[方以文問兩句][吳偉豪][開心速遞][Part 2]
[Part 1呢度 >> https://www.facebook.com/…/rpp.105932475…/2376582919072406/… ]
‧
‧
吳偉豪喺2015年無綫第28期藝訓班畢業之後，咁啱遇着新處境劇《八時入席》開始籌備，唔少同期同學仔一齊入劇組，其中有固定角色嘅包括咗周嘉洛、吳嘉儀、邵珮詩，而吳偉豪Ricco就做King Sir鍾景輝個孫，仲有份拍opening㖭。不過等咗好鬼耐，都唔見吳偉豪個角色禾仔出場。
‧
‧
「個個都話sit-com係訓練基地，而我就真係非常之好彩，《八時入席》又有份參演，依家《開心速遞》又繼續演緊。嗰陣知道自己入咗《八時入席》，但就唔知個角色幾時出現。初初就有人同我講話三十幾集就會出現嫁喇，但過咗三十集都冇出現。跟住又話四十幾集會出現喇，然後又話五十幾集、六十幾集。跟住再等多陣、等多陣。呢段時間我諗暫時係我演藝生涯裡面最灰嘅一個時期。因為嗰陣時個期已經mark咗我要拍《八時入席》，其他劇就唔會book我。冇嘢做，我又唔知自己幾時可以喺《八時入席》出現，經過咁長嘅時間，我嘅自信心就跌到去最低最低。我個人覺得自己喺《八時入席》嘅演出係做得好差嘅。」
‧
‧
《八時入席》演得差，Ricco話唔係因為等得耐冇咗自信心，而係因為個環境太陌生。「人又陌生、事又陌生，返工嘅環境又係好陌生。嗰陣時我係又驚又緊張，又唔知自己做緊咩。依家睇返嗰陣時，我覺得係浪費咗個機會。但係好好彩嘅就係公司畀多個機會我，可以喺《開心速遞》度發揮。我同過自己講，話如果《開心速遞》我都做唔好，我真係係咁先。」對於1998年出世，當時只有18、19歲嘅後生仔嚟講，壓力都咪話唔大。吳偉豪話拍《八時入席》嗰段時間，佢學到同埋經歷到嘅嘢，令到佢個人堅強咗、意志力強咗。演技方面呢？我相信大家都會認同佢有進步。
‧
‧
「依家短期目標係拍好《開心速遞》，做好朱凌凌呢個角色先。長遠嘅目標，我唔係渴望有好多錢、好紅有好多人識我。我只不過係想keep住有戲拍，因為我始終都係最鍾意拍戲，想自己有機會去接觸更加多嘅角色同片種。拍多啲好戲，畀屋企人同埋畀香港嘅觀眾睇。」身為Marvel huge fan嘅Ricco希望有機會演繹一啲有英雄同科幻元素嘅角色同埋電影劇集。
‧
‧
經歷咗《八時入席》嘅禾仔、《開心速遞》嘅凌凌呢兩個乖仔角色，吳偉豪話真係想試吓做奸角。「我覺得自己個樣係生得正氣嘅。如果有機會去演反派，係一個好好嘅機會可以去surprise audience。好多人會同我講，你個樣咁正氣，都好難做奸角㗎喇，但我覺得又未必喎。」Ricco舉例電影《The Dark Knight》裡面演小丑嘅Heath Ledger ，拍呢套戲之前佢係陽光男孩，但成功嚟個180度轉變，由陽光男孩變成暗黑變態，做到珠玉在前都有所突破嘅經典可怕奸角，成為經典。「有時就係一啲咁特別嘅casting，會令到一啲角色咁凸出、咁顯眼。所以我好希望嘗試去做到呢個效果出嚟。」
‧
‧
電影《新警察故事》裡面嘅吳彥祖，都令到Ricco睇到演員嘅無限可能性。「呢套戲之前，吳彥祖接觸嘅角色大多數都係好正面嘅，而喺呢套戲佢係做一個好反派、好反叛、好曳嘅一個死靚仔。佢外表係好正氣、好正面，但佢做奸角真係好好睇，我希望我可以做到佢咁樣嘅效果。我真係好鍾意《新警察故事》呢一套戲，而因為呢套戲我細細個就認識咗吳彥祖，仲因為呢套戲而鍾意咗佢。」
‧
‧
你有冇睇到Ricco嘅IG有佢野生捕獲吳彥祖嘅合照呀？隔住張相都feel到佢勁開心。希望吳偉豪佢繼續努力，眼前就做好朱凌凌先，打好基礎，之後一步步向目標進發。喺呢度要隆重咁多謝Ricco抽時間咁用心答我呢個問題觀眾嘅問題，亦都多謝大家睇咗咁多字。一齊繼續支持吳偉豪啦～
‧
‧
[同場加映：吳彥祖 與 吳偉豪] https://www.instagram.com/p/BUb6OjkAsQ8/…
‧
‧
#方以文問兩句 #吳偉豪 #朱凌凌 #開心速遞 #林禾 #八時入席 #D28K #無綫 #TVB #吳彥祖 #新警察故事 #DarkKnight #Joker #HeathLedger
