關於 鬼天廈上映時間 ，我們在網路上蒐集到這些相關的討論、資訊與評價

【#包場報名】
糧食供應所 X Dark Wings《鬼滅之刃 劇場版 無限列車篇》香港應援包場正式開始了！！！🥰🔥

由去年看到預告就已經非常期待香港上映的《無限列車篇》！！在臨近上映之際，我們決定要舉辦應援包場！！！

這次都會為大家準備好紙巾以及喉糖的！！（擁抱大家
和我們一起登上無限列車，在超巨幕前大聲呼喊吧！！！

【#應援包場資料】
戲院名稱：嘉禾海運戲院（超巨幕）
地址：九龍尖沙咀廣東道3號海運大廈地下
日期：2020年11月15日（星期日）
取票開始時間：2:45PM
電影開始時間：4:30PM
電影片長：117分鐘
票價：115 HKD /位
（每位参加者均可獲贈電影官方送出海報以及明信片各一份！）
接受付款方法：HSBC／恆生／轉數快／PayMe
△ 名額先到先得，並以我們收到《付款證明》的時間為準，敬請留意～

【#報名方法】
前往糧食供應所網站購票→ http://bit.ly/kimetsudwfu
（如果不能打開連結，可以到下面留言scan QR code前往網站）

＊如有需要，可以參考《購票教學》：http://bit.ly/fucourtdwtutorial
＊請於提交訂單後三天內入數確認，逾時入數需重新查詢，以確保有足夠名額

【#注意事項】
⚠️活動乃應援包場，所有人觀賞電影時可大聲應援，想安靜觀賞電影人士請三思。
⚠️座位隨機編配，但會儘量安排與同行者鄰座
⚠️ 舉辦應援場的目的是可以與同好交流，敬請尊重每個角色和作品，希望包場同好們能一同好好享受！
⚠️ 如參與人數不足或場地問題而未能成功舉辦此活動，我們會安排全數退款，屆時相關安排會另行公佈，惟參加者因私人理由而無法出席這次活動，將不設退款 ><
⚠️因應疫情，活動當日會採取特別措施安排。當中包括每位參加者必須進入戲院前量度體溫等等，措拖詳情請細閱商品描述內的★【疫情特別安排】★🙇‍♂️🙇‍♂️

如有任何查詢，歡迎DM以下平台：
Instagram: @thefucout
Facebook: https://www.facebook.com/thefucourt
Instagram: @darkwings2d
Facebook: https://www.facebook.com/darkwings2d/

最後就是要感謝大家的支持！～期待與大家一起應援！

#鬼滅之刃 #鬼滅之刃劇場版無限列車篇 #無限列車 #包場 #應援包場

【屍人屋苑】病毒變種、喪屍橫行，一個關於選擇的故事…（下）
　　
活咗三十幾年人，我真係從冇諗過自己有一日要出賣身體去換取糧食。但呢個選擇都係為咗可以生存落去……
　
當然，即使我係應承咗程叔佢哋，但為咗保障自己、同時守住僅餘嘅尊嚴，事前我哋都有約定三章──呢場「交易」只會喺我屋企進行、只會接受一對一、身體不適嘅話我係有權拒絕……而佢哋都好順攤咁接受咗。
　
記得我嘅第一個「客人」正正就係Steven。初初傾計打破尷尬氣氛嘅時候，Steven同我講，程叔佢哋應該係見佢曾經救過我，所以作為第一次應該唔會特別抗拒。而事實的確唔算壞……
　
「我知道同妳講加油好似有啲奇怪……」當『交易』結束後，佢一邊著返衫一邊同我講：「總之，妳有咩需要就同我講喇。」
　
記得當晚Steven走咗唔係好耐，程叔佢就接住出現。
　　　　　
－－－－－－－－－－－－－－－－－－
《屍人屋苑》前幾回：
https://www.facebook.com/pg/Echo.of.Heart/photos/?tab=album&album_id=1935947799870360&__tn__=H-R
　
《無異之地》實體版，網上預訂有折同各種禮品！
https://www.ideapublication.com/products/unusual-region
－－－－－－－－－－－－－－－－－－
　　
「其實我最憎食人口水尾，」程叔行入門口之後講：「不過喺而家呢個環境，都冇得介意咁多喇，而且我係有準備㗎。」佢喺袋裡面拎出一盒安全套。
　
因為有過不愉快嘅經歷，所以我當然先入為主咁覺得呢次「體驗」肯定會好差，但實際情況卻又出乎我意料……雖然平時程叔俾人感覺非常粗鄙，但喺床上面嗰陣卻又好似換咗另一個人咁。而且，雖然叫佢做「叔」，但佢實際年紀都只係四十多啲，依然係我仲可以接受嘅範圍裡面……
　
但就算身體接受到，生活一下子變化咁大，心理上始終係會出現偏差。
　
最初嗰幾日，每次送完「客人」走剩低自己一個人嘅時候，我都會忍唔住走入廁所崩潰大喊，覺得自己全身上下都好污糟、越諗就越覺得發生過嘅事太噁心。連披單枕頭都唔想再掂、結果就喺浴缸上面攰到瞓著咗……
　
呢種痛不欲生嘅感覺，足足維持咗成個星期。直到眼淚終於都流乾後，為咗掩蓋內心嘅痛苦，我開始會睇返阿豪之前買落嘅心理小說，然後不斷諗啲正面嘢去安慰自己。
　
譬如話，我根本就唔需要怕呢啲「醜事」會傳開去。喺喪屍橫行嘅世界，互聯網同手提電話早就已經成為過去式。而且親戚朋友唔係已經「離開」就已經失去聯絡，就算真係有緣再聚，可能都已經係講緊幾年後嘅事……
　
然後，防衛隊嘅嗰班男人都算係幾遵守我嘅條件。起碼最初呢段時間都冇出現過違規情況。或者，佢哋都想呢段關係可以保持長久，所以先唔敢亂嚟……
　
最後，係「交易」後佢哋留低嘅糧食，確實係比起我最初想像嘅多。我開始會儲埋一啲放得比較耐嘅糧食，或者將來係有機會用到……而且，之前Steven話過有需要就搵佢，我確實係有好好利用到呢點……
　
「妳話……想要老鼠藥？」躺喺旁邊嘅Steven聽完我講之後，不禁露出疑惑嘅眼神。
　
「嗯，上次王伯嚟嘅時候話喺後樓梯見到有老鼠。我驚唔處理嘅話，之後會引起好大問題……」
　
「原來係咁……好喇，等我聽日出去搵資源嗰陣留意下。」
　
我當然知道出賣身體係一條歪路，但呢條歪路……確實令我得到安穩而又可以溫飽嘅生活。換轉你係我，你又有冇信心可以喺呢個困境下搵到其他出路？
　
我冇勇氣、怕死、亦都冇能力……所以，剩係可以選擇呢一條路。
　
轉眼間又過多一個星期，當我開始慢慢習慣呢種生活嘅時候……鍾意作弄人嘅上天，又開始咗佢嘅下一個動作。
　
當晚，送走咗Steven之後。見時間唔早，我本來諗住清潔下床鋪，順便洗下啲內衣，但聽朝天光嗰陣可以拎去曬下……
　
「咦？」但就喺我執床嗰陣，竟然俾我見到有把短刀連埋刀鞘留咗喺床上面，「睇嚟應該係Steven留喺度……」
　
出於好奇，我先小心翼翼咁將把刀喺鞘裡面抽出嚟，然後胡亂咁揮動兩下。望住鋒利嘅刀身，我不禁諗……Steven到底用呢把刀殺過幾多隻喪屍？
　
下一刻，腦中又再一次閃過當日嗰隻男喪屍。雖然餘悸猶存，但我知道的……總有日我係要再次面對佢哋。而為咗呢日來臨嘅時候可以保護自己，我確實有必要準備下。
　
諗到呢度，突然心血來潮，我決定親自落去二樓基地，將把刀交返俾Steven嘅同時，希望搵到人願意訓練我去面對喪屍……
　
然而，當我穿過幽暗嘅走廊嚟到二樓走廊嘅時候，等緊我嘅卻係一個震撼嘅「真相」。
　
「程叔……你有冇試過夜晚瞓教嘅時候夢見Adam？」
　
係Steven把聲，一聽到Adam呢個名，我下意識停低咗腳步……明明只需要行多兩步就會去到大閘前，但我卻企喺一個可以偷聽到嘅位置。
　
「你確定要喺呢個時間提起佢？」程叔回應：「你真係唔怕撞鬼？」
　
「我都好想擺脫佢……但每次合埋眼……都會回憶起佢當時嘅表情……」Steven用痛苦嘅語氣講：「明明我哋出生入死咗咁多次……點解要因為咁嘅理由背叛佢……」
　
……背叛？
　
「你唔係內疚呀？Steven……佢係抵死㗎！」程叔加重語氣，「明明有個老婆喺十五樓仲偷偷養住另一個女人！你記唔記得嗰一日……我哋已經係好聲好氣咁同佢講，叫佢有『好嘢』要識得分享，但條陷家產竟然第二日即刻叫小芙唔再落嚟！」
　
「但係……」
　
「唔好但係喇，Steven……呢件事已經過咗去。而家咁咪幾好囉？我哋有女齊齊上，皆大歡喜。而且，你要記住……當時落手殺佢嘅人唔係我哋，而係班喪屍。」
　
　
　
「我哋只係太過粗心大意，唔小心反鎖咗道門啫。」
　
　
　
聽到呢度，我腦海開始急速咁運轉起嚟。記得當晚，程叔明明話佢哋係遇到其他生還者，Adam先會出事俾喪屍咬中……
　
「你係有咁多時間亂諗嘢，不如幫手定個計劃……去海邊搵架遊艇離開呢度仲好喇。」
　
但原來唔係咁，Adam之所以會死……係因為Steven同程叔背叛咗佢。雖然唔知道實際情況係點，但若果佢哋當時冇反鎖道門……
　
Adam就唔會死。
　
而佢哋之所以咁做，目的就係想我失去Adam呢個依靠……然後，好自然就會順晒佢哋意。
　
當我將所有碎片串連埋一齊之後，久違嘅噁心感再一次湧上喉嚨。我幾乎就要發出聲，但我最後強忍住……
　
「但離開呢度又可以去邊？」
　
「去搵個島呀，我哋可以帶啲種子去，重新過耕田嘅生活……總好過留喺呢個連太陽都見唔到嘅大廈，根本睇唔到將來……」
　
「但呢座大廈仲有其他人需要我哋……」
　
「我哋需要佢哋嗰陣又唔見佢哋肯幫手？後生仔，記住人善被人欺呀……」
　
我趁住佢哋對話，用最細嘅腳步慢慢向後退，最後退返去後樓梯。慢慢閂埋防火門之後，先至加速跑返去自己屋企……
　
當晚，我又再一次喺浴缸崩潰大喊。但今次喊到底之後，等緊我嘅並唔係要面對現實嘅無奈……而係憤怒。
　
一種，被欺騙而生嘅憤怒；
　
以及另一種……渴望復仇嘅憤怒。
　
幾日後，我揀正佢哋出發搵資源前再次落到基地，眾人見到我嗰陣當然係好驚訝。
　
「係咁嘅……我見好耐冇為你哋煮過飯，所以咪落嚟睇下有冇機會……」我帶住笑臉講：「就當係報答你哋對我咁好。」
　
「小芙，我之前都講過，我哋已經冇乜資源亂咁用。」程叔睇嚟興趣不大。
　
「程叔，既然阿芙咁有誠意……咪俾佢煮一餐囉，反正我哋都好耐冇食過。」防衛隊另一個成員馬哥接住講。
　
「同意……」Steven跟住和應：「最多今次出去我落力啲拎多啲嘢返嚟。」
　
「嗱，你話架，唔好到時又話我迫你冒險。」程叔講完再望向我，「咁今晚就靠妳喇，記住唔好令我哋失望。」
　　
「嗯。」我點點頭。
　
「唉，」王伯嘆咗口氣，「最衰屋企個老虎乸開始懷疑，叫我今晚出完去要即刻返歸，唔係我都想再試多次小芙嘅廚藝……」
　
「你咪拎啲嘢返去叫老婆煮囉。」馬哥提議。
　
「咪搞啦，我寧願食過期餅乾……」
　
「哈哈哈哈……」
　
就係咁，所有人都帶住笑容出發。冇人有過懷疑、冇人知道我接住落嚟準備做啲咩……
　
呢一餐飯，我可以話係比過去任何一次都落力。等到佢哋順利回程見到飯台上面嘅飯餸後，每個人都即刻雙眼發光，好似流晒口水咁……
　
「喂，我唔等啦……食先。」程叔第一個坐低食飯。
　
「嘩，今晚連湯都有？」王伯本來打算放低啲嘢就走，但見到有湯都停低落嚟。
　
「係呀，之前我叫Steven出去嘅時候偷偷執啲湯包返嚟。」
　
「原來你個袋就係裝呢啲嘢裝到冇晒位。」程叔睥咗眼Steven，飲咗啖湯再講：「不過見幾好飲就算喇。」
　
「王伯，你唔介意咪倒啲返去，我記得廚房有保溫壺……」
　
「都好喎，咁就拜託妳啦……」
　
結果開飯都唔洗幾分鐘，台上面嘅飯餸都已經清得一乾二淨。
　
「如果我仲有機會娶老婆嘅話，一定要搵個好似小芙你咁嘅。」馬哥飲咗少少酒之後開始胡言亂語。
　
「馬哥，你咁講大抬舉我喇。」我客氣咁回應。
　
「邊有抬舉？入得廚房出得廳堂，哈……床上功夫又了得……」
　
「喂，」程叔推一推佢，「咁多人面前唔係講呢啲呀？」
　
「你扮咩嘢呀？呢度有邊個未幫襯過佢先？」
　
「你……」
　
「好喇好喇，大家唔好嘈。」我注意到程叔開始青筋暴現，所以即刻勸交，「大家照顧我我係好清楚……」
　
「係囉，小芙。」馬哥搭住我膊頭講：「其實在座除咗程叔之外每一個都係好男人嚟，妳應該要認真考慮下……」
　
「馬哥，你應該係醉喇。」我慢慢企起身，「等我入去倒杯水俾你……Steven，你洗唔洗？」
　
「吓？」Steven抬起頭望向我，明顯係心不在焉。
　
「我見你已經靜咗好耐……」
　
「冇……我只係覺得個肚好似有少少唔舒服，可能係晏就食錯過期嘢……」
　　　
一聽完佢呢句，我就知道時間應該差唔多了。本來每個人體質就唔同，加上飯餸食嘅份量都有分別，所以好難做到完全準確。但唔理點都好，終於要到了……
　
「啊……我都好似想嚟料。」馬哥等唔切我杯水，第一時間就衝入廁所。
　
慢慢、剩低落嚟嘅三個人……包括程叔都開始感覺到身體有唔妥。
　
「小芙，妳係咪用咗唔新鮮嘅材料……」程叔初初都未懷疑到嗰一步，直到佢見到我當刻嘅眼神，「妳……」
　
「我有冇同你哋提過我以前大學讀咩科？」我隨便將杯水放喺鞋櫃上面，然後慢慢行去大門前，「係病理學。」
　
「阿芙……」Steven聽完瞬間恍然大悟，即刻將手指放入喉嚨裡面想扣喉，「嘔……大家，快啲將啲食物嘔出嚟……入面有老鼠藥！」
　
「唔撚係嘛！？」
　
眾人反應都好非常，程叔本來想第一時間衝過嚟。但我趕得出係腰間抽出一把短刀，嚇到佢即刻停低落嚟。
　
「啲飯餸裡面唔單止有老鼠藥，仲有好多你哋唔識、亦都想像唔到嘅嘢……只係為咗可以一擊即中。」
　
講到呢度，我已經退返出走廊，然後一手閂返埋大閘。
　
「但妳明明自己都有食……」
　
「因為每樣餸我都係煮兩次，一次有落一次冇……然後小心翼翼咁擺好碟，等我可以食安全嗰部份……但其實你哋頭先食咁快，應該都冇留意到我根本冇點食過。」
　
「可惡……」程叔撳實自己個肚，強忍住痛楚問：「妳……點解要咁做？」
　
「我本來都冇諗過會行到呢一步，只係儲定啲原料未雨綢繆，等你哋真係越界先落手……但結果，前兩日嘅事改變咗我。」
　
「妳知道咗真相……」程叔馬上理解過嚟，「Steven……今次真係要多謝你……啊……」但佢都阻止唔到一切，終於痛到跪喺地上面，迫於無奈要跟住其他人一齊扣喉。
　
嘔、嘔、嘔……
　
明明成個畫面應該係好噁心先係，但我卻反過嚟有種復仇嘅快感，好想好好記住成個過程。
　
「喂！阿志，唔好瞓低呀！頂住！」見其中一位同伴終於忍耐唔住瞓低，程叔即刻大喊道。
　
「你顧掂你自己先……時間冇多喇。」我冷冰冰咁講。
　
「我同妳講，外面嘅喪屍殺唔死我哋……妳落嘅毒都唔會……啊……」
　
「放心……我會喺度睇，直到結束為止。」我冷笑一聲。
　
「阿芙……」Steven痛到蜷縮住身體，用盡最後一口氣抬起頭同我講：「我對妳唔住……」
　
「呢句說話……你自己留返同Adam講。」
　
「八婆！」程叔一拳用力敲落鐵閘。但呢一下，已經係佢最後可以做到嘢。
　
就係咁，我一直盯實佢哋，直到佢哋每個人塊臉都由蒼白變成紫色……最後一個又一個咁瞓低，再冇起返身。
　
回過神嚟，我已經返番去自己屋企。飲杯水冷靜落嚟後，我開始收拾行裝，準備下一個行動……
　
雖然係親眼睇住佢哋瞓低，但都難保會有意外。而且佢哋屋企人遲早都會發現到呢件事，然後矛頭肯定會指向我身上……
　
所以，由我下定決心要為Adam報仇嘅一刻，我已經諗好咗要離開呢座大廈。就算結果係死，至少呢個都係我嘅選擇。
　
啪、啪啪！
　
然而，當我執到一半嘅時候，大門居然傳嚟拍門聲。我當然係嚇一跳，拎起把刀慢慢行到大門前，透過魚眼望出去。
　
係王伯，點解佢飲完碗湯會冇事？係份量唔夠？抑或……佢根本就冇飲到？
　
我曾經有一刻諗過唔應門，咁照道理佢見冇人應該係會自行離開。但一望到佢嘅表情，一臉笑淫淫咁樣……咁其實有好大機會，佢根本就未知下面嘅情況，上嚟只係為咗一個單純嘅目的。
　
「冇人嘅……唔通未上嚟？」王伯喺門外面自言自語。
　
既然係咁嘅話，係咪可以反過嚟利用呢點……「處理」埋佢？
　
因為，王伯肯定唔係無辜，佢一定都有份害死Adam。
　
諗到呢度，我再次鼓起勇氣。先衝返入房將打包到一半嘅行裝收埋喺床下底，再將把短刀攝喺床嘅邊緣位。搞掂好晒先返過去打開大門。
　
「哈，妳果然喺度……」王伯一臉歡喜，「點解咁遲先應門嘅？」
　
「哦……見有啲攰所以恰咗陣。係呢，你唔係老婆叫到今晚要留喺屋企咩？」我邊開門邊問。
　
「嗰隻老虎乸呀，食完飯之後就話肚痛走咗入廁所……佢出名去得耐嘅，我咪趁呢個機會偷偷上嚟搵你囉。」
　
唔通，碗湯係俾佢老婆飲咗？如果係咁嘅話實在係太可惜……
　
「總之，冇咩時間喇。」王伯入嚟之後即刻幫我閂門，睇得出佢非常心急，「今晚要速戰速決……」
　
佢本來想即刻錫過嚟，但我反射性咁避開咗。
　
「做咩避開啫，上次都唔係咁㗎？」
　
「上次我刷咗牙……啱先又食完飯嚟，所以有少少唔好意思……」為咗唔想惹佢懷疑，我即刻拉住佢手，「嚟啦，我哋入房繼續。」
　
「傻婆……我點會介意呢，嘿嘿。」
　
咁多個客人嚟講……王伯應該算係我最討厭嘅一位。因為佢一直都係要求多多，只要一唔順佢意就會即刻黑臉。如果要我估防衛隊裡面邊一個會先違反我嘅條件，呢個人一定係王伯……
　
「你坐低先……我先入廁所洗個手。」我講。
　
「其實唔需要啦，不過妳鍾意。」王伯坐低之後即刻急不及待除衫除褲。
　
入到廁所，我先洗個凍水臉。然後用最短嘅時間擬定計劃……當心態已經準備好之後，我都跟住除去上衣，再慢慢出返房……
　
「咦，今晚居然係著粉紅色內衣……睇嚟妳真係開始習慣呢種生活喇？」
　
「咁都係因為有你哋關照……王伯，不如你先瞓低，等我幫你按下摩？」
　
「唔……」王伯思考咗兩秒，可能都係驚時間唔夠，「好喇，反正都上得嚟，唔理個老虎乸點諗喇，享受咗先。」說罷就背脊朝天咁攤喺床上面。
　
我先坐喺佢側邊，然後用雙手開始幫佢按膊頭。其實呢個已經算係一個絕佳嘅落手姿勢。但如果突然鬆開一隻手嘅話，佢好可能會有所懷疑，所以過程一定要好迅速……
　
「喂，小芙……我都已經幫趁過妳幾次，今晚係咪應該可以試下其他嘢呢？」
　
「吓？」我本來已經想拎刀，但俾佢呢句打窒咗，「即係咩……」
　
「嘿……妳咁都唔明？用口呀，我細佬已經好耐冇俾人用口服侍過。」
　
「咁……好似唔係幾好嘅。我始終冇呢種經驗，驚整傷你……」
　
「妳又係咁喇？經驗呢啲嘢，試得多就熟㗎啦？小芙呀，妳要識多啲玩法，啲客先唔會咁快玩厭……唔係遲早會有第二個人取代妳。我都係教精妳咋。」
　
一聽完佢呢句，怒意又再一次湧上心頭。
　
「啊……爽呀，就係呢種力度……」
　
「等我幫你按下腰？」我邊講邊縮走右手，但其實係移去床邊攝刀嘅位置。
　
本來只係剩低幾吋，但王伯突然擰轉頭望向我……
　
「妳做咩仲著住胸圍？唔係到而家都仲咁怕羞呀？」王伯即刻撐起身，「等我嚟幫妳啦……」
　
見先機錯過咗，我下意識收返埋拎刀嘅手。但呢一步……卻錯誤咁被王伯發現到。
　
「妳……」佢好順手咁解開背扣嘅同時，雙眼卻移向床邊位置，「係咪收埋咗啲咩？」
　
我冇回應，當刻已心知不妙，搶喺佢發現之前拎出短刀。
　
「你去死喇！」
　
我用盡最大嘅力度想一刀直插落王伯嘅心口，但佢竟然反應得切捉住我握刀嘅手腕。雖然我已經出盡力，但最多都係形成僵持狀態……
　
「八婆……妳竟然想殺我！？」佢用另一隻手一把用力摑落我塊臉到。
　
「吖！」因為力度太大，所以我即刻痛到瞓低，刀亦都從右手甩落床。
　
「我當年係做警察㗎……想殺我！」王伯咆哮道，同時執返起把刀。
　
當我以為萬事皆休。但就喺呢個時候，大廈外面突然傳嚟某人嘅大喊聲。因為呢度係七樓，所以聽得非常清楚……
　
──就快……頂住呀！
　
「外面搞咩……呀！？」
　
我趁住王伯呢下遲疑，想博最後一鋪將把刀搶返過嚟。
　
──快呀！
　
「妳仲嚟！？」我用兩隻手同時捉住佢手腕，今次王伯顯得好吃力，「可惡……」
　
王伯企圖用另一隻手扭返開我隻手，而我就重新起身想方便發力，之後嘅發展相當混亂……
　
……而呢場搏鬥，終將會迎嚟一個結果。
　
──嘶。
　
一陣好似俾冰劃過嘅刺痛感喺喉嚨傳過嚟。我一開始都未意識到狀況，直到開始感到有暖流喺痛楚嘅位置流出嚟……
　
「啊……出事……」見我鬆開咗手，王伯成個人呆住咁望實我，可以見到佢腰間染上咗鮮血，「……點解要搞到呢個地步呢？」
　
呢一刻，好似所有嘢都突然改變我好快咁。下一秒我已經開始有種頭暈嘅感覺，感覺成個世界天旋地轉、身體亦慢慢變凍……
　
但我用盡最後一口氣起身，腳步浮浮咁衝入廁所，然後望向玻璃鏡……
　
我嘅喉嚨俾刀劃傷咗。因為血不斷流、環境又黑、所以睇唔到傷口有幾深。我嘗試發出聲，但下顎只係郁少少已經傳嚟劇烈嘅痛楚……我伸手去拎起洗手盤旁邊件衫止血，但只係撳咗一陣就瞬間沾滿血。
　
「今次真係大獲……」我依稀聽到王伯喺外面講，但佢並唔係指緊我。呢刻佢企埋喺窗邊望緊大廈外面，「到底係邊班人引成班喪屍過嚟？」
　
下一秒，佢重新望過嚟。
　
「妳唔好怪我呀……所有嘢都係妳自己攞嚟！」說罷，佢即刻行埋去打開旁邊嘅櫃，然後喺裡面拎出一包又一包食物，「反正妳都用唔著，就當益下我。」
　
呢刻，我已經無能為力作出反抗，只可以眼白白睇住佢搶走我嘅嘢。如果佢唔係太心急，應該早就注意到床下底嘅行裝，然後就可以拎走更多……
　
「再見喇……我會故意唔閂門，等班喪屍嚟搵妳。」王伯笑住講，然後就轉身跑走。
　
結束了。
　
呢刻我已經全身軟弱無力，冇辦法行返出廳閂門，只可以過去輕輕推返埋廁所門。然後，跨過浴缸，成個人坐喺上面……一種熟悉而又溫暖嘅感覺重新蓋過一切痛苦。
　
終於結束了。
　
其實，當日遇到第一隻喪屍嗰刻我就應該要死……只係命運鍾意作弄人，先故意留我到而家，成為一班男人嘅玩物。
　
而我到最後，都係冇辦法離開呢座大廈、冇機會見返自己嘅父母。
　
天啊，點解到我認真想為自己作出選擇嘅時候，最後卻係得到咁嘅結果？
　
我雖然唔甘心，但至少……我有嘗試過。
　
「小芙……其實比起好多人，妳已經算係好彩。」意識朦朧間，我見到阿豪企喺浴缸外面同我講。
　
「我冇出過去……又點會知咁多呢……」我無奈咁笑住講，慢慢合埋雙眼。
　
「小芙……我知道妳為咗我，已經盡咗力。」接住輪到Adam把聲響起。
　
「……可惜……仲差一個人……」
　　
「夠㗎喇，既然班喪屍入咗大廈……佢遲早都會得到應有嘅下場。」
　
「希望……係咁……」
　
「所以……妳就好好瞓喇。」
　
　　
　
「瞓醒之後，我哋約定好喺另一個地方再見面。」
　
嗯……
　
一言為定。
　
（完）
　
點解呢章拖咁耐，因為過程諗到兩種發展方式。如果書展延到十二月有機會出《屍人屋苑》實體版嘅話，我會喺書入面試下寫埋另一種嘅發展。
　
下一章，換個角度講下大廈以外。不過，無異之局先。
　
睇完又鍾意呢個故事嘅，記住幫手分享開去呀！
　
　
《無異之地》實體版，網上預訂有折同各種禮品！
https://www.ideapublication.com/products/unusual-region
　
－－－－－－－－－－－－－－－－
　
【地方的無默媽資助計劃】（試行中）
　
近年作者生存空間越收越窄，大眾結業更加似係雪上加霜。所以推出資助計劃，希望各位可以直接課金支持。計劃並唔係強制性，一蚊可以，想繼續免費睇亦無妨，有心就可。
　
Payme 連結：
https://payme.hsbc/echoofheart
　
轉數快 FPS ID：6065460
　
計畫緣由及詳細內容：
https://bit.ly/39b5Fuw
　
－－－－－－－－－－－－－－－－－
　
【廣告時間】《無異之初》、《時間守衡者》、《絕命上映》、《絕望走廊》、《絕無轉機》各大書局有售！
　
－－－－－－－－－－－－－－－－－
　
IG：echoofheart

【屍人屋苑】病毒變種、喪屍橫行，一個屋苑困獸鬥的故事……（完）
　
一切實在發生得太突然。當隻女喪屍撲低我準備咬埋嚟嘅時候，我真心以為自己死硬……
　
但佢咬唔中，可能係我掙扎之下改變咗佢咬嘅位置，又或者一瞬間嘅反射動作避開咗。總之，大難不死必有後福，我即刻出盡九牛二虎之力將佢推埋一邊。
　
「嘶啊啊啊啊啊！」但女喪屍依然死心不息，佢同我幾乎係同一時間撐起身。
　
我本身想抽刀，但佢早一步撲埋嚟，我剩低一隻左手擋唔住，結果俾佢撞埋去煮食爐嗰邊。佢再一次想咬埋嚟，但我右手正好掂到易潔鑊嘅手柄，用力握實向住女喪屍嘅頭直揮過去。
　
碰！
　
一聲悶響，女喪屍俾我直接打中失去平衡、動作亦都慢咗落嚟。見狀，我用一手一腳將佢推出廚房。見拉開咗一個安全距離，今次我順利抽出刀，下次攻勢一定可以殺死佢……
　
「啊啊啊啊啊啊啊！」
　
「唔好去呀！」
　
「琪琪！？」
　
女喪屍、阿俊、琪琪幾乎係同一時間大嗌。我唔知發生咩事，當刻只係一心想解決眼前隻女喪屍。但就喺佢再次衝埋嚟嘅一刻，突然有人擋喺我同佢之間……
　　　
－－－－－－－－－－－－－－－－－－
《屍人屋苑》前三回：
https://www.facebook.com/pg/Echo.of.Heart/photos/?tab=album&album_id=1935947799870360&__tn__=H-R
－－－－－－－－－－－－－－－－－－
　　
「媽！」喺琪琪，佢背對住我用力抱住隻女喪屍，「唔好啊！」
　
我當刻已經落刀，刀口只係差一吋就會插中琪琪嘅後頸。
　
「妳搞乜嘢呀！？」我當然係好難以置信。
　
但琪琪冇理我，佢出盡全身力量將女喪屍慢慢抱後。可以見到隻女喪屍依然係睜大雙眼望住我，雙手不斷揮舞、十指瘋狂咁亂抓，血盤大口又開又合。明明身邊就有一個可以咬嘅人，但佢依然將目標放喺我身上……
　
「媽！夠喇……我已經夠喇！妳入房先……求下妳……」
　
「真係神奇……」阿俊慢慢行入廚房，一直茫然咁望住琪琪同女喪屍，「隻喪屍居然唔會咬琪琪……呢種情況你以前有冇見過？」
　
「冇……」我冷冷咁回應，殺意依然係充斥住我腦海，「唔得，我要過去殺死佢……」
　
「喂！」阿俊伸手想拉住我。
　
「我差啲死呀！」我大聲咆哮，「差少少就會俾佢咬死！你唔係為咗條女搞到傻咗呀！？」
　
「我明……」
　
「你明條撚！」我一直盯住嗰兩母女，睇嚟琪琪係打算推佢入房。
　
「反正你都打算過去啦？」阿俊嘗試說服我，「呢邊不如交俾我處理？」
　
雖然好想拒絕，不顧一切咁衝埋去一刀插落女喪屍嘅天靈蓋。但而家咁樣俾打窒咗條氣，冷靜落嚟，恐懼感瞬間散播全身每一個角落。我可以感覺到雙手喺度震緊，背脊亦都出滿晒冷汗……
　
「你有冇受傷？」阿俊輕輕拍一拍我肩膀。
　
「唔好掂我！」我反應非常大，轉身行埋去窗邊，先搓一搓雙手，然後開始綁繩，「你自己望下個雪櫃……條女係癲㗎，你留喺度肯定死硬！」
　
「嗰條屍就係王伯。」琪琪返到嚟開聲回應，嚇到我成個人震一震。
　
我即刻轉身，再一次舉起刀，好驚隻女喪屍會再一次出現。
　
「就喺你哋闖入屋苑嗰一晚，王伯為咗避喪屍所以上咗嚟呢度。本來頭幾日都相安無事，係直到前晚，佢突然入我房……仲想強……」琪琪顯得相當痛苦，「……強姦我……」
　
「所以妳就殺咗佢？仲分佢屍？」我質問。
　
「唔係我……係我媽……趕到嚟殺死佢……然後……然後我……」
　
「嗰個唔係妳阿媽，係喪屍！妳媽已經死咗！」我咆哮，「哦……我明喇，妳之所以放王伯條屍喺雪櫃，就係想拎佢嘅肉嚟食……」
　
但因為斷電嘅緣故，雪櫃早就冇咗冷凍功能。但放入去多少可以阻隔氣味，所以我同阿俊先一直注意唔到。
　
「我唔係……我只係想……吖吖吖吖吖吖吖吖！」琪琪尖叫一聲，然後跪喺地上面抱住頭。
　
「你而家明喇！？」我望向阿俊，「條女分明有妄想症，覺得佢阿媽仲未死！佢仲要食人！我哋咁耐以嚟都冇試過咁做！」
　
「夠喇，老超……」阿俊跪喺琪琪旁邊，對住我搖搖頭，「你過去先喇。」
　
「算，你死你事！」
　
我用力推開廚房窗，先探頭望出去，可以見到外面有個固定咗嘅晾衫架。雖然唔敢保證踩上去穩陣，但只要事先綁好繩，就算發生咩事都應該唔會跌落去……
　
「我過去啦！」當一切準備就緒之後。我先回望阿俊一眼，佢依然安慰緊琪琪，「如果我跌咗落去，你就喺度同佢長相廝守啦！」
　
說罷，我小心翼翼咁爬出窗外面。一開始先坐喺窗邊，右腳稍微用力踩一踩晾衫架，感覺穩陣先慢慢起身，過程一直扶住窗框，唔敢將重心放喺下半身、更加唔敢直望落下方……
　
我開始感覺到掌心出汗，又擔心自己腰繩綁得唔夠緊……廿五樓，跌落去一定係粉身碎骨……我伸出左手抓住另一室嘅窗邊，好彩呢一戶嘅主人本身冇閂好窗，所以免去一層功夫。
　
我拎出預先準備好嘅爆窗工具，只要解開埋窗框嘅鎖就大功告成。呢三個月實際上已經爆過好幾次，可以話係駕輕就熟……
　
終於，「嘭」一聲爆開窗鎖之後，我即刻用力推開窗框，然後毫不猶豫直接爬入去隔離屋嘅廚房。雖然最難嘅部份完成咗，但我都未敢放鬆心情，因為屋裡面絕對有可能隱藏其他危機……
　
「Hello！？」我邊解開腰繩邊大嗌，同時用刀尖擊打廚房嘅瓦磚。
　
假如屋裡面有人或者喪屍嘅話，聲音咁大係肯定會聽到的。
　
但直到我行出廳，依然冇出現任何異樣。見係咁我終於鬆一口氣，行埋去梳化成個人瞓喺上面。當我望住天花板嘅時候，有一瞬間真係諗過乾脆成世人留喺度就算……
　
但我知道冇可能的。只要捱埋呢兩日，我先可以正式脫離呢個人間地獄。
　
休息咗大約五分鐘，我開始檢查屋入面嘅每一間房。呢間屋嘅主人係一對中年夫婦，佢哋仲有一個睇落似係中學生嘅仔。一啲都唔意外嘅係，間屋果然係冇晒食物。所以估計佢哋應該係為咗搵糧食而被迫離開屋企，結果就再返唔到嚟……
　
類似嘅故事，呢三個月應該發生喺好多家庭身上吧？
　
檢查完畢後，我重新返到去廚房，然後開口問：「阿俊喺唔喺度？」
　
「喺度。」阿俊好快就回應：「你嗰邊咩情況？」
　
「安全，你係咪而家過嚟？」我執返起地下嘅布繩。
　
「睇嚟你唔記得咗我哋要用電話鈴聲吸引班喪屍？」阿俊無奈咁講。
　　
喔，因為頭先根本係怒火中燒，所以確實冇咗件事。
　
「所以點都要有人留喺呢邊，個計劃先可以順利進行。」佢接住講：「你肯定係信唔過琪琪，所以一定係等我嚟。」
　
「你點解硬係要幫佢？」我問：「隻喪屍一直喺屋裡面仲要冇鎖好門，佢根本一早想我哋死。」
　
「真係咁嘅話，佢一開始就唔會千叮萬囑叫我哋唔好入廚房。」阿俊唔同意，「老超，唔怕老實講，頭先見琪琪攬住佢阿媽嘅時候，我真心覺得個畫面好感動……」
　
「吓？」我錯愕。
　
從我呢個受害者嘅角度睇，個畫面根本係又畸形又嘔心，諗返就覺得心寒。
　
「當初我阿媽變成喪屍嘅時候，佢先冇對我咁好。如果我唔係走得快，應該一直就成為下面班喪屍嘅同伴。所以，我真係好同情佢……佢身為一個女仔，可以捱到而家真係唔容易。」
　
我冇回應，而係望返大廈最底，喪屍數量依然係有增冇減。其實到而家，我都幾佩服自己有勇氣爬過嚟。
　
「係嘞，尋日同老豆傾電話嘅時候，佢留低咗個號碼俾我，話必要時可以用嚟聯絡聽晚揸直升機嗰班人。既然我部電話聽晚就會玩完，我想你幫手一齊記低個號碼，話唔埋之後有機會用得著。」
　
「講嚟聽下。」我裝作唔在乎。實際係趁佢見唔到拎出自己部電話，打開然後記低。
　
確認好聽晚九點半行動之後，我哋就各自返去休息。雖然阿俊講到自己好同情琪琪，但我始終唔係佢……我冇辦法原諒一個瞞住我嘅人，何況，我差少少就會俾佢阿媽咬死……
　
所以，我暗暗作出咗一個決定……
　
至於呢個決定最後會引至咩結果，就要交俾阿俊嚟決定。
　
*
　
【阿俊視角】
　
轉眼間就嚟到關鍵嘅一晚。半個鐘之後，直升機就會降落喺屋苑嘅天台。
　
早喺九點半之前，我已經預先較好電話鬧鐘，再將電話擺喺屋最入嘅嗰房間。
　
「媽，我要走喇。」行動之前，琪琪不忘向倒數第二嗰房間裡面嘅「媽媽」道別，睇得出佢仲係依依不捨。
　
……嗚……
　
尋晚我同琪琪傾咗差唔多一整晚，我幾乎係將自己三個月以嚟嘅故事原原本本咁話俾佢知──我阿媽係點死、我係點遇到老超佢哋、點解會剩低我哋兩個，最後又點解會避到嚟呢個屋苑……
　
當然，佢都有同我提到自己嘅故事。雖然三個月以嚟都係留喺屋企難免有啲乏味，但呢個都叫做係好開始……
　
雖然只係一晚，但我感覺同佢嘅距離一下子縮減咗好多。琪琪佢本性善良，正如我所講佢根本冇心害人，只係一直冇辦法放低「媽媽」。只要畀多少少時間，佢一定可以恢復過嚟……
　
而安全島，無疑係一個最好嘅療傷之地。
　
「妳搞掂就入廚房。」我企喺大門前同佢講：「之後等我指示……」
　
雖然隔住大門，但我可以聽到外面班喪屍開始躁動起嚟，就好似感覺到我哋即將會放佢哋入嚟咁。
　
我望住錶，等到最後十秒嘅時候，我先深呼吸一口氣，然後慢慢打開大門……
　
「嘶啊啊啊！」即刻有隻喪屍注意到呢邊然後用力撞過嚟，但結果當然係撞埋鐵閘。
　
雖然咬我唔到，但呢個舉動卻將其他喪屍一齊吸引過嚟。我鼓起最大勇氣解開鐵閘鎖，再輕輕用力拉開少少……
　
下一秒，最入嘅房間響起電話鬧鐘，而我就直奔入廚房。
　
「閂門！」我壓低聲同琪琪講。
　
佢即刻照做，臨閂門之際，可以見到班喪屍已經開始湧入屋。接住落嚟只可以寄望鬧鐘真係可以引晒佢哋入去，清空走廊……
　
我同琪琪合力將雪櫃擋喺門前，然後就照計劃，先由我過去……
　
「妳真係冇問題？」我綁繩嘅時候再問一次，「妳唔驚我過到去之後唔理妳？」
　
「唔驚，」琪琪搖搖頭，「我信得過你。」
　
確認繩綁得夠穩之後，我即刻把握時間爬出窗外。雖然我有少少懼高症，但呢刻已經冇得驚了。我踩上晾衫架，一個反身想直接爬過去隔離屋……
　
「吓？」
　
點會估到，隔離屋嘅窗框居然重新鎖上咗。而老超就企喺窗框後面冷冰冰咁望住我。
　
「老超你搞咩！？」我當然好驚訝，「做乜鎖返住個窗框……」
　
「好彩係阿俊你先過嚟，」老超舉起一條鎖匙，「咁成件事就易搞好多。」
　
「你到底玩咩呀！？」
　
「我冇玩，我要你拋低嗰個癲女人……只要你肯咁做，我就會開鎖俾你入嚟。」
　
「阿俊，發生咩事！？」可能見我留喺外面仲未入到屋，琪琪緊張咁問。
　
「冇事，妳千祈唔好出聲！」我抓實窗框盯住老超，「如果我唔應承呢？」
　　
「咁你哋就一齊留喺嗰邊喇！」老超呢個態度明顯係認真，「呢個女人咁痴線，就算我哋可以去到安全島，終有日都會俾佢害死！」
　
「你諗得太嚴重……」
　
「因為差啲死嗰個唔係你！」
　
「阿俊，班喪屍……班喪屍好似想撞入嚟！」琪琪慌張咁大喊。
　
見到呢個情況，我決定豁出去，直接喺外面解開腰繩，然後拋俾琪琪。
　
「琪琪，妳照我尋晚教妳咁，快啲綁繩爬出嚟！」
　
「阿俊，夠喇！放棄佢喇！」
　
「我唔會！老超，你仲記唔記得阿東？」我講到呢度伸隻手入去屋入面，「如果……我哋每一次都選擇見死不救嘅話，我哋同下面班喪屍又有咩分別？」
　
老超起初聽完係有少少動搖，佢先望咗眼手上嘅鎖匙，最後……
　
隨手將條鎖匙掉喺地上面。
　
「當然有分別……」老超邊講邊退後，「就係我依然生存緊。」
　
「喂，老超！」我終於忍唔住咆哮，「你咪走呀！」
　
但老超並冇停落嚟，一個轉身就跑出廚房。
　
「吖！？」我見到琪琪已經準備爬出窗外面，睇得出佢相當恐懼。
　
而同一時間，廚房嘅拍門聲亦都越嚟越響，班喪屍好快就會破門而入……
　　
「阿俊……到底點解會咁？」琪琪絕望咁望住我。
　
唔通，呢個就係我哋嘅命運？
　
*
　
【老超視角】
　
假如頭先係琪琪先爬過嚟嘅話，其實我係打算直接推佢落樓，一了百了。所以見到係阿俊先過嚟嘅時候，其實我仲鬆咗口氣……
　
但佢最後都係唔肯放棄嗰個女人，既然係咁，唯有等我放棄佢哋。
　
反正，早喺一星期之前我已經有意欲咁做了，只係佢老豆嘅電話改變咗我嘅諗法，所以而家只係回歸初心。
　
可能你哋會問，冇咗阿俊，直升機班人會唔會唔肯接我？我當然有認真考慮過呢點，事實上已經考慮咗成晚。
　
當我打開H室嘅大門，外面走廊果然係冇晒喪屍，睇嚟真係俾電話鬧鐘引晒入屋。我迅速咁推開後樓梯門，雖然聽到下方有喪屍叫聲，但我嘅目標係上層……
　
我一連跑咗好幾層，最後順利跑到天台。就好似怪我狠心一樣，天竟然開始落起滂沱大雨。但對於留喺窗外面嘅阿俊同琪琪嚟講，呢場雨無疑係雪上加霜……
　
我任由雨水拍打身體，一直提防住樓梯門，驚會有喪屍上嚟。等咗大約幾分鐘之後，終於可以聽到旋翼轉動嘅聲音。我抬起頭，見到有道光慢慢靠近。只要再過多陣，我就可以離開呢座大廈……
　
我先留喺安全位置，等到直升機停低落嚟先至敢行近，邊行邊大喊：「太好喇，我已經等咗你哋好耐！」
　
就喺下一刻，直升機一邊廂門打開，有個人舉住長槍指向我。
　
「你就係阿俊？」
　
我曾經有一秒諗過乾脆真係扮阿俊，但一諗到之後肯定會穿煲，最後都係「實話實說」：
　
「唔係，我唔係阿俊！」
　
「咩話！？」因為場雨太大，所以槍手聽得唔清楚。
　
「我唔係阿俊！阿俊佢已經死咗，但佢臨死之前留低咗個遺言俾我，叫我要親口同佢老豆講，所以你哋一定要送我去安全島！」
　
假遺言嘅內容我當然已經諗埋，但如果佢哋唔追問，我都唔會喺呢個緊張關頭慢慢解釋。呢刻，只希望佢哋會上當……
　
「好喇！」槍手揮一揮手，「快啲上嚟！」
　
我聽完當然好激動，正想快步走過去……
　
「喂，喪屍！你後面有喪屍呀！」槍手突然大嗌。
　
我一聽到警告即刻轉身，果然有隻男喪屍偷偷跑到我背後，因為直升機太嘈所以完全察覺唔到。好彩我反應得切，巧妙咁避過佢一撲，再順勢舉刀直插落佢後腦……
　
但危機仲未解決，有更多喪屍出現喺後樓梯位置，呢個數量我冇可能一個人解決。
　
「可惡！」我激動得咬牙切齒，「點解早唔嚟遲唔嚟，偏偏而家先出現？」
　
但令我更絕望嘅係，直升機嘅旋翼居然重新轉動起嚟。我望過去，見到直升機開始急速爬升。明顯係機師感覺到危機，所以唔敢冒險等埋我……
　
「喂！等埋呀！」
　
嘭嘭嘭嘭嘭嘭嘭嘭嘭嘭──！
　
連珠爆發嘅槍聲劃破長空，我下意識抱住頭，再擰轉身，見到班喪屍一隻一隻咁中槍倒地……
　
「好呀！就係咁……！」
　
嘭─────────
　
突然，右腹一下劇痛令我成個人失平衡跪喺地上面。我曾經有一刻以為係隻男喪屍未死，然後俾佢從後偷襲。但唔係，佢依然瞓喺地上面，就同其他喪屍一樣……
　
「……好痛……」
　
我伸手摸向右腹，可以摸到溫熱嘅液體不斷流緊出嚟。當血紅色嘅液體落到地板之後，隨即被雨水所沖淡……
　
「……唔係啩……」我有個好壞嘅念頭，但始終唔想承認。
　
唔通……我係……中槍……？
　
終於，一陣強烈嘅暈眩感襲來，我即刻支持唔住瞓落地。明明係好想起身，好想盡快離開呢個鬼地方，但身體卻開始變得僵硬起嚟。只能勉強向前爬，忍住痛楚不斷爬……
　
……可惡啊……好痛……點解會咁痛……
　
眼皮開始變重，但我知道自己唔可以瞓。就快了，就快會爬到後樓梯，之後我要即刻搵個地方止血……咦？
　
但就喺下一刻，有一個身影慢慢出現喺門前，我睜大雙眼想望清楚……
　
結果，出現眼前嘅，係一個未完嘅惡夢──
　
係琪琪嘅「媽媽」，佢居然嚟到天台，注意到我之後用緩慢嘅步伐行過嚟……
　
……等等先……
　
「……嗚……」
　
……搵人開槍……開槍幫我……喂……
　
一步、一步、又一步，琪琪「媽媽」嘅目標非常明確……
　
救命……救命……啊……好痛……
　
「……開……槍……」我嘅聲音變得好沙啞，「……救……」
　
終於，佢嚟到我面前，慢慢跪低。灰白空洞嘅雙眼裡面可以搵到我絕望嘅身影。
　
「嘶啊！」
　
*
　
*
　
*
　
感覺，好似發咗一場好耐嘅夢。
　
夢入面我去咗好多個地方，先係醫院、然後到地鐵站、辦公室、巴士車廂、最後係一間超市……過程中我遇到好多陌生人，每一個人都係用驚恐無比嘅眼神望住我。
　
尖叫、慘叫、最後恢復平靜……每次都係重複呢個輪迴。
　
記得，夢嘅最後，我去到一個中年女人面前，佢越望就越熟口面，唔知喺邊到見過。佢不斷走，最後俾我迫到去一個角落先嘗試反抗……
　
我本來差少少就會記得佢係邊個。但偏偏喺呢個時候，有一男一女嘅叫聲嘈醒咗我……
　
「係邊個？」我睜開雙眼。
　
返到現實之後，第一個感覺係全身上下都濕晒。慢慢撐起身，自己依然身處喺屋苑嘅天台。昏迷之前最後發生嘅事，係我好似中咗槍，然後琪琪嘅媽媽出現……
　
諗到呢度，我即刻望一望附近，見唔到嗰隻喪屍嘅身影，即刻鬆咗口氣……
　
「啊……」
　
我再摸一摸中槍嘅右腹位置，血好似已經冇再流，亦都再感覺唔到痛楚。
　
係好返咗？抑或我本來就冇中槍？越諗就越覺得神奇。見直升機已經飛走咗，我本來打算搵個安全地方避下。但就喺下一刻，有一對男女從後樓梯門走出嚟……
　
係阿俊同琪琪。
　
「嗄……嗄……」阿俊喘晒氣，見到我嗰刻不禁睜大雙眼，「老超……」
　
「估唔到你哋竟然可以上到嚟。」我無奈一笑，然後慢慢行過去。
　
「阿俊，佢係咪……」琪琪一臉驚慌，類似嘅表情好似喺夢入面見過。
　
「嗯，等我嚟。」阿俊擋喺琪琪面前，「老超，估唔到呢個就係你嘅下場……或者，呢個就係報應？」
　
「報應？」我不解，繼續慢慢行過去，「你到底講咩……」
　
就好似聽唔明我講咩一樣，阿俊居然舉起刀，而且擺出準備對我落手嘅姿勢。
　
「喂，既然情況變成咁，大家咪坐低好好傾下囉……」我就好似唔驚佢會落手咁，繼續行，「我有電話喺手，可以隨時打去叫直升機返嚟……」
　
但我錯了。
　
阿俊未等我講完就直衝過嚟，我完全反應唔切，結果俾佢一刀插落我頭蓋。
　
WTF？
　
發生咩事？
　
中刀後，我再一次倒後瞓低，想郁但係完全郁唔到。
　
阿俊，點解你要咁做？
　
為咗條女，你竟然可以咁狠心？
　
「阿俊，呢度有部電話……開到仲有電！」琪琪激動咁講。
　
「呢部電話係老超嘅，佢之前仲話冇電，原來係一直呃住我……琪琪，只要有電話，我就可以試下打去叫直升機返轉頭……」
　
啊，頭痛。
　
越聽就越頭痛，點解會咁……我係咪仲發緊夢？
　
照道理，頭中刀係冇可能頂到咁耐。冇錯，所以我肯定仲發緊夢……
　
「老超，」打完電話之後，阿俊跪喺我旁邊講：「我諗你將我同琪琪鎖喺窗外面嘅時候，應該估唔到最後嘅結果會係咁？」
　
結果……係咩結果？
　
「本來我真係好絕望，覺得自己死硬，差在係跌死定係俾喪屍咬死……但琪琪嘅媽媽居然救咗我哋。」
　
*
　
*
　
*
　
【回憶】
　
老超走咗之後，我不斷嘗試用蠻力撞開窗框，但結果都係唔成功。而且天仲要開始落雨，令到情況變得越嚟越惡劣。
　
「可惡！我應該一早要準備多套工具！」我自責咁講。
　
「阿俊……班喪屍已經爆咗道門！」琪琪驚慌咁講。
　
因為我身上已經冇綁繩，所以望過去嘅時候都唔敢太大動作。果然，廚房嘅門已經爆開咗個大窿。呢刻鬧鐘已經停咗冇再響，所以班喪屍開始將注意力放到我哋身上……
　
「妳過嚟！」我將琪琪拉近過嚟，喺佢耳邊講：「聽住，我哋可以頂住……等班喪屍走，又或者爬窗嘅時候跌落街……」
　　
但呢個過程班喪屍隨時會搞到琪琪身上嘅繩，又或者跌落去嘅時候撞到晾衫架最後整斷。無論點諗都係絕望，死路一條……

「嗚……」琪琪終於忍唔住喊起上嚟。
　
碰──當我聽到雪櫃跌落地嘅聲音，感覺就好似開始咗我人生最後嘅倒數階段……
　　
「……媽？」但就喺呢個時候，琪琪竟然睜大雙眼望返去廚房嗰邊。
　
「咩事？」我壓低聲問。
　
「係媽！」
　
「妳做咩！」見琪琪試圖想爬返入廚房，我當然想阻止佢，「喂！」
　
但晾衫架突然晃動一下嚇到我唔敢再亂郁，結果只可以眼白白睇住佢爬入去，一邊解開腰繩一邊行到門……
　
呢刻，我再見唔到門窿位置有喪屍手，聽落亦都冇再撞入嚟。見晾衫架好似越嚟越唔穩陣，一個大膽嘅念法突然浮現。我決定跟琪琪返到廚房，然後一齊望出門外……
　
班喪屍居然離開緊，一隻又一隻從大門行返出外面走廊。明明我同琪琪就喺門嘅另一邊，但佢哋完全冇望過嚟。
　
直到，最後一隻喪屍經過。佢先望咗我哋一眼，然後就轉身行出屋……
　
「……媽……」琪琪掩住嘴巴，淚水就好似湧泉一樣不斷咁流。
　
見到呢一幕，我當然都覺得好震撼……
　
「……再見喇……媽……」
　
然後，重拾希望嘅我哋，好自然咁牽住手，準備離開呢座屍人屋苑。
　
*
　
*
　
*　
　　
「雖然唔知實際係點做到，但琪琪嘅媽媽確實係引晒班喪屍走。」阿俊繼續講落去：「有啲應該係上咗嚟天台，但大部份都落返去樓下……我同琪琪見安全之後，先至行樓梯上嚟。」
　
荒謬！冇可能會咁！一隻喪屍點可能做到……
　
「假如我當時由得你殺死佢，或者結局就會好唔同。」阿俊搖搖頭，「點都好，老超……希望你可以安息。」
　
說罷，佢就用手幫我合埋雙眼。
　
「阿俊……佢……點解會變成喪屍？」琪琪問。
　
「我都唔知……直升機到喇。」阿俊回應：「琪琪，之後嘅日子就等我嚟保護妳。」
　
「嗯。」
　
我好想開聲痛罵佢哋、詛咒佢哋。但我講唔到任何嘢、見唔到任何嘢、身體亦都郁唔到，就好似會永遠被困喺呢個軀殼裡面……
　
一秒……
　
一個鐘……
　
一日……
　
一個星期……
　
………………
　
…………
　
……
　
……到底過咗幾耐？
　
終於，我腦海裡面所有複雜嘅思想、昔日嘅記憶，都隨住時間流逝而沖走。
　　
最後只係剩低一個單純嘅欲望。
　
　
　
……肚餓了。
　
（完）
　
　
《屍人屋苑》嘅主劇情到呢度正式完結，不過眼利嘅讀者應該會注意到故事入面仲留咗少少伏筆。我會睇反應決定下寫唔寫多幾篇外傳故事。😂 呢集足足成八千字，睇完記住幫手留個 LIKE 同分享出去呀！
　
各位感謝各位一直嘅支持，有讀者 PM 話好想呢本出書，我會認真研究下可能性！
　
最後，下面有嘢想講！見過嘅讀者可以直接無視，當然都希望可以繼續支持。
　
－－－－－－－－－－－－－－－－－
　
【地方的無默媽資助計劃】（試行中）（非呃嬲 post）
　
呢個計劃其實上年年初已經構思緊，但因為遇上反修例運動，覺得唔係適合嘅時間所以就一直擱置，結果到今年就撞正武漢肺炎。嚴峻疫情下，大眾書局突然宣告結業，令我下定決心要推出呢個計劃。
　
其實喺香港寫作真係好難，之前喺唔同場合都提過，作者透過賣書得到嘅錢真係好少好少。呢點絕對唔係出版社同書局嘅錯。講到底，一本書賣出去，最大筆錢係落咗去地產商身上。所以喺呢個大環境下根本培養唔到作者，一係要兼顧正職結果寫得太慢漸漸被淘汰，一係就主力寫但最後慘到要靠光合作用嚟維持生計……
　
所以我見到好多唔願意放棄嘅作者都開始轉型，一係自己賣書寄書、一係換個平台發展、一係直程轉第二種模式創作。而我暫時都係想寫，堅持寫落去。
　
有時見到讀者們話想支持作者，心裡面都會忍唔住覆一句：最好嘅方法，其實就係直接資助。既然遊戲平台可以資助，拍片嘅平台可以資助，點解寫作唔得？大家都係提供娛樂，無理由有呢種差別待遇。
　
而家大眾書局結業，大型書局其實就得返嗰幾間，而小型書店本身都經營困難。可以預見將來作者嘅生存空間只會越嚟越細，加上疫情持續落去書展隨時可能搞唔成。可以嘅話我都唔想用到呢種方式，但現階段……只想努力掙扎求存。因為我真係鍾意寫故事，好想一直寫落去。
　
而呢個計劃，就係基於以上種種理由出現。
　
放心，資助並唔係強迫性，有困難而資助唔到係絕對了解、想幫手足先更加係應該、剩係想買書支持亦都絕對歡迎。我唔會因為冇讀者資助而罷寫，亦唔會突然有篇故要畀錢先睇到（呢個平台都做唔到呢個效果）。當然，資助得多絕對會加速寫作速度。而資助金額係隨心而定，即使係一蚊都可以，只要有心就得。
　
當然，我都研究緊一啲方式答謝資助得多嘅讀者──例如聖誕送下聖誕卡、間中送下小禮物、甚至研究緊用資助嘅錢去整廣播劇、桌遊嘅可能性。但因為而家只係試行階段，唔想亂咁開空頭支票，有進展一定會即刻通知大家！
　
暫時只提供 payme 同轉數快兩個平台，會睇情況再考慮其他資助方式。再強調一次，資助唔係強制性，一蚊可以、繼續免費睇都得。只要有心，平時肯留個 like 分享下我都已經心滿意足了。
　
Payme 連結：
https://payme.hsbc/echoofheart
　
轉數快 FPS ID：6065460
　
－－－－－－－－－－－－－－－－－
　
【廣告時間】《無異之初》、《時間守衡者》、《絕命上映》、《絕望走廊》、《絕無轉機》各大書局有售！
　
－－－－－－－－－－－－－－－－－
　
IG：echoofheart