《聖杯騎士》：當啲女都比你Christian Bale溝哂，唔明仲有乜嘢咁空虛
多謝著名影評人兼舊同事 七城影頁 葉七城先生贈票，有幸兩條麻甩佬走去睇當代文青無可能錯過嘅大導Terrence Terry Malick嘅最新大作《Knight of Cups》。老實講起初一見個中文名叫聖杯騎士，然後卡士又有Christian Bale+Natalie Portman+《Carol》女主角Cate Blanchett+《Slumdog Millionaire》女主角Freida Pinto再加我好鍾意嘅安奧尼奧班達尼斯──咁嘅史詩式奇幻片仲唔開正我果範！點知葉七城先生之後好心提點我，呢個導演自從上次套《永生樹》（我成日將個名同《再生號》撈亂）標童上身之後，佢拍嘅嘢就再無人明……
然後作為一個庸俗凡人，起初以為呢啲完全搭錯線嘅導演照理應該係第一次睇佢嘅作品，咪當見識下囉，點知搵搵下原來當年一早已睇過佢套《狂林戰曲》當年辛潘搭佐治古尼呢個組合又係勁到爆炸，但套嘢完全係fake人：明明睇啲Trailer係史詩式戰爭片，點知最尾成班軍佬響度探討人生意義──似乎搵大明星君尻觀眾呢條方程式，一直係Terrence Malick嘅「首本名曲」。
同Friend講《Knight of Cups》呢套戲，最好就係由佢點拍開始講起。話說Christian Bale接咗套戲之後，Terrence Malick係連一頁劇本都無比佢睇，而只有條大橋同幾句對白；至於其他演員亦最多比咗幾頁簡單對白劇本參考，然後就叫佢地「自由」演繹：然後Christian Bale講到明佢根本想像唔倒會演咗啲乜出黎，而事實上《聖杯騎士》嘅後期亦足足做咗兩年先剪得成出街──但唔緊要啦，剩係咁嘅戲你都走去睇，經已拋窒哂你身邊啲文青Friend啦係咪？
響場戲結尾，有位影評人（唔係葉七城先生）走咗出黎為套嘢解話，因為我真係好想知其實套戲up乜，雖然急尿都好有耐性聽佢講哂《Knight of Cups》點樣借用咗聖經詩歌（其實仲有柏拉圖）去演繹「放逐與救贖」（如果無記錯）呢個主題，但老實我真係全無同感。如果問我用一句講完套戲講乜，就係一個食盡美女嘅有錢型男嘅無病呻吟。
基本上你一聽上面果個拍法，你都可以預期成套戲會拍到散修修；但其實全片分成七個Chapter，每一個都牽段一段情做主題，如果個導演有啲心機的話，係可以用少少功夫將成套戲串起來的，但佢就係有佢藝術家嘅堅持，就係要由套戲散修修，就係要等啲演員自己唔知做乜，就係要個個演員都用難頂到嘔嘅文青腔獨白，咁都無計。
唯一安慰嘅係，其實成套戲嘅焦點擺哂響Christian Bale度，佢絕對可以好似李安納度響《Revenant》一樣Chok住來做；不過Christian Bale最終都係入型入格演到成個道友咁嘅頹廢樣出黎，算係配合倒套戲嘅氣氛之餘，亦無出現搶戲情況──只係有時佢個形象實在太「透明」，搞到有時我都懷疑套戲其實係咪抄緊《The Sixth Sense》……
講就講到套戲幾差下，不過即使響唔係好夠訓嘅情況下，我竟然都可以好精神無恰著之下睇哂，點解呢？首先係因為戲就爛，但取景同運鏡就堅係一流，無論係入面果啲長鏡、遠鏡，定係響鬧市同荒野之間嘅場景轉移，然後葉七城先生就提醒咗我呢套片嘅攝影就係金像獎三連霸，《Gravity》、《Birdman》同《Revenant》嘅攝影大師Emmanuel Lubezki。佢同《毒裁者》嘅Roger Deakins，都有用攝影將電影等級提升嘅神奇功力，就好似好多日本電影鏡頭行先咁……睇黎有時間都要追番佢地啲作品黎睇。（依樣係葉七城先生專業，期待佢響之後嘅文章或者網台節目會講多啲）
至於另一個原因，就係因為《Knight of Cups》七個Chapter入面，總會耐唔耐攝條女入去比你睇下。除咗頭先講過嘅Natalie Portman、Cate Blanchett同Freida Pinto，仲有Isabel Lucas（雖然無乜出樣）、Imogen Poots、Teresa Palmer、Nicky Whelan（出左少少）全部都係S級美女，當中仲有幾件半裸添。睇見一堆靚女出場的確係賞心樂事，但然後你就更加難以代入套戲入面……大佬，啲女都比你食哂，你仲有乜撚嘢咁空虛呀？
isabel lucas 在 COVID-19 denying actress Isabel Lucas reveals ... - YouTube 的美食出口停車場
Former Home and Away actress Isabel Lucas has once again shown her true anti-coronavirus colours. The Byron-based actress revealed in an ... ... <看更多>