(轉)
被捕消防員家書(完整版)
新消文青聯投稿 #025
《家書》
「行得上台就唔好怯呀！怯，你就輸咗成世。」
呢句台詞，為人所津津樂道。但係放諸今日嘅香港，恐怕只淪為「道德概念嘅堅持」。
我係一名公務員，某人嘅丈夫及父親，自去年開始，多咗一個身份：被捕義士。基於比較獨特嘅身份背景（喺被捕人士當中），大眾對我及家人亦份外關注，但坦白講，我，受之有愧。
可能好多人覺得當你越擁有得多，越唔「需要」企出嚟嘅時候，而選擇挺身而出，你必然係一個更英雄更俠義嘅人。對此實在感到相當費解，或者直接尐講，搞錯咗。搞錯，因為我就係唔想失去依家擁有嘅幸福，所以別無他選，唯有企出嚟。可以話，我比任何人都恐懼。我係一個無大志嘅人，「耽於逸樂」係我做人嘅宗旨，但問題係，其實我唔覺得仲可以耽於逸樂。亦有不少嘅香港人以為自己好醒，唔怕得罪講「精人出口，笨人出手」(又其實好多人連出口都懶)：「尐嘢佢哋爭取到我有份享受，輸咗我又無穿無爛。」自以為是地認為坐享其成，實無異於坐以待斃，可笑。
無論覺得有無「需要」，寧願繼續「耽於逸樂」，定仲係抱住「精人出口，笨人出手」嘅想法，簡單總結一句：佢哋認為香港人仲有退路，仲有選擇。
「只有眼前路，沒有身後身」。
根本唔係怯唔怯嘅問題，呢個已經唔係可以選擇去怯定係勇敢嘅場合。香港人如今嘅處境，由23條到送中條例，由國教到最近中史試題風波，由當年新機場玫瑰園連青馬大橋成本1553億，到一條三跑耗資逾1415億......到最近及最「引頸以盼」嘅國安法，其實呢，唔需要望後面㗎啦，懸崖嚟㗎！同埋呢個經已喺腳邊嘅懸崖，會一路崩塌，好似一個有意識嘅懸崖，只會吞噬活人。但其實，佢嘅本質從來就係吞噬萬物，23年啦，你，不過係餐前小吃......
「是決心上的差異嗎？
是豁出性命才能活下來的人，
和一直備受保護的人；
是下定了決心誓要登上巍峨高峯的人，
和一心想住在可以俯覽城鎮的平緩山丘的人的差異嗎？」
香港人，你哋做緊嘅，並非何等偉大甚至高尚情操嘅舉動，其實你哋E家做緊嘅所有嘢，只為活命。如今官司尚在身，此文一出，對我，唔存在利大於弊嘅爭論，絕對百害無一利，日後必定被控方大造文章，取巧誅心，律師方面亦屢次勸戒。但係，我真係唔係一個英雄義士，如此風險，尚鴻筆飛舞，因為任何可以幫到大局嘅機會，我，一定會捉住，以前會，宜家會，將來會，因為：
只有勝利，才有活路。
不但我，你，身陷囹圄嘅手足，所有香港人，如果輸咗，所有嘅犧牲，都不過係預繳嘅付出。唔只200萬人，香港往後嘅所有人，都會死，因爲，已死之地，何以孕育生命？不過呢度要講清楚，嗰套「為咗下一代」、「為咗公義」、「為咗民主自由」嘅論述，事到如今，太過陳腔濫調，不至於嗤之以鼻，但要莊敬自強？定睿智冷眼？還是吮癰舐痔？嘥氣，等你仲呼吸到先講啦……
於我而言，贏，係為咗生存，你，係為自己而活，不用清高。
Do not go gentle into that good night,
Old age should burn and rage at close of day;
Rage, rage against the dying of the light.
睇到呢度，如果你仲猶豫緊應否罷工，參與不合作，甚至表態。我押嘅注，從未喺你身上。
僅以此文給予有生存意志嘅香港人。
被捕消防員
【投稿日期：19-6-2020】
（編者按：以上為會員投稿，對於任何因提供、使用或不當使用、依據或未能使用該等資料所產生或與之相關的任何直接、間接或相應的損失、損害、費用或開支，本會概不承擔任何法律責任、義務或責任。）
#新消聯 #HKFAC
