難得一見的江南建築
註：龍仔悟園為私人地方，只有特定的「開放日」對外開放參觀；慈興寺同樣是不對外開放，但飛龍雕塑位於慈興寺外圍。
【#香港你懂的】大嶼山深山有江南建築？
近呢廿幾年，大嶼山發展一日千里，北大嶼更成為一個人口有廿幾三十萬嘅新市鎮。可能年輕一代嘅飯友想像唔到以前要去大嶼山又要坐船又要趕巴士，交通非常唔方便。不過咁，以前就有人唔怕麻煩，响大嶼山深山起座江南式庭園。
舊仔講緊嘅，就係位於大嶼山西南部深山裡面嘅龍仔悟園。呢個地方位置大概係响鳳凰徑5段，由馬路再沿住引水道再行入去呢個地方都有相當路程。講咗咁耐，咁龍仔悟園係乜嘢地方呢？龍仔悟園係由紡織商人吳昆生响1960年代出資興起，唔好以為响大嶼山深山呢個地方就好簡陋，龍仔悟園以江南庭園建築風格設計，內有荷花池、九曲橋，亭台樓閣、鯉魚塘、花圃花園等，真係成個山莊咁。咁點解呢位吳先生會响深山起個咁豪嘅庭園呢？據了解吳昆生生前信佛，龍仔悟園就係佢靜修之地。亦由於呢個地方咁特別，係香港少有嘅江南式建築，所以以前唔少電視劇都响呢個地方取景。
除咗龍仔悟園，其實大嶼山西南部山頭仲有一個古怪建築，呢個就係靈會山慈興寺嘅飛龍雕塑。據講呢間佛寺坐向風水麻麻，於是就整條飛龍雕塑嚟化解。唔少行山友都會以龍仔悟園同慈興寺飛龍為行山目的地，影相呃LIKE。不過，龍仔悟園係私家地方，慈興寺又唔係太對外開放，要去呢兩個地方影相呃LIKE可能需要啲運氣。
#舊飯 #大嶼山
