讀者分享隔離經驗（下）《淋咗嘅旺旺》
——————————Start———————————
係病床上斷斷續續訓左幾個鐘，全日淨係食左中午一碗肉碎稀粥，個人又攰又餓。突然有個著晒保護衣既人行過黎話:依家送你地入隔離營。佢真係話黎就黎，我哋都即刻要get ready。而不幸地，真係入駿洋邨。由醫院到隔離營呢段路程，係坐佢哋安排既小型旅遊巴。
一去到，會有民安隊職員brief你、俾d物資你，例如牙膏牙刷、沐浴露、劣質廁紙、1set餐具等。佢哋幾友善，令不安既心情緩和返少少，見我要照顧家人，仲幫我拎物資同飯盒上去，係呢到都想真心多謝佢哋。
上到去，我地3個分開住2人單位同1人單位，我自己一間。其實間屋就係公屋，2人單位大d，1人單位細d咁，屋內得基本設備，我個單位有:2把風扇、1張膠櫈、1張摺檯、1個熱水壺、1部電視、1張床、1個架、1個風筒、wifi設備。係真係無冷氣。部分物資可以request，例如水、衣架、杯面等。有應該係乾淨既床單枕頭袋，要自己舖。膳食味道真係比較差，賣相亦唔討好，我最後悔就係自己無帶野食入黎食，唯有食佢俾既杯面、梳打餅......
但經歷左醫院既一日，入到黎都叫做終於settle down，同埋有得沖涼，終於有得休息。雖然呢到無冷氣，但無想象中咁熱，都幾通風，所以住落唔算好辛苦。最難頂一定係張床，張所謂床褥薄到，同你舖張yoga mat訓上去感覺差唔多，分分鐘yoga mat仲舒服d，訓訓下腰骨會痛醒，而床褥係無得request要多張，所以硬食吧。
每一日都會有衛生署職員打黎問你有無唔舒服、體溫幾多度(每日要探2次)，佢哋亦有電話，for你有唔舒服可以打去。隔離其間唔可以出去，所有物資、飯盒會有專人放係你門口一個膠籃到，然後禁鐘示意你可以出去拎，個距離大約離門口一步。然後大約係第二日會有衛生署職員上黎叫你留個深喉唾液樣本，話有事至會call你。
講返確診的家人A，佢係我入左隔離營後第二日，亦即係佢確診後第4日，自己覺得情況惡化，自己打999入院。聽過好多確診case都要等一個星期先會有衛生署人員安排你入院，所以4日都未安排到應該係好正常。
So far我入左隔離營幾日，都有少少心得俾大家打個底，in case你身邊有人同我情況相似，都有d資料可以參考下。
1. 確診者: 如果懷疑自己中左招，要即刻睇醫生、做檢測，同時係屋企要自我隔離，食飯、去廁所、訓覺都要分開，同埋用完廁所要消毒，下一個亦要隔30分鐘先可以用，麻煩都無辦法。
而如果情況唔多好，真係唔好盲目等衛生署安排，自己叫白車入院，因為無人知佢個安排幾時先安排到。
2. 入營物資: 係我知道有家人確診，就瘋狂上網搵資料，想知多少少入隔離營既情況，睇下要帶d乜嘢。紙巾、廁紙，一定要帶，呢到既廁紙係公廁果種，你唔會想用。衫褲鞋襪唔洗多，建議帶洗衣粉入嚟手洗，因為大把時間，反而慳左d位可以帶其他嘢，拖鞋都建議帶。娛樂方面，盡帶，唔帶一定會宇宙無敵後悔，因為真係無野好做，個電視可以插HDMI，個wifi速度亦ok，打機唔lag，dl戲都順。糧食:呢個睇個人，但有位不妨帶多d，呢到可以攞既糧食包括:白面包、梳打餅、杯面、淋左既旺旺，其他未攞過唔知，但如果時光可以倒流，我會帶d蛋糕、糖、任何其他野食入黎食，因為d膳食味道好寡，而飲品我攞過既亦只有清水。日用品我自己帶齊晒入嚟，所以唔知佢有咩可以提供，只知佢會俾牙膏牙刷洗頭水沐浴露，不包括護髮素。
3. 檢測至入營期間
由安排你入院，到將你送入隔離營呢段時間係唔會俾你離開，同俾你返屋企，所以係入院檢測前，就要執好晒行李，方便衛生署隨時安排你入院。
入嚟之前我睇左前人分享，所以d野都帶得幾齊，我都希望我既分享可以幫到大家，等呢14日過得有準備D。
——————————End———————————
岩岩再認真睇完個599章Prevention and Control of Disease Ordinance，如果你真係咁驚DNA俾人攞到（口水、血液、頭髮etc），唯一可以做嘅就係無論如何都唔好睇醫生。
#及早求醫係我嘅宗旨
#但你的確有權唔睇醫生
#到時自己簡點做啦
#FinalPostOnPolitics
