關於 pnd九龍城 ，我們在網路上蒐集到這些相關的討論、資訊與評價

New💕【必食活龍蝦刺身丼+吉列和牛三文治！】啱哂慶祝去食！
-

呢間日本餐廳主打高質串燒、丼物、廚師發辦、壽司刺身及拉麵等，啱哂大時大節食餐好嘅慶祝。想食Omakase可以揀坐吧枱，可以欣賞師傅製作料理，呢度有3款廚師發辦：14貫 $980 (季節刺身3點&壽司11 貫 )、壽司 10貫 $680 及 壽司 6貫 $380，包前菜 、魚湯冰見烏冬同甜品㗎喇。

-

必叫items有《吉列佐賀牛三文治》分為兩件/四件版本，厚切A4佐賀和牛西冷入口油脂勁香，質感鬆化又無筋，包炸麵炸至5成熟，入口時仲係非常酥脆，值得一食呀！


-
3款招牌打卡丼飯：《龍蝦雜錦刺身丼》、大廚席前招待倒至滿瀉《三文魚籽葱吞拿魚腩丼》同埋用A4佐賀和牛西冷整嘅《火炙和牛丼》，丼飯同壽司都用咗日本越光米製作，配合赤醋、三温糖、瀨戶內海鹽、日本煮酒調味嘅丼飯非常高質。
-

尤其係《活龍蝦雜錦丼》，每日用限量供應+新鮮到港嘅活龍蝦即叫即做，龍蝦刺身肉質極鮮甜，出面好少可以食到～再配埋肥美嘅赤身、中拖羅、日本赤海膽、醬油漬三文魚籽同帆立貝柱，呢個丼人生中一定要試一次！
-

想飲Sake當然要叫返一兩串串燒試吓，推介梅醬紫蘇雞肉串、北海道赤豚五花腩芝士明太子串、鹽燒A4佐賀和牛牛肋肉串等，都係咸咸地又惹味嘅首選。

-

鳥十TORITEN
地址: 九龍塘達之路80號又一城G25號舖
電話: 23378223
星期一 至 星期日：11:30-22:30
#PND日本菜 #PND九龍塘 #PND九龍城

New💛【旺角新店！$30超抵食海南雞飯 / 泰式豬手飯】仲有$12青木瓜沙律+$18芒果糯米飯！
-

旺角新分店聽日開幕！以後去旺角又多一間好嘢食～本身位於新蒲崗嘅超高性價比隱世海南雞飯店再擴張，繼續只賣4寶：海南雞(飯、原隻雞)、泰式豬手(飯、例牌)、青木瓜沙律、芒果糯米飯，做到咁專，所以味道有保證！
$100就可以買哂全個menu：2個飯+1個沙律+1個芒果糯米飯，價錢貼地。
-

跳樓價《泰式海南雞飯 $30》，海南雞去哂骨，入口好嫩滑，連啲雞皮都好滑，而且起碼有例牌嘅份量，最鐘意佢地自家調製嘅兩款酸辣海南雞汁、泰式青醬，除咗用嚟點雞食，用嚟撈埋有香茅同檸檬葉香嘅黃色雞油飯仲勁惹味，Jeng shit！
-

另一超值$30飯有《泰式豬手飯》，飯底同海南雞飯一樣味，分量一樣咁多，唔同嘅係主角換上惹味嘅件件泰式豬手！豬手煮得軟稔入味，入口有啖啖骨膠原感覺，仲食到鬆化嘅豬手肉添。
-

仲有《青木瓜沙律$12》用一個細杯裝住，大概係1人份量，車厘茄同新鮮青木瓜絲口感好爽好fresh，加埋少量炒過嘅花生粒，入口香脆，沙律味道酸辣酸辣勁開胃。

-
必食驚喜甜品《芒果糯米飯 $18》兩款雙色糯米飯已經調好味，食落有少少暗甜，煙煙韌韌 ，加埋椰汁同甜甜地嘅芒果肉，及得上九龍城果面嘅出品，最重要係睇埋價錢就真心值！
-

曼谷水門海南雞飯
電話：98758389（旺角店）
星期一至日：12:00-23:00
地址：旺角通菜街1A-1L威達商業大廈地下 / 新蒲崗衍慶街29號地舖
#PND旺角 #PND新蒲崗 #PND泰國菜 #PND外賣
#PND小食 #PND黃幫襯

💛【100%泰國風味九龍城泰菜！】屯門/元朗都有分店！

-

佢地主打泰北菜式，所有菜式、醬料都係由泰籍廚師親自調製，必食items唔少得咖喱炒蟹、泰式明爐魚、檸檬燒牛肉等等，樣樣都又抵又好食～既然暫時去唔到泰國，一於執九龍城頂住檔先！

-

惹味菜式唔少得《肉碎生菜包$65》酸酸辣辣夾埋生菜食好開胃～你一啖我一啖好快食哂嘅《泰式鹽燒盲鰽魚$138》，鹽燒嘅盲鰽魚外皮香脆，打開裡面啖啖勁嫩魚肉，點埋自家製泰式青檸汁辣醬食，絕對係必食！
-

仲有《招牌檸檬燒牛肉$123》啱哂想食肉又怕肥嘅你，檸檬燒牛肉燒到有少少炭香味，入口juicy又粉嫩，堆成一座牛肉山，點埋泰式酸辣汁同夾埋蒜片食好重口味！
-

各式泰式串燒(豬、雞$14/串、牛$16/串) 燒得好香口，串串肉都好惹味，仲有肉汁，特別係燒魷魚，超級嫩口！吖埋真材實料嘅芒果沙冰，落足勁多呂宋芒果打到勁杰身，或者叫埋最解暑嘅原個西瓜汁一邊飲一邊食埋啖啖西瓜肉！係爽嘅！
-

泰發泰國餐廳
星期一至五：15:00-02:00
星期六至日：12:00-02:00
地址： 九龍城城南道8號東昇閣地下/屯門盈豐商場地下A15號舖/元朗鳳群街2號年發大廈地下3-4號舖
#PND九龍城 #PND元朗 #PND屯門 #PND泰國菜