//支持本page請Click入內文比Clap，Medium會員請直接Click入去睇內文，謝謝！//
區議會選舉臨近，幾乎所有飯民、黃絲、左膠、和理非都將所有希望擺響呢一場選舉上面；而政府先後批准朱凱迪、岑敖暉、梁國雄等曾被DQ及敏感人士入閘，更令「血債票償」派士氣大，認為今舖一定可以食住人血饅頭響區選奪過半議席，再乘勢透過立法會、特首選委大勝而搶奪政府控制權──結果而家選舉事務處就兜巴星打過黎，話你聽「區選狗窿」仍然存在，而黃之鋒就係已被終身剝奪政治權利。
但係面對呢項共產黨破壞民主嘅粗暴手段，飯民嘅回應係咩？民主黨今日稍早時間話要同建制派不分黃藍，「促選舉管理委員會同廉政公署介入，採取一切可行措施，確保區議會選舉可公平公正進行」喎──即係人地呢頭剝奪你選舉權，果頭就叫人介入選舉「確保公平公正進行；呢頭人地叫和勇合一，你飯民就叫黃藍不分，呢個世界，有無咁撚荒謬？
飯民和理非響呢場運動入面成日叫人唔好中計，話特區政府而家最唔想區議會選舉搞得成，所有人都要忍辱負重，等區議會選舉議席過半，到時就能夠響建制內對政府進行反擊──但佢地卻唔明，真正中計嘅根本就係飯民自己──一個由共產黨精心設計出黎嘅選舉制度，有可能會比倒機會你奪權咩？係咪發夢（唔係抗爭果隻發夢，而係以為自己可以執政果隻發夢）發到傻撚咗？
之前我響〈獨裁者的進化與再進化〉一文經已講過，好多飯民KOL同一班蛋頭學者仲響度執住本舊書《獨裁者的進化》，9噏埋啲咩「混合式政體」（香港大學經濟金融系助理論師阮穎嫻就係呢個Jargon嘅代表，但成日解錯），話根據過往歷史經驗，響一個不公平嘅選舉制度之下，反對派仍然係要參加選舉用盡議席資源去抗爭，但佢地卻唔明白：
獨裁政權亦一早已睇穿你呢籠嘢，就係會一方面比一個錯誤嘅希望你浪費精力陪佢玩，另一方面透過「選舉狗窿」將真心抗爭嘅激進派篩走，只保留一堆一味喉住議員份人工同利益嘅呃飯食政客留響議會，透過叫你不斷跪低消磨你嘅意志，最終成為「呃飯食嘅民主派」，亦即係「飯民」。
DQ黃之鋒其實係有一個非常重要嘅象徵意義，就係話你聽邊個人可以選、邊個唔可以選，個話事權從來都係中共手上；今日可以比朱凱迪你選區議會，聽日一樣可以唔比你選立法會；你以為區議會過半、特首選委會多百幾票就可以選倒個飯民代表特首出黎？我政府DQ哂你所有飯民屬意嘅候選人，只係比葉劉李慧琼你揀都仲得！
而家個情況陰毒之處，就係絕大多數人都入倒閘，偏偏只係DQ黃之鋒一個，咁你飯民反唔反檯？喂大佬，區區一個議席被DQ之嘛，而家講緊選緊四百幾個議席喎，梗係唔反啦！最多黃之鋒呢個血債，咪用選舉黎票償囉！
哦，咁得勒！當政府知道你飯民張底牌，咪將「參選權」呢個狗窿愈整愈細囉，今次DQ黃之鋒你唔反，下次立法會我又再一次DQ哂啲本土自決派──喂今次參選班友為咗入閘，經已全部推翻哂自己過往啲支持港獨同自決主張，根本已係一種自我審查，而家黃之鋒被DQ，好多時事評論員竟然夠膽死話一早如意料之內！點解我地面對梁天琦陳浩天被DQ，再經歷DQ4、DQ6，然後香港政客嘅反應竟然會係「將個頭DUP低啲，咪捐倒入個狗窿入面囉」！
而我想話最撚諷刺嘅卻係：
1. 今次政府只DQ黃之鋒，卻係放咗根據往績應會被DQ嘅敏感候選人如朱凱迪入閘，其實就係因為勇武派之前幾個月嘅衝擊嚇驚咗特區政府，所以先退番半步作試探──你班黃絲支持嘅候選人入倒閘，其實係應該叩頭多謝勇武派用血換番黎嘅成果；
但一班食住人血饅頭嘅和理非原教旨KOL，卻係掉番轉抽勇武派後腿，叫人臨近選舉唔好再搞破壞影響民情，甚至猛作鬼故意圖將所有「過激行為」定性為臥底所做，否定勇武派冒死抗爭嘅價值；之後又不停吹淡風，借同情年輕人為藉口不停叫人散水，變相孤立勇武派送佢地去死。
恩將仇報，狡兔死、走狗烹莫過於此。
2. 成班飯民KOL不停吹風叫抗爭者響選舉前唔好再衝擊，原因就係唔好比藉口政府無限期推遲甚至取消選舉，但當我問一個飯民中人，假若政府真係取消區選，咁佢地會點？
「咁就無辦法啦，選都無得選，就算最溫和飯民都唯有衝上街頭全面同政府攬炒啦！」
聽完呢個答案真係笑出聲，原來飯民成日叫人含撚投票、抗爭唔好去到盡，只係因為「議席」呢個希望仲未幻滅！即係話掉番轉如果抗爭者真係迫到政府取消呢場假民主選舉，反而仲會堅定咗呢班原本呃飯食嘅飯民主派反抗政府嘅決心！
對於中共黎講，區選大敗佢地都仲有大把行政手段影響選舉結果或者陰乾區議會權力；但區議會如果選唔成，卻反而係令最溫和嘅飯民都會響抗爭中覺醒。咁你話佢地想唔想選？
站在勇武派立場，選舉搞得成就會比人當鬼；選舉搞唔成的話，反而真係可以迫到和勇合一，杜絕分化！
呢個世界，就係咁撚荒謬。
