《黑豹》影評
「無血無肉無靈魂嘅傻仔」
暨我對英雄電影嘅睇法
（含劇透，慎讀）
—
—
—
—
—
如果《黑豹》肩負住破除對第三世界、黑人、弱勢社群歧視嘅責任，因為「政治正確」，所以就唔鬧得，其實當中涉及嘅歧視反而係更深，更無私顯見私。
—
老土唔係罪，「政治正確」都唔係毒藥，人類幾千年來都講緊愛，普世價值離唔開自由平等博愛，但一套好嘅作品，就係可以引領你去思考，喺思考嘅過程中，可能會加強你自己嘅想法，亦可能會動搖你嘅價值觀，做人就係不斷摧毀同建立自己嘅過程。
—
睇《三隻小豬》，雖然故事廣為人知，但大抵我哋會學到勤力踏實嘅道理，無咩思考空間，但呢種故事係比小朋友睇嘅，幫佢哋嘅人生基礎信仰「打底」。而做大人呢？你會知道懶惰可以幫你慳番好多時間，而大野狼都未必會嚟，或者地震起草屋可能就係最好，忠忠正正或須乞食。
—
所以，寫比成人睇嘅故事，應該包含多啲思辯，穩定好定係冒險好？可能主角經歷咗好多嘢，發現原來都係穩定比較好，以故事言志，絕對無問題，但寫故仔必須去諗，點樣用一個故事去表達自己嘅價值觀，洗觀眾讀者嘅腦。
—
而《黑豹》說穿了，就係一個完全跳曬STEP，直接飛咗落「政治正確」結論嘅故事。當中牽涉一個更大嘅問題係，黑豹鐵查拉國王，完全無性格特徵可言，由頭到尾，佢都係一個承繼王位忠忠直直嘅黑人。男主角被面譜化得離譜，為瓦干達去接受其他人嘅挑戰，捉加羅，守護王國，呢種人擺喺現實可能幾man，但作為一個超級英雄，只是一粒超級悶蛋。
—
而再推深一步，黑豹這英雄最缺乏嘅，係一個超級英雄電影最重要嘅元素—「轉變」。超級英雄之所以吸引，係因為好似神嘅佢地，原來都係人／曾經係人，有人嘅七情六慾，有隱忍不言嘅過去，能力強大嘅背後，原來都有好多煩惱。例如玩世不恭嘅鐵甲奇俠，無啦啦比人捉咗，食盡苦頭，然後靠全自己嘅機智同專業，砌咗件山寨盔甲出嚟大破恐怖份子，非常熱血；甚或去年成品較比庸嘅蜘蛛俠，英雄表皮下，原來都係一個十幾歲嘅高中生，都要溝女，都有一顆逞英雄嘅心。然而，每個超級英雄都經歷咗一個「蛻變」嘅過程，由幼嫩到成熟，同時不失個人風格，我稱呢種描寫為「立體」。
—
而黑豹就係一個相當平面嘅角色，雖然喺電影後段都有上演一幕「覺悟」嘅戲碼，鐵查拉嘅選擇既同自己爸爸嘅鎖國唔同，又有異於奸角攬炒嘅決定，決意比瓦干達以共和互助嘅形式面向世界。呢個設定幾好，但個問題係，點解黑豹會咁揀？咁揀又有咩好呢？老實講，各種方法有利有弊，係咪因為黑豹嘅一啲成長經歷，或者佢對現實社會嘅觀察，所以令佢有共和嘅價值取向？反而奸角嘅描寫比主角就更加立體，因為奸角見到自己爸爸被殺，令佢心底植根咗以暴易暴嘅價值觀，合理之極。
—
事實上，如果編導想向觀眾灌輸共和嘅理念，大可以喺戲入面拍出自己嘅信仰，例如原來弱勢者推翻咗強國之後，會出現新嘅弱勢者，只係位置轉換，致力共和追求平等先係長治久安嘅出路等等等，咁成個思辯係咪就昇華咗呢？黑豹呢個角色喺《黑豹》入面，只係一個無血無肉無靈魂嘅傻仔。主角面目模糊，令我難以對佢產生感情，就算佢跌落瀑布死q埋，who care？正如你都唔會對路人甲乙丙死咗而覺得觸動。
—
英雄電影個英雄係傻仔，絕對係死症，但《黑豹》嘅缺點絕對不僅如此。就例如其他角色嘅描寫，主角妹妹被描寫為一個掌握高科技嘅高智能人士，好多咩戰衣都係出自佢手，但如果要增加說服力，片尾各部落混戰，個妹妹要潛入實驗室定乜，其實可以加個劇情講佢點用妙計做到，一場戲就可以寫到一個人物；其他人士如是，例如未婚妻、光頭女、叛變部落大佬，一個又一個嘅面譜，亦無動人嘅位置。
—
第三個係動作嘅動作嘅調度。可能寫到呢度，有人會覺得英雄片係咁架啦，打打打，然後有少少message已經收貨，你估你睇藝術片咩？誠然，我話《黑豹》係我睇過復仇者最差嘅作品，但我的確無睇過所有作品，例如大家話好差嘅雷神二我就無睇。
—
不過，《英雄內戰》就係我評價極高嘅作品，原因係每一個英雄角色嘅能力真係唔同，而佢哋可以運用自身獨特嘅能力去解決唔同嘅困難。就例如停機坪大混戰嘅果場戲，無人有絕對嘅優勢，鐵甲奇俠係勁，但會比蟻俠縮細飛入去破壞你個系統，美國隊長係大力，但又會比蜘蛛俠痴走個盾，黑寡婦發揮間諜本色等等等等，蜘蛛俠做到嘅嘢，幻視做唔到，A做到嘅嘢，B做唔到，最好睇嘅群P片，莫過於此。
—
而《黑豹》嘅動作設計又係點架呢？我唔反對角色埋身肉搏，但埋身肉搏得嚟可唔可以唔係9打，而係有招式有功架嘅呢？甚至乎，黑豹可以自己練成一種「黑豹格鬥技」，有佢自己嘅SIGNATURE，包含個人哲學喺入面，描寫到佢好好揪，咁都得架，人哋宇宙最強喺《導火線》以MMA格鬥技巧融於時裝武打片入面，唔係一樣好好睇咩？《黑豹》格鬥場面令人尷尬，僅僅高於古天樂嘅《貪狼》，好多位無實感，就快打落去果陣就眨一眨個鏡頭，最誇張係比人圍就無啦啦可以爆氣，咁我不如KEEP住開無雙啦，胡混過關，絕對唔收貨。
—
又或者係最後列車嘅大戰，有令我諗起《一代宗師》張晉對章子怡，但真係要講聲大佬，你最後KO奸角竟然係因為後手插咗把刀落對手度？呢啲情況現實當然會出現，但打鬥嘅最後一招通常都要鋪排吓，最後用番先有說服力，你《激戰》張家輝甩較，都要描寫番佢之前好努力操拳搞到慣性甩較先有感染力啦，努力雖然會傷，但喺關鍵時候原來可以救你一命，側寫程輝智勇雙全。
—
而劇情犯駁位我就唔打算一一去挑剔，因為太多，例如果頭個奸角話燒曬啲心靈草藥，另外一頭又非常輕易咁偷到一啲出嚟；果頭掉落瀑布，果頭又比人執番。咁樣寫故仔唔係唔得，但太順理成章會比人感覺係「乜都得」，缺乏優秀作品一定要有嘅鋪墊。五大部落帶出咗瓦干達世界觀，但又唔比佢哋粉墨登場獻技（最好各個部落都有唔同招，唔同信仰武器文化等等啦，唔係得個名）。
—
最後一樣嘢想講嘅係電影嘅「對白」，瓦干達幾乎所有人講英文都係起碼慢咗一倍同埋用咗啲非常淺白嘅英文，仲要好無內涵。雖然呢樣嘢係故意設定，但我就絕對唔欣賞。個感覺好似係睇緊《the room》Johnny講英文咁，但人地係爛到變咗神cult片，黑豹又有無呢個咁偉大嘅志向呢？
—
我明白應該都有唔少人鍾意《黑豹》呢套電影，而睇套戲之前，我都覺得《英雄內戰》嘅黑豹堅型，不過以戲論戲，我對作品嘅不滿大抵都寫曬喺上面，小朋友卡通片層次，至於我係咪故意唱反調個決定權就交比大家。《黑豹》？真的不了。
—
可能又有人話我無睇漫畫就亂插乜乜乜，但我比六十六蚊入場，究竟係睇漫畫定係電影姐？Marvel呢個英文字，絕對唔應該係免死金牌。
—
2月25號3點旺角網聚，一齊分享電影，快啲pm我報名！
—
（如果你咁有心機睇到嚟呢度，一篇觀後感其實要寫嘅時間真係頗長同相當費心力的，正如呢篇野都過左千五字了。如果你覺得文章係寫得好嘅，我一個人嘅力量真係非常有限的，唔好吝嗇你嘅like同share吖，甚至幫手推薦比朋友知道原來睇戲之後係可以有反思的，一齊傾，一齊分享同感受。網絡的力量可以很少，一篇千文字可以只像一粒沙，但同時亦可以很鉅大的，依靠的就是你，你，和你，感激不盡！）
黑寡婦蜘蛛英文 在 黑寡婦蜘蛛 - YouTube 的美食出口停車場
如果我們交往，妳可以答應不要殺我嗎？」 黑寡婦蜘蛛本身就有重量的優勢，牠的重量是公蜘蛛的30倍。也就是說以人為例的話，若一隻公蜘蛛的體重是90 ... ... <看更多>