[持盈保泰穩陣波 法國再度奏凱歌]
作為體育記者，最困難嘅工作可能係要同時間競賽，喺賽後盡快寫一篇稿，或者「包」一隻古仔出街 (適應用電子傳媒) 。今屆世界盃決賽秉承整屆賽事作風，由頭到尾都咁好味、咁峰迴路轉，習慣半場開筆嘅我，起個標題都有一定難度。不過下半場打陣咗三分一就唔使多諗咧。
畀返少少背景資訊大家：法國 4–2–3–1 陣式照舊，門將羅利斯；後防右至左有柏華、華拉尼、安迪堤、盧卡斯靴蘭迪斯；一對防中有普巴及簡迪；前面麥巴比、基斯文、馬杜迪；中鋒係銀河唯一嘅基奧特。
克羅地亞陣式同四強對英格蘭一樣，門將蘇巴錫；後防右至左有維沙高、自稱全球最佳嘅路夫蘭、維達、史達連歷；三中場拉傑迪、波索域及摩迪；兩翼列比錫及佩利錫；中鋒文迪蘇傑。
法國喺迪甘斯執教之下，一直持盈保泰，淡淡定有錢剩嘅格局，除咗對阿根廷有啲驚險、對比利時一度受壓之外，其實踢得四平八穩。至於克羅地亞點樣喺三場淘汰賽落後之下，憑著打不死嘅精神追平甚至反勝，大家都已經聽過好多次，唔再多講。
賽前以為克羅地亞會延續四強對英格蘭嘅戰術，上半場以逸待勞，下半場先豁出去攻。不過一開波克羅地亞就採取主動，摩迪同拉傑迪喺中前場緊迫，佩利錫更加重點針對法國右閘柏華助攻太前、身位太差嘅弱點，屢次喺左路發難。
不過克羅地亞谷咗一輪之後徒勞無功，反而畀法國喺 18 分鐘乘一次罰球機會打開紀錄：基沙文再次喺右路開出致命的平飛球，克羅地亞中鋒文迪蘇傑頭槌跣後，皮球直飛網窩。克羅地亞連續四場先落後一球，亦連續四場扳平： 28 分鐘，又係一次罰球攻勢，摩迪斬去右邊，隊友頭槌二傳到中路，佩利錫右腳控定、左腳抽射炮彈式遠柱入網。
綠茵場上係男兒馳騁嘅英雄地，但主宰勝負嘅，仲有一位幸運女神。 38 分鐘，法國藉一次角球攻門，皮球省中佩利錫隻手出界。球證最初不為所動，不過隔咗陣， VAR 團隊要求球證睇重播，顯示佩利錫凌空之際隻左手突向下撥一撥，或許可能也許 (真係好唔肯定) 因為咁樣而改判十二碼。基沙文好冷靜咁射門將嘅右手邊入網，法國以二比一領先半場。
下半場開段克羅地亞又谷過，機會唔係冇嘅，但係法國嘅中路防守始終相當穩健，教練迪甘斯用安桑斯後備入替有黃牌在身嘅簡迪，似係想爭取多少少制空權 (同埋多一張黃牌嘅 buffer) ，保守之心，路人皆見。更重要嘅係另一位防中普巴，佢今場每每喺後場憑身體質素搶贏對手，並且喺策動反擊嘅時候放啲靚斜傳畀快馬隊友去追。 59 分鐘，普巴放一個「荷李活式」 (或者史高斯式) 長傳畀麥巴比喺右路落底，個波輾轉落返喺禁區頂，普巴後上抽射第一腳被擋，第二腳左腳熨內彎，門將蘇巴錫視線受阻欲救無從。
克羅地亞今屆賽事踢咗三次加時，合共 90 分鐘，換句話講，佢哋嘅體力消耗比法國多一場波，咁滯。落後一比三呢個打擊顯然十分致命，將克羅地亞剩低度氣都洩埋，令麥巴比喺六分鐘後從容憑一次反擊，喺禁區頂練波咁練，呃過維達射近柱成四比一，同樣成為繼巴西球王比利後，另一位喺世界盃決賽入波嘅 Teenager 。
今屆世界盃不乏 drama ，阿根廷門將卡巴尼路喺分組賽對克羅地亞派膠、近距離笠個波畀列比錫任射令人記憶猶新，法國嘅羅利斯似乎不甘後人，喺一次接應回傳嘅時候想用左腳擺脫緊迫嘅文迪蘇傑，結果扮虎不成反類犬，畀文迪蘇傑捉到路射成二比四，為克羅地亞往後十分鐘窮追帶來多一口氣。
話雖如此，克羅地亞嘅體力下降係不爭嘅事實，法國嘅老成持重，亦反映佢哋經歷過 2016 年歐洲國家盃意外地輸畀葡萄牙之後，更加專注集中、表現更加成熟。四比二呢個比數，固之然係一個難以想像嘅賽果，但對於球迷而言， 2018 世界盃絕對係一屆精彩而難忘嘅賽事。
#賴叔睇育
#全城最快
#WorldCup
#FRAvCRO
