【「佛系」生活態度嘅始祖：陪你讀《莊子．逍遙遊》】
終於嚟到DSE中文範文最後一篇啦，徇眾要求陪大家讀《逍遙遊》，希望喺考試前幫到大家。
▍主旨想講乜？
《莊子．逍遙遊》（節錄）係莊子同惠子兩個人嘅對話，標題《逍遙遊》代表莊子佢本人隨遇而安、嚮往自由嘅生活態度。
相信大家都睇過《多啦A夢》，裡面大雄每次自己fail咗，就會發爛咋投訴多啦A夢啲法寶無用。惠子用自己嘅財物大葫蘆同大椿樹大而無用為理由，去請教莊子，其實就係借機串莊子平時講嘢好多FF，聽完都用唔著。
但由於莊子一向chill過比卡超，佢不單止無嬲，仲同惠子講咗兩個故事，教佢如何take life easy，唔好一日到黑諗啲嘢有用定無用。因為佢相信：只要放下執念、順應自然，人嘅思想同周圍嘅事物可以融為一體、相生並齊。去到呢個境界嘅話，「有無用」、「要點用」 人都可以由自然決定。正所謂「辦法總比困難多」嘛，莊子講嘅道理就好似同學平時作文拆題咁，輕鬆啦！
▍物件同比喻
大葫蘆（大瓠）
魏王曾經送過大葫蘆種子俾惠子，佢種咗出嚟發現裝水會爛，用嚟做勺又太大無位擺，結果打爛佢算數。莊子聽到即刻話佢眼光狹窄，個葫蘆大最多咪拎去做浮板游水囉，你打爛咗佢就得返個桔都無。
龜裂膏（不龜手之藥）
莊子同惠子講，有個宋國人家族做洗衣生意，賺嚟賺去都得幾舊金。佢自己研究出一隻醫手部龜裂嘅藥，就一百金賣條藥方俾個客，仲好開心咁同屋企宣佈脫貧。點知個客轉頭就拎去sell吳王，又俾佢咁好彩做咗將軍帶兵打贏仗，仲分到封地。其實莊子就係想講，同一件嘢有人識「用大」，有人識「用小」。
大椿樹（大樹／樗）
惠子終於頂唔順莊子，用一棵生喺路邊、枝幹不規則嘅大椿樹，譏諷莊子講嘢太理想主義，無人會buy。莊子霸氣反駁：「無用又如何？棵樹就算種喺山卡啦，你鐘意可以去散步遮陰，擺喺到又唔會俾人劈，無用又有乜所謂呢？」。
▍時代背景係乜？
經過咗春秋時期嘅長年混戰，東周已經被諸侯群雄割據，七國咁亂（真係打剩七個國家）。莊子出身嘅宋國出咗個殘酷不仁、荒淫無道嘅暴君，宋國更因為咁而被齊、魏、楚三國剿滅。
另一邊廂，各國為咗增強戰力而廣納人才，諸子百家學說喺民間盛行，尤其係儒家同墨家兩派。莊子面對戰爭同百家爭鳴嘅亂世，主張反其道而行，順應自然、無為而治，勸人唔好捲入任何政治爭端之中。
▍作者係邊個？
莊子（約前369年－前286年）姓莊名周，即係發夢自己係隻蝴蝶嗰位莊周。佢係道家思想嘅代表人物，承繼前輩老子。莊子思想嘅特色就係「無為」同「反戰」，同當時好多爭名逐利、為貴族服務嘅讀書人相反。相傳楚國國君曾經重金請莊子做佢相國，但最後都俾佢派卡。
因為對莊子嚟講，心靈快樂逍遙比名利更重要。佢選擇喺漆園做管理員，平日除咗觀察園內動物嘅行為，就係同佢老友惠子傾吓人生哲理，識嘅其他人亦都只係平凡嘅市井百姓。雖然係咁，但佢卻可以喺各種相遇中，重新思考「得失」、「利害」呢啲觀念，所以到終老一刻依然無拘無束。
▍重要句子（具背誦價值）：
「夫子固拙於用大矣。」
「今子有五石之瓠，何不慮以為大樽而浮乎江湖，而憂其瓠落無所容？則夫子猶有蓬心也夫！」
「今子有大樹，患其無用，何不樹之於無何有之鄉，廣莫之野，彷徨乎無為其側，逍遙乎寢臥其下？不夭斤斧，物無害者。無所可用，安所困苦哉？」
▍小知識：
漢朝初期文、景二帝創下嘅「文景之治」德政，其實就係開國以來採用道家「清靜無為」思想治國嘅結果。「無為而治」嘅特色係順乎民情、與民休息，著士兵回鄉耕田生產、只徵收低稅，而皇帝本人亦過著樸素嘅生活，因此國家能夠安定繁榮。但事實上，莊子嘅政治思想更接近無政府主義。
============================
#DSE範文 系列：
#1【賄賂敵人只會令自己滅亡：陪你讀《六國論》】
https://goo.gl/xnpwiV
#2【想溝女定為國為民？辛棄疾《青玉案•元夕》】
https://goo.gl/mwBBty
#3【如果有得打三國無雙，蘇東坡一定會用周瑜：陪你讀《念奴嬌•赤壁懷古》】
https://goo.gl/sNNxWV
#4【如何情緒勒索你老細：諸葛亮《出師表》】
https://goo.gl/dsxGXM
#5【面對無恥強敵，弱國只能強硬應對：陪你讀《廉頗藺相如列傳》】
https://goo.gl/3Pjvz4
#6 【寧為玉碎，不為瓦全：陪你讀《魚我所欲也》】
https://goo.gl/KtqE4i
============================
"Oh Readly?" - Flip a page everyday.
#一班鐘意睇書又想荼毒大家睇書嘅90後
#多多指教
============================
有文學野想分享？
歡迎各位Reader Inbox我地🐱
dse中文範文 在 [DSE/日常學習] 中文卷一12篇範文點讀？每篇都要 ... - YouTube 的美食出口停車場
[ DSE /日常學習] 中文 卷一12篇 範文 點讀？每篇都要背？ DSE中文 筆記公開！！字訓真喺要每隻字都溫？長題目點答？5**醫科生分享（免費筆記Giveaway！ ... <看更多>