數碼時代，很多以前的「必需品」都變得不切實際，經典例子是手錶。電話在手，又何須多戴一隻手錶看時間？
但正如吃飯不只為醫肚，戴錶也不再是為了知道現在是幾時幾分。
勞力士話齋，一隻手錶的意義不在於 tell time，而是 tell history。
戴在手上的，對有些人來說，是一個故事。
當然，很多人買錶都沒有故事，純為保值或炫耀，道理就好似唔係個個拖手仔都代表係真愛一樣。一個達叔咁款嘅肥佬拖住 Chi Ling 咁樣嘅姐姐，就是典型一個為炫耀一個為「保值」的例子。當中的所謂「故事」，就只有「各取所需」四個大字。
黐線，故乜 Q 嘢事？大把成功人士都係八舊水買隻膠錶。
係，Lloyd Blankfein 都係戴 Swatch 而已，但是否他做什麼都是對的呢？一個穿著萬幾蚊西裝但戴住幾百蚊膠錶嘅人，其實係另類嘅譁眾取寵。
像 Josh Kushner 就不同了，求求其其已經靚靚仔仔，係一個 disruptive 嘅 VC 而不是守舊的 banker，佢戴到 Swatch 嘅玩味。
吓？Swatch 都咁講究？唔通有人可以影衰 Swatch？
從前有隻狗叫做陸百狗，很喜歡宣傳自己戴膠錶，以為這樣就是貼地這樣就是親民這樣就是實事求是。但當全世界都知道你是一個面皮薄小器自大凡事斤斤計較的獨裁者，又怎會因為你戴 Swatch 而對你另眼相看？要影衰 Swatch 好難，但他做到了。
然後，講到錶，又點可以唔提 PP？
識啲唔識啲嗰啲最鍾意講嘅一句就係，識買一定買 PP 啦。Hello，請問，什麼叫做「識買」？有錢咪識買囉。冇錯，PP 的確係奢侈品中嘅皇者；如果 Hermes 嘅 Birkin 難買，PP 嘅 Nautilus 難買程度就係 Birkin 嘅十倍。產量少，品質要求嚴格，而且有苛刻的教條：如果 PP 真是賞賜一隻 Nautilus 或 Aquanaut 給你而你斗膽轉售出去的話，PP 會立刻將你 blacklist，你以後想買都難。
聽完都想笑，有錢嘅又點會轉售，轉售嘅即係冇錢啦；所謂規矩，咪又係狗眼看人低。
所以話，由八舊水一隻 Swatch，到八十萬一隻 Patek，都沒有絕對的好與不好。
有故事的身外物，才是千金難求。
有個朋友託人找一隻已經停產的 Explorer，死都不要新的，只要當年那隻款，三六九的數字特別細。為什麼？「以前舊老細戴呢隻錶，佢教我做人要留條底線畀自己。前年佢過身，我做人冇晒方向。記得佢戴呢隻錶，搵到佢，我搵番自己。」
有個朋友問我，Marcus，你買 IWC 有冇折？咁多錶，點解要買 IWC？「當年公司送咗隻錶畀我，就係 IWC，嗰年好幾個重要同事都有隻。有一年自己唔爭氣，週轉不靈，賣咗隻錶。一直好後悔，到而家搵得番錢，好想買番隻 IWC。」這位朋友口中的「公司」就是蘋果，唔係美國嗰間，係將軍澳嗰間。唔怪得之，肥佬手上嗰隻軍綠色手錶，咁似 IWC。
有個朋友買咗隻 Panerai 送畀老婆，係結婚週年禮物，但老婆極度不滿。點戴呀？咁大隻。有心買都買隻女裝錶啦，肯定係買完畀自己戴啦。朋友一臉委屈，細細聲話：「你知我唔識呢啲嘢，但隻錶真係買畀你㗎。」你唔係話畀我聽呢隻錶襯我啩？「我覺得個型號幾有意思啫。」老婆看看型號，是 PAM...... 1314。自此，無論上班套裝還是出街牛仔褲，那隻 Panerai 都形影不離。
無端端寫咁多錶，因為我最近收到一隻錶，是當年我送給她的禮物。
「送出去嘅嘢，我唔會收番。」
「隻錶太重，戴住好辛苦。」
錶再重，也重不過一個故事。
