#近況
好鬼耐冇寫野喺e度啦～
其實呢個板只係比我打d長文章
(亦即係長篇大論嘅廢話🤣)
今次用返口語寫算喇🤣
究竟講咩好呢 就講吓我最近嘅生活啦
足足1年 我發覺世界變化好大...😱
我嘅生活變化都好大😱
之前小朋友K2疫症仍然未發生
佢可以返全日班(09:00-4:15)
我仲有時間同班媽咪朋友去high tea
蒸身 打羽毛球 食lunch
影相打卡 整甲 整頭 放狗 行街 美好嘅K2呀🥺
但估唔到嘅係2020年新年之後
依個疫情🦠會發生响全世界
人人戴口罩 生活360度轉變 要停課
實體教學改為I pad上zoom
搶口罩 不停用搓手液 搶物資
連佢最常去嘅公園 迪迪尼都冇得去
朋友又冇得見 出面堂食又冇埋😞
彷彿世界末日咁嘅2020年 真係諗起都頹😔
不停stay home
最開心嘅係
喺屋企等小朋友瞓咗覺之後
偶爾睇吓書Relex下 敷個mask
2020年10月份 我竟然又有咗小BB🤰🏻
我都估唔到
竟然可以俾老公說服到生第2個😂
說服左我咁多年🤣
然後就係接二連三嘅變化
BB初期嚟到我個肚 個人好攰好攰 成日想瞓覺🙂
但係只係得我1個湊住盈盈
當時好似係2020年10月中左右
定10月尾？唔記得啦
啱啱開始復課 每日早上勁早起身送盈盈返學
趕住返屋企 只可以瞓一個鐘頭
一接完佢放學就勁攰 又好想瞓覺
未必有得瞓 又要湊住盈盈
好唔容易捱到老公收工返嚟就可以9點上床瞓
真係日日暈陀陀 天旋地轉咁 之後疫情又再停課
慶幸嘅係唔使早起
就係咁捱過咗頭嗰幾個月 雖然辛苦好攰精神又差
但係好彩我只係嘔過一次
中期已經係非常之舒服 胃口亦相當好 精神好好
不知不覺2020完結 2021年又到左
開始準備佢入讀小學嘅野 睇好多資料
填表格大抽獎
係有d驚 怕扣門好攰(扣門好似喺6月至8月)
6月仲要係我預產期
希望佢入到心儀學校啦
之後屋企要大裝修
要裝修屋企就要大執屋
執左2個禮拜 日日清野 pack箱 超級多嘢搞
之前一直停課 小朋友開始就快要準備復課🎒
準備佢返學嘅嘢 然後又準備搬過去我媽咪度
一入去我媽咪度之後
發覺原來我媽間屋好鬼亂
一星期時間幫佢執咗好多嘢、扔咗超級超級多垃圾
大型垃圾 掉到清潔姐姐都鬧我太多垃圾
執到我懷疑人生
住咗幾日 就開始接工人姐姐🧕🏽黎屋企
上年10月開始去中介搞申請
因為疫情關係 所以手續、程序都比以前繁複好多
過到嚟又要酒店隔離 洗咗好多錢呀🥲💸💸💸
有冇人要我幫手湊下仔呀？
我可以同我工人姐姐一齊 幫手湊下你小朋友
幫下你手陪佢做功課陪佢玩幫佢沖涼
賺下外快都好吖
(講笑🤣🙏🏼)
2021年話咁快就到咗3月
最近終於都開返夜晚堂食
可以同朋友食餐生日飯
喺疫症期間 有時我都會咁諗
原來一啲正常不過嘅生活 唔係理所當然
世事無常 我哋真係要每一秒活得開心(離左題添)
我嘅孕期中 不停嘅產檢、產檢、產檢
我係2015年都喺係產檢中度過
所以當我等醫生嗌名、摸住個肚仔嘅時候
啲回憶突然湧返晒黎
人生好似一個圓形⭕️咁 跑跑下又返返去起點咁
工人姐姐嚟到之後
我就開始教佢生活上一切
姐姐係第一次嚟香港🇭🇰工作
之前佢係中東(卡塔爾)工作
所以完全唔熟悉香港
點樣搭車 接盈盈放學 認香港路 簡單中文
教佢屋企上嘅嘢 同埋照顧盈盈 屋企3隻狗狗
雖然人地話d姐姐初到屋企一定會勤力啲(扮下野)
不過我相信佢會對我地家庭幾好
因為我哋都待佢不薄 我係超級用心去教
態度都係超級好
佢有嘢忙緊嘅時候 某啲家務我落手做返
(但佢見到我做 佢會叫我唔使做 主動搶返)
其實諗深一層 要人哋真心幫你
就要自己拎個心去對人
人地係由外地隻身過來 雖然話有人工
但係連屋企人都冇得見
偶爾只係視像下 俾着係我一定做唔到🥲
我放假出街 離開盈盈一個鐘都開始掛住佢
手痕痕會想打電話俾佢😭
盈盈亦開始習慣姐姐
佢由BB開始就淨係癡實我一個
真係超級癡身 有時乜嘢都做唔到
甚至乎爸爸都唔肯跟 係最近先開始跟
連同朋友去食飯 佢都要等埋我返嚟先肯去瞓覺
所以見到佢開始 同姐姐相處到
會一齊唱歌仔 一齊講下英文 我都超級感動
以前我係一個唔識「放手」嘅媽媽
曾經講過話唔會俾姐姐湊
我係完全放心唔到交俾外人湊
不過而家再次有咗BB 一定要學識放鬆同放手
如果唔係 生活一定會被綁得越來越緊
自己會冇晒自己生活 唞唔到氣
冇得抽時間去做自己想做嘅嘢 最終只會辛苦自己
我希望可以學識慢慢去放手
畢竟連續五年做咗全職媽媽 全職照顧小朋友
假期都冇 要學習一下寬待自己
另外e個姐姐都幾窩心
每晚我同佢講第2日要好早起 所以叫佢早啲休息
一入房 佢會ws同我講
今日好多謝我
佢遇上一個好好嘅家庭之類(嘻)🥰
打住咁多先 聽日又要7點起身送佢返學
而家搬咗去阿媽度住 距離學校鬼咁遠
所以要晨早起身搭車
下個禮拜小朋友仲要做禮貌大使 返8:30(omg)
有時諗 唔知我生完第二胎之後 生活會點嘅呢
🤨黑人問號🤨
#照片唔係而家影當時係12週
#而家25週
香港ws卡店 在 Weiβ Schwarz WS Hong Kong 的美食出口停車場
WS 高級認證店~ 集會卡店- 九龍油麻地彌敦道522號金龍商業大廈2/F WS 認證店/ 兌換店: **排名不分先後** 店家(香港) / 地址. Arena - 長沙灣天悦廣場1樓171號舖 ... <看更多>