潛艦滅殺令戲中有齊潛艇加軍事電影嘅老土元素:
- 牌章亂出但係次次都啱嘅魯莽艦長男主角
- 總統府戰略室簡報，軍階最低嗰個提出創意行動
- 唔係有疤痕就係高大冷血嘅歐陸式叛軍
- 潛艇內阿大同阿二意見分歧炒大獲
等等等等
話雖如此，電影整體嚟講竟然OK! 主要係戲中幾場潛艇嘅動作場面，出奇地非常之有創意。先唔深究實際上係咪可行，呢幾場戲無論構思、畫面、聲效、節奏等，都好有水準。攻防戰術出其不意，聰明好玩；正所謂「咁都俾佢諗到」，鬼哥就睇得十分過癮喇。
另外，活捉俄國艦長呢條線嘅劇情亦頗為新鮮。美俄艦長惺惺相惜，戰爭當中與世隔絕，身不由己嗰種男人的浪漫，著墨份量剛剛好。電影本身有自知之明，純娛樂轟呀銀芽就好，堆砌大道理一定odd爆。
講到主角謝拉畢拿，經此片後正式定型。賊鬥、人造天劫、奉公守法、乜乜淪陷系列當中，性格都係極其魯莽而且永遠置規矩與法律予不理。你叫佢做番P.S.我愛你當中嘅溫柔暖男，肯定格格不入，奇L怪怪。
不得不提戲中有大量低能劇情，有心無意之間為電影注入咗好多不合理嘅笑料。鬼哥今次特別為鬼友們製作連環圖(由預告片截取)一齊恥笑吓佢。XDD
整體嚟講，潛艦滅殺令跟足方程式交貨，可惜當中令人尷尬笑位特多，不過緊張兼有創意嘅潛艇戰鬥場面挽回唔少分數。作為一部娛樂戰爭pop corn電影嘅話，OK睇得過。
鬼哥俾67分。
#潛艦滅殺令 #HunterKiller #謝拉畢拿 #加利奧文 #submarine #GerardButler #GaryOldman
