堂堂一家高檔意大利餐廳，竟然也看到情侶之間互相餵食的場面，wtf。
「BB，」女的用了一把極度低能的聲線，「我呢個 beef tartare 好食呀，你試唔試吓？」
「好呀，」男的說，準備用自己的叉子試一口。
「唔準，」女的大聲喝了一下。
點呀，又叫人試又話唔準，係咪上身呀。
「等我餵你，」女的又突然變回那把低能聲。
屌，C9S。
「你諗緊嘢？」坐在我對面的女生把我從沉思中拉出來。
「哦，冇嘢。」如果坐在對面的她要餵我，肯肯定我會即刻叫埋單。
絕對唔係佢有問題。
你看她，頭髮吹得一絲不苟 (隱約傳來的噴髮膠香味讓我懷疑佢甚至專登去咗 salon 整頭)，加上身穿一襲 Alexander McQueen 連身裙 (雖然係上一季但我認得前面個大蝴蝶)，還要最重要是，她比我細一個圈——唔係條腰，係年紀。
但當你要體現的是最老土那三個字——談戀愛，那麼，事情就決不是攞個 check list 出嚟剔剔剔咁簡單。要樣有樣又如何，不是你杯雪糕就不是你杯雪糕。
一杯你的雪糕，或者一個你會跟她談戀愛的人，是怎樣的？
好簡單。
就好似坐喺我隔離嗰對情侶咁：一個明明，一個偏偏。
明明。
是對方懂得做的事。
你卻偏偏。
要為對方做。
明明你識自己食飯，我就偏偏要餵你食。
明明你識自己綁鞋帶，我就偏偏要跪低同你綁。
仲有，and this is my favorite。
明明你識自己繑頭髮去耳仔後面，我就偏偏，要珍而重之咁，幫你繑。
然後，就在這時候，侍應端上了一碟紅蝦意粉。
把蝦頭的膏壓出來，叉子在碟上轉了三個圈，一啖，oh my god，終於開竅了。
第二天，我專程去都嗲利街找我的雪糕。
「咁啱嘅？」我交戲。
「你點知我喺度？」她驚訝。
「靠運氣，」我邊行邊說，她走得很快。
「Save you luck for something else that matters，」她晦氣。
「There is nothing else that matters，」我誠懇。
「你想點？」
「問你攞啲嘢，攞完就走。」
她竟然停低。
「講，」佢冇尾音，「攞乜。」
「一個機會囉，」我有尾音。
「For？」她。
「我想畀啲嘢你。」
「What is it？你而家畀得唔得？」
「唔得，要上我屋企先畀到你。」
「你估我信唔信？」她冷笑。
「我估你唔信，」我真心，「but I am serious。」
我們站在新世界大廈前面，她盯著我，我沒有迴避。
「OK，信埋你今次。」
我說了句「多謝」，然後忍不住笑出來；聰明絕頂又如何，就算是愛因斯坦也永遠「敵不過」一樣東西，就是人類與生俱內的好奇心。
那一晚。
門鈴響起。
一開門，站在那裏的她。
沒有吹得一絲不苟的頭髮，只是一條隨意束起的馬尾。
沒有 Alexander McQueen 的晚裝裙，只是一件普通到不得了的粉藍色恤衫。
沒有細一個圈的年紀，只是一杯冷冰冰卻熱辣辣的中女雪糕。
「畀得未？」她站在門口問。
「你唔入嚟，我點畀你？」
「你想搞咩呀？」
「你放心，今晚真係唔搞嘢。」
好奇心驅使下，半信半疑的她脫下鞋子，緩緩走進來，然後被亂到不堪的廚房嚇了一跳。
「你煮嘢食？」
「係。」
「紅蝦意粉？」
「係。」
七年前，她弄了一道紅蝦意粉，我吃完之後，說 Da Domenico 都可以收檔。
當時我問她有什麼秘訣，她說反正我也不會認真記起來，不說也罷。「教我啦，我真係會記住，好快整番一次畀你食。」
想不到，快極都要七年。
記住要用 brandy 爆香啲蝦頭，好多人用普通嘅酒，香味差好遠；意粉一定要用 Voiello，其他牌子冇嗰種煙韌；落鑊嗰陣，要連埋蝦頭一齊煮啲意粉，就算已經唧晒啲蝦膏出嚟都要擺埋蝦頭落去。
「我有冇講錯？」
有時好難了解女人，佢聽到你覆述一次佢以前講過嘅嘢，竟然可以無啦啦眼濕濕。
「記到冇用嘅，」她清一清嗓子，「食過先知。」
「我真係不斷苦練㗎，你入去洗手先啦。」
就在她離開視線範圍之後，我極速地來了一招偷龍轉鳳。
隆而重之的坐了下來，珍而重之的吃了一口。
咀嚼半晌，眉毛輕揚。
「喺邊度買番嚟？」
「你......你話啲紅蝦......定......定係啲意粉？」
「我話呢碟嘢，係邊度叫嘅外賣。」
「吓？你講嘢咁難明嘅。」
「你唔講我而家走。」
「Giacomo…...」我的叉子在面前這碟意粉不斷打圈。
「你嗰碟先係你煮？」
面對著愛因斯坦的腦袋，我除了微微點頭，也不知道該如何反應。
她緩緩地站起來，走過來我的旁邊，拿走我的叉子，在碟上轉了兩個半圈，然後把意粉放進口中。
「我真係有苦練過，不過你知你啦，咁高要求，所以我咪......」
還未說完，便被那雙輕軟的嘴唇......制服了......原來紅蝦油加熱情果味潤唇膏的味度是這樣的。
「好食，」她說。
「你話意粉定係我個嘴？」
「意粉。」
一個你會跟她談戀愛的人，是怎樣的？
就是有些事，她明明懂得做，你偏偏要幫她做。
然後，你明明做得不好，她偏偏覺得你是最好。
「你頭先喺門口講嘅嘢...... are you serious？」她看著我問。
「我講過乜嘢？」真的想不起來。
「你話，今晚真係唔會......」
「哦！」
梗係 serious 啦，seriously joking。
alexander mcqueen鞋子 在 ALEXANDER MCQUEEN 鞋-PTT/DCARD討論與高評價商品 的美食出口停車場
ALEXANDER MCQUEEN 鞋 在PTT/DCARD討論網購與高評價商品，提供ALEXANDER MCQUEEN鞋子、ALEXANDER MCQUEEN鞋帶、ALEXANDER MCQUEEN鞋子增高優惠價格，找ALEXANDER ... ... <看更多>