MIRROR ERROR 熱潮席捲全港！娛樂版關佢地事，連財經版（有粉絲註冊「姜濤幣」及「MirrorHK幣」做虛擬貨幣）、體育版（MIRROR 擔任 2021 歐洲國家盃大使，ERROR 任旁述）都有佢地，最近仲有港聞版，事關有「年輕人跑道」議員向官員提議，爭取佢地上內地綜藝推廣香港文化。
佢地今日出席活動被問到呢件事，副隊 AK 同 Alton 就話 MIRROR 只係成軍兩年半，啱啱成為香港樂壇一份子，仍然有好多不足，想做好自己本份先，所以現時會 focus 番喺香港本地，到 MIRROR 變得更強，進修好自己嘅時候，先俾全世界人欣賞，因為音樂係無分國界嘅。至於又有醫學界人士提議搵佢地推廣疫苗，AK 就話佢地只係樂壇小薯，要搵發哥呢啲先夠人氣。
而 ERROR 就會同強尼一齊做歐國盃旁述，有網民提議佢地做埋東奧，193 就笑阿 Dee 想講體操項目：「佢想睇男人着緊身褲。」阿 Dee 即刻示範旁述：「美國嗰啲好大抽呀！」
#AK同Alton答得好好
