《無異之局》荒村異聞（一）
同好多香港人一樣，蘇子儀係一個非常鍾意行郊野公園嘅女仔。每逢放假得閒嘅時候，佢都總會約埋一班朋友周圍走，想喺香港嘅唔同位置留低自己嘅足跡。
而另一方面，佢亦都對香港行山界嘅都市傳說感到非常有興趣──例如Ocamp行山撞鬼、山魅、西貢結界之類嘅「故事」，佢都幾乎聽到識背。但即使係咁，佢都冇從冇諗過類似嘅事有一日會發生喺自己身上……
記得當日係十月八日（星期二）。因為正好係大學Day off，所以佢約咗兩位大學朋友即興行山──今次嘅目標係去睇黃竹山廢村。
「子儀，點解今次會揀呢度嘅？」坐小巴嘅時候，佢嘅其中一個朋友Lois一邊掃Instagram一邊問。
「係囉，廢村聽落咁得人驚。」坐喺旁邊嘅阿Yan接住講：「平時妳都唔會揀呢啲地方嘅。」
「吓？妳哋唔覺得好特別咩？一個大城市裡面有個荒廢咗成半個世紀嘅廢村。」子儀笑住回應：「何況妳哋兩個成日話想行短程嘅，呢個咪啱晒囉。」
「哈哈。」阿Yan聽完乾笑一聲。
對佢同Lois嚟講，行山最大嘅價值就係影一輯青春健康充滿陽光氣息嘅靚相然後擺上 instagram，本身景點背後有咩意義根本就唔在乎。
所以當佢哋見到其他人影落嘅相係名乎其實嘅「廢村」，多少係有啲失望……但既然口快快應承咗會嚟，留喺屋企又怕更無聊，結果最後都係選擇出嚟。
＝＝＝＝＝＝＝＝＝
《惡夢島》全集：
https://www.facebook.com/pg/Echo.of.Heart/photos/?tab=album&album_id=1861298627335278
《極樂謊園》全集：
https://www.facebook.com/pg/Echo.of.Heart/photos/?tab=album&album_id=1736011713197304
【廣告】《無異之初》、《無異之地》各大書局有售！
＝＝＝＝＝＝＝＝＝
佢哋三個照住網上嘅行程教學，由馬鞍山郊遊徑嘅水泥路開始行，經過昂平然後接上麥理浩徑第四段，再走一段路就轉入茅坪古道。
「幾時到㗎？」Lois停低落嚟抖氣，平時少做運動嘅佢行到呢度已經上氣唔接下氣。
「差唔多喇。」子儀望住電話回應，對成日周圍走嘅佢黎講呢段路根本係小兒科，「上面話見到矮牆再行就會有條小橋，過埋條橋就差唔多到。」
一直行，終於見到教學所指嘅小橋，橋下面係一條清澈嘅小溪。當刻橋上面正好有個年邁嘅伯伯喺度休息緊，等到三個少女行到過去嘅時候，伯伯好奇咁開口問：
「妳哋係咪想上去黃竹山村呀？」
「係呀。」子儀禮貌咁點點頭，「伯伯，我想問係咪行呢條路就啱？」
「冇錯冇錯，」伯伯轉身指向左手邊，「妳哋過完橋轉左就會有條路上去廢村。但要小心啲……條路本來就多青苔，尋晚仲要落完雨，所以應該會幾滑。」
「嗯，一定會。」見阿Yan同Lois都喺陰涼嘅小溪旁邊休息緊，子儀決定同伯伯講多兩句：「伯伯上山都係嚟睇廢村？」
「呵呵，都睇咗好幾年囉，話晒係咁有歷史嘅地方。」伯伯笑住回應：「記得當年日本仔打到嚟嘅時候，成日都會嚟呢邊搞掃蕩……所以後生嗰班都搵機會逃走，結果慢慢就冇晒人住。」
「原來係咁。」雖然上網已經睇過類似嘅歷史，但子儀都盡量表現到學到嘢咁。
「小妹妹，如果妳對廢村有興趣嘅話，其實香港仲有另一個當年都幾出名嘅……」
「仲有另一個？」
「嗯……叫做白湖村。」
子儀皺起眉，來來想追問下，但阿Yan同Lois正好抖完行到過嚟。
「行得啦！」阿Yan捉住子儀隻手講。
「哈，咁伯伯都唔阻妳哋喇，拜拜。」伯伯揮揮手，然後就從佢哋嚟嘅方向離開。
「其實妳一早知點行啦，仲洗咩問人喎。」阿Yan細細聲咁講。
「咁難得見到有人，出於禮貌都應該講兩句嘅。」子儀回應。
穿過小橋後，佢哋一直沿住台階上，轉眼間就到達廢村範圍。映入眼簾嘅係一個仿如古代遺跡嘅景象──可以見到大部份嘅石屋都已經倒塌，剩低斷壁殘垣，而周圍都長滿綠草，感覺充滿生機……
「只要冇咗人類嘅干擾……大自然就會係咁樣發展。」子儀感嘆咁講：「呢刻感覺就好似睇緊未來地球嘅縮影咁。」
「做乜妳今日講嘢咁奇怪嘅。」Lois講，阿Yan聽完即刻偷笑一聲。
同子儀唔一樣，佢兩位朋友明顯對呢度冇太大感覺。當刻又正好天有厚雲，喺冇咗陽光嘅狀況下想搵個好位置影相都變得困難。而且成個廢村其實相當寧靜，假如唔係一直有人講嘢嘅話，大概真係會覺得陰森恐怖。
結果佢哋行咗一轉後，最後揀咗一個廢窗嘅位置影相。
「麻麻地……」阿Yan睇完啲相之後講：「不過執下可能都得嘅……子儀，一陣係咪睇完呢度就落山架啦？」
「嗯。」子儀回應嘅時候一直盯住平台下方，即係佢哋頭先上嚟嘅道路。
「咁一陣Lunch食乜嘢？係咪出返市區先？」
「更係出去先！」Lois率先讚成，「我記得觀塘新開咗間甜品店……」
「喂。」子儀打斷咗佢，「我好似見到下邊有人……」
「係咪頭先個阿伯？」阿Yan問。
「唔係，著嘅衫唔一樣……而且……」子儀講講下停咗，轉身望向阿Yan佢哋，壓低聲講：「佢上到嚟了。」
下一秒，有一位著住黑衫黑褲、戴住黑帽嘅男人嚟到廢村平台，本來一身都勉強算係標準嘅運動打扮。但最奇怪嘅係佢居然戴住黑色口罩。
好地地邊有人行山係會戴口罩？再加埋佢銳利嘅眼神，所以第一印象自然係偏向壞嗰方面……係賊上山打劫？抑或係遇上偷渡人士？
「不如走囉？」Lois神情不安咁提議，阿Yan即刻點頭同意，「子儀……係咪另一邊都有路走到？」
「有……」子儀都唔敢望返過去，「網上面話有兩條路，行右邊就可以出返去麥理浩徑……」
三名少女即刻動身，但只係行咗幾步，背後嘅黑衫男子突然開聲講：
「喂，妳哋三個。」
一聽完，佢哋即刻停低腳步。子儀感覺到旁邊嘅阿Yan全身震咗一下，而Lois差少少就會驚到尖叫出聲……當然佢哋可以選擇唔理拔腿就跑，但子儀卻鼓起勇氣轉身望過去。
「你……到底想點？」子儀盯住黑衫男子嘅雙手，見唔到有武器之類嘅危險物件，「如果係想打劫嘅話……」
「打劫？」男子聽完冷笑一聲，「我要打劫會唔會揀荒山野嶺？」
「嗚……」Lois聽完更加驚，「咁即係劫色……」
「假如係劫色嘅話，妳都可以放心，三個入面我都一定唔會揀妳。」明明已經講得好細聲，但男子依然聽得好清楚，「聽住……妳哋而家腦海裡面諗嘅嘢全部都係錯嘅，我只係想提醒妳哋。」
「提醒？」子儀皺起眉頭。
「妳哋揀錯日子上山喇。」男子接住講：「一陣落山嘅時候，記住無論發生咩事，遇到咩人都好，千祈唔好回應……要一直行、死命咁行、唔好停低、唔好回頭……直至翻出市區為止。」
「點解要咁做？」
「與其要我慢慢解釋，不如妳哋快啲行動。」男子轉身，「趁仲有機會離開呢度。」說罷，佢就沿住石階落返下面。
「喂！」子儀本來想追問，但阿Yan即刻拉住佢。
「條友明顯痴線㗎，妳仲理佢！我哋快啲走喇！」
見佢兩位朋友嚇到面都青晒，子儀當然都唔敢亂做決定，而係照原定嘅路徑離開廢村開始落山。
「我今日真係唔應該嚟……早知就留喺屋企追劇……」阿Yan邊行邊抱怨。
「對唔住。」子儀道歉。
照道理，穿過古徑之後走一段路應該就會去返麥里活徑。但意外嘅係，呢段幽深嘅小路居然行咗足足大半個鐘都未出得返去，間唔中仲會有陰風吹過雜草，感覺就好似有人隨時會喺草叢裡面突然彈出嚟咁……
「嗚……」Lois終於忍唔住喊出嚟，「到底仲要行幾耐……」
「子儀……妳係咪記錯方向呀？」阿Yan一直拖住Lois隻手行，但睇得出佢都就快去到崩潰邊緣，「會唔會行左邊先啱？」
「唔係，個教學明明係寫呢條……妳哋望下前面！穿過埋草叢應該就係！」
彷彿見到曙光一樣，三人即刻加快腳步，然而……穿過草叢之後，眼前並唔係一條明確嘅山路，反而係熟悉嘅石道，而且……
不遠處仲有道小橋。
「呢度我哋頭先咪嚟過囉？」阿Yan即刻意識到唔妥，「就係呢度遇到嗰位伯伯……吖！？」
啞、啞、啞、啞、啞……
頭頂嘅烏鴉叫聲嚇到阿Yan尖叫一聲。子儀起初仲猶豫緊係咪應該走回頭路，但又諗返起頭先嗰個黑衫男人叫佢哋要一直行……「唔好停低、唔好回頭」。
「各位……」諗到呢度，佢本來想為兩位朋友打氣，但Lois卻突然捉住佢隻手……
「下、下面……嗚……」當刻Lois已經喊到妝都化埋，佢合埋雙眼，指住石道下面嘅河溪……
子儀望過去，呢刻有兩個小朋友喺溪邊彎低身，背對住佢哋喺度玩水，嘻嘻哈哈咁笑得非常開心。但此時此刻見到咁嘅景象，當然係更覺得毛骨悚然……然而更令人心寒嘅，係Lois接住嘅下一句……
「我頭先……嗚……見到佢哋……係冇眼耳口鼻……」
阿Yan聽完即刻驚到同Lois攬埋一齊。而子儀就一直盯住下方，直到背後響起一把熟悉嘅聲音……
「咦，妳哋幾個點解返轉頭嘅？係咪蕩失路？」
係頭先遇到嘅嗰一位伯伯。
子儀想擰轉身去望，但身體偏偏冇辦法作出回應。
「明嘅……伯伯我呀……當年都係一樣……走咗入嚟，走唔返出去。」
郁唔到、亦都冇辦法開聲，只係維持住同一個動作。下一刻，開始注意到周圍有「人」從唔同方向走出嚟……橋嗰邊有、下方溪間有、前方嘅石道亦都有。當中有男有女，全部人臉上嘅五官都模糊到好似消失咗一樣。
「我哋其實都唔想傷害妳哋……但冇得揀……」
子儀感覺到背後嘅寒意越嚟越重，但佢依然冇辦法掙扎開……
「我哋只有咁做……先可以搵到離開呢度嘅路……」
四周嘅「人」開始慢慢行近過嚟，下面小溪嘅兩個小朋友亦都一樣。當刻，三位少女全部動彈不能，只可以企定定任由周圍嘅「人」宰割。
但就喺下一刻……
「我就知道發展會係咁。」黑衫男子突然喺草叢間走出嚟，「提咗妳哋發生咩事都唔好停落嚟。」
意外嘅係，男子嘅出現瞬間驅散咗周圍嘅寒氣。本來仲包圍緊少女們嘅「人」都即刻倉惶而逃……下一瞬間，子儀終於郁得返了。
「唔好擰轉頭望。」黑衫男子再次提醒，「由我身後呢條路走，一直走，就算跌低都要即刻起身走……」
「……今次一定會搵到出口。」
（待續）
《無異之局》正式開始連載。預計頭半本書進度應該會係幾快，希望各位可以睇得盡興啦。下集暫定星期二或三出。
《無異之地》實體版出咗啦！記住支持下呀～
p.s. 留言有人物關係表。
－－－－－－－－－－－－－－－－
【地方的無默媽資助計劃】（試行中）
近年作者生存空間越收越窄，大眾結業更加似係雪上加霜。所以推出資助計劃，希望各位可以直接課金支持。計劃並唔係強制性，一蚊可以，想繼續免費睇亦無妨，有心就可。
Payme 連結：
https://payme.hsbc/echoofheart
轉數快 FPS ID：6065460
計畫緣由及詳細內容：
https://bit.ly/39b5Fuw
Patreon 都開咗啦，八月中正式開始！
https://www.patreon.com/echoofheart?
－－－－－－－－－－－－－－－－－
【廣告】《無異之初》、《無異之地》、《時間守衡者》、《絕命上映》、《絕望走廊》、《絕無轉機》各大書局有售！
－－－－－－－－－－－－－－－－－
IG：echoofheart
