唔經唔覺，原來今日，6/4/2020，係足球財經專頁開張一周年，點都要寫幾隻字紀念一下。
當初開呢個 page 其實完全無任何計劃，純粹舊年今日（我仲記得係一個禮拜六朝早）見到某份本地報章報導 17/18球季曼聯係Big6唯一一隊蝕錢嘅球會，“因爲山齊士人工太高”。作為一個曼聯球迷（其實各位讀者都知架何？Page info有寫架，希望唔會引發Unlike潮啦下…），兼一個留意咗曼聯財務狀況二十年（真係格拉沙私有化曼聯之前已經每年咪份年報）嘅會計師，睇到篇論述錯到離哂大譜嘅文章，就梗係眼火爆啦，谷下谷下谷到當日晏晝，趁個囡瞓晏覺就把心一橫開個 page 寫篇文章，整埋圖表講下Big 6 各隊收入結構(https://s.fanpiece.com/Ts20ErL)。
開得個page就梗係想有人睇，於是就喺自己個人FB戲稱自己踏出成為KOL第一步，邀請各位朋友like個page. 話說我舊年本命年犯太嵗(係呀，我今年就快37，應該無人估我25啩?)，睇流年師傅都話我犯小人，估唔到一個自嘲post 都會觸動到某D向來睇我唔順眼嘅小人(師傅點解你唔批我會發達？)。不過，你越係想搞我，我就越係唔衰得，於是一個禮拜之後，我決定上 Fanpiece 開個專欄，等自己嘅文章可以更多人睇之餘，仲可以一邊寫一D我自己有興趣嘅題材而又揾到少少奶粉錢。雖然唔多，不過都真係要多謝呢位小人嘅小動作，推動我更加認真經營個專欄。
認真還認真，D會計財經野始終比較冷門，我想寫都唔代表有人想睇，加上自從中學畢業之後，我都好少用中文寫文章，點樣令到D題材寫得無咁悶，對我嚟講都係一種挑戰。再加上莫講話曼聯以外嘅比賽，就連其他球隊嘅新聞我都唔係太經常留意，齋寫曼聯財務可能一個月都寫唔到一篇。為左可以寫多D唔同題材，呢一年我真係睇多左好多相關資訊。
最初幾篇我從英超 Big 6 嘅報表去講球會幾項收入來源同支出，每篇大約兩三千hit rate. 去到舊年四月尾曼聯狀態開始下滑，有曼聯迷朋友討論無歐聯踢會損失幾多，引發我去計條數出嚟去寫篇文(https://s.fanpiece.com/Gc6FHks)，反應出奇地好，有成過萬個 click. 之後有過幾個禮拜，傳出曼城可能會被罰禁止參加歐洲賽(https://s.fanpiece.com/8BXPwad), 今次直頭接近萬五個 click. 喂，原來香港人真係鍾意睇人仆街架喎!
當然，無可能篇篇都寫人點仆街。雖然我本人係忠實曼迷，但我開呢個 page 本身係想用自己少少專業知識客觀地去睇唔同球會嘅情況，於是，我又寫左篇講利物浦呢幾年點樣越來越走上正軌(https://s.fanpiece.com/p0kQP8W), 越寫就越灰，因為發現利物浦真係好對路。
寫左幾個月，發現原來足球財經話題冷門得嚟，都有唔少朋友有興知多D，而本地主流媒體好多時報導呢類話題時往往都有唔少謬誤亦係點解我想走出嚟講多幾句嘅原因。同時，亦有幸分別獲得 體嘢 SportsYeah 同 球迷直播室 邀請，上佢哋嘅網台節目分享，提升左呢個 page 嘅知名度。
好記得上體嘢節目時主持 Eric 問我覺得曼聯會唔會爆煲，我話曼聯爆的話，應該整個歐洲足球圈都會爆埋一份，而我仲話要去到“冚球剷”呢個地步，可能要爆發疫症會發生。估唔到唔使一年，我竟然開口中。足球以至全球各個行業正面對自二次大戰以來最嚴峻嘅困境。之前一路話歐洲足球喺幾個新興市場仲有好大發展潛力，轉個頭連最頂級嘅球會都面臨收入全面停頓。足球，喺呢個時候，重要性相對抛諸腦後；但係足球財經，對球壇各個持份者嘅重要性，就突然變成關乎生死存亡嘅課題。
喺香港，留意足球嘅人好多，從事金融會計專業嘅人亦都好多，識得金融會計而又鍾意睇波嘅人，當然都唔少。睇波，有人鍾意順便睇下波鞋，有人醉心研究戰術，而我，只不過比較有興趣了解球隊營運背後嘅情況。我從來都無從事足球或體育行業嘅經驗，呢一年來發表嘅文章，只不過係集結左我留意到嘅營運狀況同數據，利用我少少嘅知識作有限度嘅總結同大家分享，談唔上D咩獨到見解，更加談唔上做咩KOL (一早都話係自嘲，點Q估到有人會咁認真).當初我都以為自己寫幾個月就會乾塘或者失去興趣，家陣過左一年都仲玩緊，算無錯咯。
最後，老土D都要多謝各位讀者支持，每次有朋友留言交流意見，其實我都好高興我寫D悶棍嘢竟然有人睇，希望各位繼續支持，同埋 click 多幾下我喺fanpiece d 文，幫補下小女D奶粉錢，大家可以上 https://football.fanpiece.com/FootballFinance/ 睇返我以前寫過嘅文，多謝各位！
click rate中文 在 網路行銷零元本鋪- 常被誤用的名詞CTR vs CR 一般在廣告操作中 的美食出口停車場
一般在廣告操作中，我們會很在意的一個KPI就是CTR（Click-through Rate，中文常講『點擊率』），因為這是一個廣告成效的初步，不論是在CPM或是CPC計價情況下，尤其是CPM， ... ... <看更多>