【手套潮流】剪裁編
手套嘅剪裁係主宰住成對手套好唔好帶，貼唔貼手等因素。踏入2019年，手套嘅剪裁又再一步進化。除左大家用開嘅Flat Palm, Roll, Negative 等等。喺升級乳膠嘅同時，亦喺剪裁上作出改進。而近年嘅趨勢就係圖中嘅剪裁。除左圖中嘅Reusch，Uhlsport 及Elite Sport推出呢類嘅剪裁，為大家帶來全新嘅觸感。
呢款剪裁，唔同嘅牌子都有唔同嘅名稱。例如Elite Sport叫Speed Cut，但不論名稱點唔同，實際上都係萬變不離其宗。呢款cutting，以Roll Finger 為設計基礎，但喺改造呢個剪裁可以滿足大家貼手愛好者，而且擁有大接觸面積嘅優點。 屬於幾年前應用於某部份款式 Negative-Roll 嘅升級版。
舊有嘅Neg-Roll 係將乳膠裁剪成Roll Finger嘅形狀，不過將縫線嘅位置由外露式改為內藏式，指位會比傳統嘅Roll Finger 更貼，甚至比傳統嘅Negative 更加貼手，令手套內櫳與皮膚之間嘅虛位更少。換來嘅係更高靈敏度嘅手感，接波嘅時候擁有更強嘅溝通感。而且呢款剪裁乳膠即使用番4mm規格，但內櫳嘅緩衝層相對一般款式較薄。因為造番正常厚度會令手指更難穿戴。所以手感嘅靈敏度較一般更加強烈。以Uhlsport 為例，內櫳空間比一般部剪裁更細，所以多數買大半碼至一碼。但有一個問題，因為管位做得比傳統剪裁更幼，乳膠弧度更大，所以放鬆手掌時，未必成為最理想嘅接球弧度，而且手指嘅靈活度都係差少少，要握拳嘅時候要用多少少力量。
但今季嘅新剪裁，正正針對呢個缺點以作出改進。首先喺中指及無名指嘅中段 (即手指骨第一二節) 改用半管指狀嘅設計，即手指頂端就用回Negative-Roll嘅形狀。好處係大大改良接波手型弧度，而且提升手指嘅靈活度，手指觸感再比Negative-Roll更加強。當然內櫳之間嘅虛位就更加少，更加貼近皮膚。而食指及尾指強數都係用Roll Cut + Over Wrap嘅設計，而且形狀壓扁少少，你可以想像為一塊過乳膠嘅Negative Cut。提升番靈活度。所以一穿上呢類剪裁，你會覺得比舊有剪裁更加貼伏。而且帶有Roll Finger嘅高接觸面積優勢。接起波上黎有更多嘅溝流感，甚至似冇帶套嘅感覺，因為中間嘅緩衝層較薄，令你接起波上黎精神為之一振。只要手法有番一定程度，就接得穩穩。
如果要為呢個剪裁搵一個缺點，版主覺得乳膠喺指頭位嘅損耗略為高啲，原因係指尖位置係比較做得更尖，接波嘅時候收到較大磨擦力。所以呢類Cutting多數係指尖開始磨損，但指位其他位置嘅損耗程度較兩款傳統剪裁為低。但個人認為以手感及接波穩定性黎講，一定比傳統剪裁更理想。適合追求高靈敏度，手套非常貼手嘅朋友。
Specification
- 別稱: Evolution Negative (Reusch), Speed Cut (Elite Sport)
- 剪裁設計: Half Roll + Negative Cut
- 特性: 高靈敏度貼手剪裁
- 優點: 接波手感靈敏、超貼手、高靈活性
- 缺點: 指尖乳膠損耗較高
希望呢篇文章喺大家選擇手套嘅時候更容易搵到岩你口味嘅剪裁👍🏻
#Glovescutting #超貼手剪裁 #高靈敏度 #剪裁介紹
