[呢個page係想做咩？] 間唔時都要講多次我開呢個page係為乜。啲規矩喺張相度我就唔重複喇，如果有人違反我就會delete啲留言甚至係block咗佢，唔手軟。另外亦都一次過回答成日問我嘅問題。
(1) 點解你唔同用一把尺去睇唔同節目？唔公平喎。
答：我認把尺真係唔一樣嘅。對於大台我係高要求啲，因為佢已經係一間有50年製作電視節目經驗嘅公司。而對於ViuTV、奇妙我都係採取把鬆啲嘅尺，因為佢哋young啲。如果講對邊個唔公平，其實我係對大台唔公平。
(2) 點解你成日講大台呀，係大台打手﹗
答：我希望大家如果要judge我嘅話，可以睇多啲post先，咁對大家都fair啲。我鬧大台嘅post，同鬧大台嘅嚴苛程度，比起其他台一定有過之而無不及。至於點解我成日講大台，呢個就仲簡單，係比例嚟啫，大台係香港製作電視節目時數最多嘅機構，節目多，我講得多好正常。我歡迎各位介紹你覺得好正嘅節目畀我睇，一個人一個腦，我真係留意唔晒所有嘢。真係有觀眾會inbox介紹我睇，我都真係有睇呀。
(3) 點解你唔講吓外購劇呀？
答：我呢度主要想講以香港為基地製作嘅節目。我覺得香港人要睇香港製作。
(4) 點解你要寫劇評？
答：因為我想大家討論吓，觀眾都要互相砥礪進步。有觀眾留言我好高興，尤其係見到同我唔同嘅意見。我只係想拋磚引玉，有個地方大家講吓自己嘅睇法。大家毋須互相挑釁，講「我覺得你咁睇係錯囉」係無意義嘅。因為你一定係覺得有啲留言同你嘅睇法唔同，先會留言去講另一個角度。大家可以互相討論，但要明白好多時係唔會達到共識。做人無論係喺真實世界定網絡世界都好應該保持禮貌，尊重不同意見。好似《天與地》葉梓恩咁講：「和諧唔係一百個人講同一說話，和諧係一百個人有一百句唔同說話之餘，又互相尊重。」
(5) 點解你要解釋咁多，block咗佢哋咪得囉？
答：因為每個嚟到呢個page嘅都係有緣人，亦都係鍾意睇電視、睇香港電視嘅人。結緣好過結怨，你話係唔係呀，哈姆太郎？
#1999mode #長氣 #講完又講都要講 #互相尊重 #講嘢要有禮貌
