關於 drwho五分鐘愛滋免疫寶寶的故事 ，我們在網路上蒐集到這些相關的討論、資訊與評價

#DrWho五分鐘愛滋免疫寶寶的故事

近排，科學成功登上頭條，某教授聲稱成功協助誕下兩位基因改造嬰孩，移除佢地嘅 CCR5 基因，令佢地對愛滋免疫。究竟咩係基因改造、研究倫理；究竟點解傳媒、研究院、科學家通通都要出黎「人神共憤」？

[HIV, AIDS, CCR5]

愛滋病 (Acquired Immunodeficiency Syndrome, AIDS) 係由 HIV 病毒感染而導致。HIV 病毒潛伏係人體免疫細胞，而人體免疫系統為左清除外敵就自然會殺哂呢啲細胞。當免疫細胞被殺得七七八八，患者嘅免疫系統都所剩無幾，去到呢個情況，病人就叫做患上愛滋。HIV 病毒要進入細胞就要搵路走，其中一條比較常用嘅路就係通過 CCR5。想當年，有一位愛滋病人因住血癌而接受骨髓移植，完成之後竟然發覺 HIV 病毒都好似唔見埋。醫生發現係因為捐贈者骨髓帶有 CCR5 嘅基因變異，從而發現呢一條 HIV 病毒會行嘅路。（詳情請自行 google “The Berlin Patient”)

既然講得係「常用嘅路」，即係話其實有部份 HIV 病毒係識得如何行另一條路進入細胞。另外一樣嘢係，如果新聞報導正確，BB 嘅媽媽係生仔的時候，係並未患有 HIV 病毒，再講多次，係無愛滋病架，帶病嘅，係 BB 爸爸。再簡單啲講，對小朋友根本就唔會因為遺傳而患上愛滋病，阿教授係片段哽咽咁話如何救左呢對小朋友，又從何談起？講真，我就算比媽媽都係帶菌者，都未必係百份百會傳比小朋友。舉個例子，我向天發射粒飛彈話可以萬里晴空，跟住黎緊十日又真係無落雨，咁其實係我粒飛彈勁、定係個幾日根本無雨落？你話你改完基因令佢愛滋免疫，佢最後又真係無帶愛滋病毒，都未必關你事架噃。

基因這回事很有趣。我地人類好鐘意為所有事標上是非黑白好壞，基因唔會，而只會做佢應做嘅事情。

有人講過，CCR5 嘅變異令 HIV 病毒難啲進入細胞，但會增加變異者患上其他熱帶傳染病嘅風險。

用返啲大家都應該聽過嘅例子。瘧疾 (Malaria) 係由蚊傳播嘅寄生蟲引起，呢啲寄生蟲係成長期間會住係人類紅血球入面。地中海貧血 (Thalassaemia) 同蠶豆症 (G6PD Deficiency) 兩種基因病症都會縮短紅血球嘅壽命，所以兩者都可以令患者出現貧血嘅現象，但亦都對患者染上瘧疾有保護作用，甚至有研究話蠶豆症患者係會有少啲癌症同心血管疾病嘅風險。基因係把雙刃劍，地貧蠶豆症兩條咁多人研究嘅基因都仲有咁多未知嘅情況，輕易搞人家條 CCR5 會點？

[基因改造]

基因改造其實不嬲都係一個重大嘅倫理議題。

人體細胞有好多種。精子同卵子結合之後，成為一粒受精卵。呢一粒細胞會不斷生長、分裂，去到某個階段，呢啲細胞就會投入「專科」服務。有啲進化做骨髓細胞、有啲成為器官、有啲成為血細胞，而投入左專科服務嘅細胞係唔會跨科做其他嘢。基因治療 (Gene Therapy) 係其中一種新嘅療法，利用基因植入去治療受影響細胞，例如入去肺醫 Cystic Fibrosis、入骨髓醫血癌。呢啲細胞唔係精子卵子，被改造左嘅基因係唔會無啦啦走返入睪丸卵巢再傳比下一代。但阿教授今次做嘅唔同，係基因改造 (Genome Editing)。佢係細胞未專科化之前就改哂佢嘅基因，即係話如果成功，佢成個人嘅細胞都已經被改造，係可以遺傳去下一代。

基因改造點解咁大鑊？因為佢太容易比人濫用。

有一個學術領域叫優生學 (Eugenics)，通過非自然嘅方法去控制人類發展方向。太複雜？大家有無睇過哈利波特、X-men 呢？巫師殺麻瓜、超能人殺普通人，用嘅觀念就係要「優化」人類。雖然咁樣講係有啲誇張，但大家可以唸下基因改造嘅潛在含意。佢係一種可以決定到你下一代嘅性別、智商、外貌、身材嘅技術，甚至可以改造出一個全新嘅物種。佢只係一種工具，但有無害就睇下人類如何使用佢，而歷史就話比我地聽人類係信唔過的。外國就算基因改造食物 (Genetically-Modified Food) 都拗左好耐，咁如果連可唔可以幫一舊蕃茄加上禦寒功能都要拗咁多年，何況係人類？

[研究倫理]

就係因為咁大件事，係未有定論之前，全世界都有共識要對基因改造有嚴格控制，就算普通做體外受精都有規定唔容許出現人為選擇嘅情況。而世界上所做嘅人類研究，理論上都要符合赫爾辛基宣言 (Declaration of Helsinki)，而進行研究前都一定要通過審查委員會 (Institutional Review Board, IRB)。倫理其實只係建基於良心，我有理由相信世界上實有不符而家價值標準嘅實驗進行緊，但今次佢又咁驕傲咁搵公關發放片段，真係當全世界其他科學家係死嘅？聞說阿教授亦曾經嘗試改造獼猴胚胎嘅 CCR5 基因，但無移植過、無睇過變異嘅獼猴胚胎有無健康問題，直接跳步幫人類做，咁趕呀？

當然，其實一直有人話咁多重嘅倫理令到科學發展放緩。當年一二次世界大戰，人體實驗多不勝數，好無倫理，但好鬼快；而家我地對人類實驗嘅要求提高左，動物權益組織亦都提倡禁止動物實驗，有科學家就會覺得咁樣「不如乜都咪做」，但呢個已經唔係我地今日要談論嘅問題。

[結論]

其實佢而家做到嘅並唔係咩重大突破、用嘅都係人家嘅技術，佢只不過做左一個大家都唔容許、亦未敢做嘅實驗。佢可以「好自豪」、「想拯救全中國嘅愛滋病兒童」，但科學歸科學、感情歸感情，當你做一個非必要、不道德、甚至造假嘅研究，無論你係咪一個自豪嘅救世主，你係科學同道德上都已經破左產。

錢，笨唔係咁賺；名聲，笨唔係咁嬴；諾貝爾獎，笨唔係咁攞。

#DrWhoHK

🔻🔻🔻🔻🔻🔻🔻🔻🔻🔻🔻🔻🔻🔻
IG: DrWho.HK (instagram.com/DrWho.HK)
FB: DrWho.HK (facebook.com/DrWho.HK)
🔺🔺🔺🔺🔺🔺🔺🔺🔺🔺🔺🔺🔺🔺

隨文付送其他相關文章

北歐心科學 NordicHearts：
https://www.facebook.com/1586779741564688/posts/2214971612078828?sfns=1