胡小B 遊'院'記 (長文😢)
有跟開為媽post 應該發覺為媽係報喜😃不報憂😞
做媽媽唔開心嘅事來來去去都係果個幾樣
唔想再增加負面情緒 寫啲開心嘢大家開心Share仲好
但係今次不得不記下 因為太離譜😠
事源為媽上星期日感冒😷睇左醫生食左藥
仲停左三日人奶(親手倒左五大包好肉赤)
星期二胡小B 開始咳 星期四嚴重左去睇診所兒科醫生,醫生好冷淡咁話感冒姐,開左三支藥水
我有諗過咁細個食唔食得藥呀,不過醫生開就食左兩次，但之後見胡小B好似好攰又唔願飲奶就停左無再俾佢食藥,因為我覺得會唔會d藥唔岩食
第二日發燒🤒再去睇同一個醫生，佢就即時好緊張，話寫轉介信叫我入院 🏨
因為佢講到話要即時入院，我同爸爸就去左最近公立醫院急症室，入去分流時個護士見有轉介信立即叫我地入去見醫生，仲即刻安排照X-Ray上左病房，護士解釋因為流感高峰期正常房床位爆滿，安排左走廊床位，我都只可以接受，之後做咗一系列檢查，仲留左小便同鼻液做測試
正當我為醫護人員的快手感到欣慰時,個部門醫生告訴我，醫院好多病菌建議我帶胡小B放假回家，明天再回來複診，如果燒到38度就立即回醫院亦解釋因為小朋友太細,不適宜食收鼻水或止咳藥,因為這些藥有機會引起BB呼吸困難仲危險
當晚胡小B 燒37.4-37.8之間
第二天回到醫院，見到一位年青的主診醫生,簡單問症,解釋報告說沒有中流感亦不是尿道炎,只是一般的感冒引致氣管發炎,她說會開一隻輕微量類固醇,讓氣管放鬆少少等BB無咁氣喘,我和爸爸你眼望我眼, "類固醇"喎講緊嘅係開"類固醇"俾三個月嘅BB食😳,我地在病床等了一會部門醫生走過來同我地講:"咁細個唔好食類固醇啦,你哋想唔想抽血檢查"(你係醫生點會問返個病人想唔想抽血,有冇需要抽血唔係醫生決定緊咩😓)
商量完都係覺得抽血有份報告知道究竟係咩事發燒好啲, 個醫生回答：你哋想抽啊？咁抽血囉！抽完血等左兩個鐘頭報告出咗血液冇事,醫生又再次話冇事就返屋企聽日再返嚟複診,唔好留喺醫院,再一次打道回府
胡小B嚴重得氣喘,哭聲沙啞,聽得出肺部好多痰聲,我同爸爸都十分擔心, 第二日一早便轉到私家醫院門診部求醫等了兩個小時終於見到醫生,醫生看到BB情況講咗句應該係支氣管炎係好辛苦,立刻叫姑娘睇吓有冇床位,可惜姑娘回覆已經滿晒，醫生即刻叫我們去治療室讓BB聞氣放鬆氣管同時叫我們打電話向其他醫院查詢床位指胡小B一定要入院，我打了四間醫院回覆床位已滿,最後有兩間醫院有少量床位,一間在銅鑼灣一間在黃竹坑, 但都不能預約，一定要經門診醫生確定才可入院，即是又要等多兩個鐘頭,我們都好怕等到我們時又床位已滿
抱着發燒中的胡小B 已經在懷中昏睡了五小時沒醒過來，坐在往醫院的車上我已經心急得哭岀來
好不容易趕到門診登記過後又是慢長的等待，看著胡小B泛紅的臉真的不願多等一秒
見了醫生說的表面症狀是毛細支氣管炎，本來因爲我們是公立醫院放假回家病人，私家醫生勸喻我們回去公立醫院比較恰當,我忍不住哭起來告訴他在公立的情況,我對他們沒有信心亦不可能回去，抱住胡小B的爸爸也開聲,最後醫生也點點頭會幫我們和公立醫院溝通把胡小B轉入私院
此時醫生也為我加油叫我放心,要努力餵人奶,心裡才踏實點
轉到病房 醫生說公立做了x-ray和抽血檢驗有報告不再重複做,只留了小便和鼻液重新做一次測試,結果是中了乙型流感😨,醫生同樣是不能開藥,只可以聞氣舒緩,最感動是醫生同樣照顧了媽媽的感受😭,不停安慰我不用擔心要加油💪🏻辛苦d努力餵多d人奶,人奶對BB係最好的藥,留院一晚後,胡小B退燒了,情況穩定下來,keep住4-5個鐘聞氣令氣管放鬆,到第二日咳少左,無咁多鼻聲同喘氣,醫生先建議我們回家休息,因為始終醫院都係多病菌😷
回到家中越諗越驚同嬲😠,三位私家和公立醫生都異口同聲說3個月大BB不宜食止咳或收鼻水藥,但那位診所兒科醫生為何會直接給我們三種藥物,其中一款便是部門醫生所講收鼻水藥,對為媽來說這位醫生求其得很,感覺是你來看醫生我就出藥俾你冇考慮過小朋友情況,永遠唔會再睇佢😡
另外不是說公立醫院唔好,但始終新手醫生太多, 說得出讓三個月BB食'類固醇',雖然最後有部門醫生把關,醫生是專業的但醫生們不同說法真會令父母很徬徨及信任度下降,加上抽左兩邊鼻液都驗唔到流感,真係唔明點解😑
現在只想胡小B 盡快好返健健康康
最想全家冇病痛🙏🏻🙏🏻
