢度咁大嘅area，面前三行係做緊DKNY啲單，隔個Partition又係第二組第二個牌子㗎喇，呢一組同我哋訂貨，唔等於成個利豐咁多組都同我哋訂貨，換言之去一層利豐，我哋係有權BD好多唔同牌子嘅單返嚟。
Gilbert：「唔好意思Mary姐，想問下你，隔離team係做邊啲單㗎？」
Mary：「隔離係Max Mara，你有冇打去約佢哋見面㗎？唔好行埋去搞人喎！」
Gilbert：「我知我知，打個招呼啫，唔會令你難做，另外呢，對面我見掛咗啲Polo版喺度，係咪做Ralph Lauren㗎？」
基本上佢嚟搵DKNY組嘅Mary只係一個餌，因為其他組唔肯見佢，打嚟又畀人cut線，所以最直接嘅方法就係殺上嚟，入到利豐個office，Gilbert就打算逐組逐組派卡片，佢係我人生中見過最落力嘅sales，沒有之一。
其實sales呢行飯唔係人人都啱食，我自問唔得，而Gilbert真係會低聲下氣，唔怕睇人面色，畀客窒都仲要陪笑，喺利豐個office行嚟行去周圍打招呼都唔覺得瘀皮，你可以話佢係奴隸獸，我當時都好尷尬，大行啲merchandiser面色又唔係咁好睇，可能佢哋平時都畀唔同嘅sales煩得多啦！不過你諗深一層，老闆就係最鍾意Gilbert呢啲員工，如果我有間公司，都會想請Gilbert呢種人返嚟做sales，個個都想型，下靶位點都要有人做㗎嘛！
喺利豐做咗成個下晝小丑，離開嘅時候已經超過5點，諗住收工啦，因為呢度搭得車返公司都肯定過6點，你點估到Gilbert講：「荔枝角就最多客㗎喇，見多兩間先。」
冇得say no，過咗去對面長裕街另一間公司，又係冇約人就自己夾硬殺上去，人哋個merchandiser塊面幾黑呀！阻人收工要燒春袋㗎！Gilbert仲要不斷迫人傾啲單，又chok人呢排生意點，好辛苦咁同佢捱咗20分鐘，望下錶已經係5:55分，走啦仆街！我臥底嚟㗎咋！冇得呃OT㗎！
Gilbert：「見多一間，隔離大廈，馬路都唔使過。」
「但係6點喇喎，咪會阻人放工囉！」
Gilbert：「呢行冇咁早放工既。」
真係CLS！好在上到去人哋走咗，Gilbert仲要死纏爛打，捉住人哋公司一個唔關事嘅員工係咁問：「Karen咁早收咗工呀？請問你知唔知邊位同事係跟迪士尼啲單？」
呢位咁黑仔嘅路人甲就答佢：「我唔知呀！我喺度送文件㗎咋，你畀我走啦！趕住買餸呀！」
Gilbert係就係勤力，但我開始明白點解佢同Daniel同期入嚟，職位就低一級，只可以同肥仔風平起平坐，而Cliff同Rick又咁唔鍾意跟佢做嘢。雖然講經驗Gilbert多我好多，但有一樣嘢我可以好肯定，無論作為一個sales抑或其他部門嘅員工，勤力係重要，不過識做人都一樣咁重要，淨係一味死衝死撞，人哋只會話你係牛X，而牛X係上唔到大枱，只可以炒咸酸菜。
好不容易捱到星期一，終於可以同Candy食飯，我刻意講下同Gilbert去利豐啲尷尬嘢緩和氣氛，等佢可以輕鬆啲熱下身，然後我就開始入正題。
「你嗰日做乜喺後樓梯喊呀？信唔信得過我？一齊分擔下吖。」
本來好開心嘅氣氛突然變得沉寂，Candy依然有少少猶豫，但經我不斷講笑又返入正題去降溫，佢終於肯講出嚟：「之前同阿Rick出去見客，佢喺搭車嘅時候係咁掃我背脊，我起碼縮咗3次，頭兩次我當佢冇心，縮開就算，到第3次真係忍無可忍，叫佢唔好掂我，不過阿Rick仲要笑騎騎，嗰陣見完客只係4點，佢竟然話自己屋企喺附近，叫我上去沖個涼唞下。」
「咁......你點答佢？」
Candy：「梗係冇上啦！我話痴線，跟住自己返公司，阿Rick就冇返到直接放咗工，第二日佢打內線同我講返之前一日見客嘅嘢，然後約我再一齊去client visit，又話見一個客好快見完，之後如果唔鍾意去佢屋企，可以去維記或者百佳。」
「你唔同公司告發佢？報警吖嘛！」
Candy：「我有呀，直接搵Daniel講，不過Daniel嘅態度唔係解決件事，反而係不斷質疑我，問我係咪誤會咗，又話阿Rick可能外國讀書返嚟，比較鬼仔性格，所以掃背脊未必有心。」
「外國返嚟就等於性騷擾合法化？叫你開房單嘢有冇同Daniel講？」
Candy：「有呀！Daniel問我有冇證據，例如WhatsApp之類，我話冇，一次係見完客當面問，另一次係打內線電話問，Daniel又問我係咪想報警？但佢好快又封咗後門，話咩『報警就好大件事，你又冇實質證據』，叫我諗清楚先。然後佢嗌埋阿Rick入房同我對質，條友死口唔認有撩過我上佢屋企同埋開房，又話冇印象掃過我背脊，然後發脾氣話以後唔同我見客，唔同我接觸，費事畀人屈性騷擾。」
「咁佢兩個係咪聯手針對你，所以你喺後樓梯喊？」
Candy：「Daniel扮冇事發生，阿Rick就成日冷言冷語畀說話我聽，不過我嗰日喊係因為同屋企人商量唔做，畀我老竇鬧。」
「明知個女畀人性騷擾想辭工都要鬧？」
Candy：「我老竇鬧我冇用，話一係報警，點解要自己辭職，又話後生女少少工作壓力都頂唔到，冇鬼用。」
「你有冇諗過同大佬Louis講？或者......直接搵老闆講？」
Candy：「應該冇用，阿Rick係Daniel愛將，因為我哋有啲客喺大陸，間唔中要上去visit，而Daniel因為結咗婚唔想上去，肥仔風都唔想上，反而阿Rick就次次幫佢兩個頂，如果真係炒咗阿Rick，Daniel佢哋就要自己返大陸，你唔好睇阿Rick成個擦鞋仔咁，佢係擦得好中，你留意下Cliff同Rick都鍾意擦鞋同附和，不過佢哋錫阿Rick多啲，好明顯㗎！你做落就睇得出。」
「咁你打算點？繼續做？其實一份工啫，尊嚴同埋啖氣緊要好多。」
Candy：「其實呢件事都係你嚟之前一個星期左右發生，我唔可以有真空期，唔可以冇嘢做留喺屋企，所以搵緊工㗎喇！你未嚟之前呢，老細畀我哋home office咗兩個星期，我一留喺屋企，阿媽同老竇就鬧，佢哋話我根本係自己偷懶，又懷疑我係畀公司炒咗，結果wfh兩日之後，我要去個朋友屋企繼續home office，如果我而家唔做但又未有新工，可能要日日朝九晚六去大快活坐。」
其實社會上好多人都係冇退路，覺得挫敗同埋冇希望嘅時候，並冇所謂嘅避風港，電視劇太美好，劇情總係唔如意嘅時候返屋企，家人就會開門迎接你，任你喺懷內放聲狂哭，但現實中更多嘅係，當你失意同無助之際，屋企人畀你嘅壓力仲更加大。
或者人嘅本性始終係欺善怕惡，好多父母甚至會將脾氣同埋情緒發洩喺仔女身上，因為佢哋比起外人更加好蝦，而且華人社會好多父母似乎唔太尊重仔女，將自己嘅價值觀硬套上去，將自己想行嘅路硬塞畀下一代，說穿了，有部分父母最愛嘅係佢自己。
遠嘅唔講，淨係講過去大半年，我哋都見到好多人孤單咁站立喺人生交叉點，身後無人，不敢倒下，前路又一片迷霧，乜都睇唔到。
.
.
.
不過唔好意思，Candy忍到，我忍唔到，性騷擾呢單嘢嘅來龍去脈，我決定要向姐夫如實稟報......
＝＝＝＝＝＝
前文重溫
臥底 1
https://bit.ly/2X39FuE
臥底 2
https://bit.ly/2ZCDsf2
臥底 3
https://bit.ly/2X2lBwH
臥底 4
https://bit.ly/3ehXJKZ
merchandiser意思 在 職場沒人教的事- 中文職稱都叫採購 - Facebook 的美食出口停車場
中文職稱都叫採購，但在英文裡面又分為Merchandiser / Sourcer / Buyer 有趣的是每個產業/公司對這些職務定位/期許會不太一樣甚至重疊。來看看專業的怎麼說~ ... <看更多>