（強烈建議Facebook Page讀者睇medium 版，因為啲精選文章連結在入面先有）
［新曲加精選］文章結集兼分類
生日係好東西，好似好過新年。因為新年人人一齊過，但生日好似係屬於自己咁（其實有2000萬人同你一齊生日）。New year resolution 就算啦，但至少每年生日後，我都想「搵啲嘢搞」。哪怕係好無聊嘅事，原本都已經要做嘅事，總之「搵啲嘢搞」
舊年四十歲生日，原本以為好驚天動地，至少買層樓（台灣樓都係樓，龍床盤都係盤）。結果咩都冇。但好歹都係寫呢篇文（四十大壽: 念念不忘，必有迴響 http://bit.ly/2lnU2gF），幾受歡迎。
今年就係呢篇。冇乜個人感想，純係版務。
是咁的，medium係個不錯嘅東西。特別係你啲文多圖多表時，或者想第時拎返出嚟睇時。但除咗冇乜人用，對華文用家支援極少外，仲有個好先天嘅問題：佢不利你睇舊文。已經畀Facebook Page好。但你話想睇返作者啲舊文，你碌得十篇八篇都未必有心機。而且，文章分類亦都比較難。
方法唔係冇，我就整咗。但都幾可歌可泣，用過嘅就知其實都相當唔user friendly。但搞一大輪後都係成功咗。於是乎我就將啲文打包做6個不同嘅結集，順手分埋類（幸好唔使用6個戶口）
當然個遠因係，本人寫嘢比較廣，咩都寫下。但講真，每篇文我都記得好清楚。分類云云，係方便讀者的（仲唔拍手？）。例如你睇我寫金融嘅文，想睇多啲，就自然睇得到，唔會話碌咗幾篇都係講德國足球嘅（十分趕客）。
另外，分咗6個結集後，亦都可以將啲舊文浮晒出嚟，鍾意由第一篇開始睇嘅都可以。唔係好多啫，開呢度一年幾，先150篇左右。每個結集應該二三十篇。
順手講埋，呢度啲分類方法，係後來加上去的。即係我寫嗰時根本冇諗定自己要寫邊類型嘅嘢，但寫落就自然見到係呢幾樣。亦都有啲我以為我會寫嘅嘢（例如科普，或者非足球的德國），最後根本冇寫。所以係先有文，再有分類。
呢度嘅分類方法亦都好人工，主要係符合返我嘅強迫症。最初只得係5類，但見有一類獨大，我就將佢一拆二。另外有一類太多文，我就重新分過，將部份文分落較少文嘅類別。
呢度就係呢6個分類
「職場胃腩」「咪埋雙眼數波波」「瘜肉都市」「身痕文學」「中環鐵塔」「航海家手記」
趕時間嘅睇到呢度走得了。
以下就係呢6個分類解說，順便講下每個類別本人自己推介。希望短期都唔會再加咩新分類。
________________________________________
第一個係「職場胃腩」（http://bit.ly/2lmLrLc），並非抽張慧敏水。呢個系列嘅文其實比較遲出現，我甚至從來冇諗住主打（你可以睇返我以前在其他地盤都唔會主打呢啲）。但推出咗之後幾受歡迎，當然食住條水上。顧名思義，No bullshit，唔係你睇報紙啲19人力資源乜乜講嘅廢話，唔係你老細同你講嘅廢話。人有難處人要搵食我明，但呢度同你句句真。
升學就業點上位點扭加人工，仲有我在職場上嘅高低起伏（其實冇乜高過），或者廢老想當年，都在呢度講。最後，如果寫自己嘅嘢，特別係個人發展個人成長，或者寫文歷程，都會放呢度。
________________________________________
第二個係「咪埋雙眼數波波」（http://bit.ly/2lmLwP0），正係講足球，其實幾趕客。2018世界盃寫得較多，之後就金融或數據文多。正如簡介話齋，仲後生咩，仲同你晚晚通頂睇咩，當然踢法經濟啲，睇數據，睇金融角度之類。唔係球迷都應該會睇得明嘅。
________________________________________
第三個係「瘜肉都市」（http://bit.ly/2lnUNq1），寫香港，金融同職場升學以外嘅嘢。呢度唔會點寫自己嘢。後來我發現，其實我好少寫香港（因為一寫真話必然畀人屌，但我又唔想講大話）。所以勉強將啲飲飲食食賽後報告，同埋影評（未夠班亦未夠文分開一類）放埋落嚟。但呢度嘅主旨始終得兩個：「你班友虛X偽」同埋「你班友戇X鳩」。睇呢度嘅文未必好覺，睇Facebook Page更加覺，加我個人戶口仲覺，識埋我真人包你話絶對係。
________________________________________
第四係「身痕文學」（http://bit.ly/2ln1nNx）。外國嘢，咩都寫下，文學語言歷史科學旅遊政治。本身當然係鍾意歐洲特別係東歐，但在英國讀過書，未能免俗有時都講下。美國冇去過就多數唔講。日本就因為多人睇我會講，韓國反而係我比較鍾意寫嘅。仲有古靈精怪嘅東南亞。同埋我嘅下半場 （應該係），台灣
________________________________________
最後先返到我本行，應該不用多講吧？「中環鐵塔」（http://bit.ly/2lmLZAK）講本地，「航海家手記」（http://bit.ly/2ln1vfZ）講國際。並非IFC外望，唔係講行業秘辛Private Banker溝女明星（請睇「職場胃腩」）或者去食米芝蓮（請睇「瘜肉都市」）。就真係講金融市場，乜都有，偶然講市。偶然101文，偶然畀下冧把但唔包你會中（否則我一早發咗達），主要係提升下你知識水平咋下。
________________________________________
搞咗呢啲咁嘅嘢，再講一句，只係為讀者。
