20210428
#生物觀察日記
《To DSE考生》
dont sei examination
唔使蛇呢一個考試，基本上你考得好定唔好都一早已經心中有數，好難講話當日失準嘅，反正咁多科，唔通你科科都失準咩，又若然你真係科科都失準，咁都係一個難得嘅經歷吖，有啲嘢做得多就係達人，小弟都可以係壞巴士達人，我認為考試失準達人都係一個幾厲害嘅稱呼吖，人最失禮唔係考試成績差，而係冇付出過努力有expect考得唔錯，到最後成績差嘅時候又要喺度後悔，咁樣係最愚蠢。
我成日都覺得新聞報道太偏頗，每一次都搵啲10 A狀元出嚟，佢哋從來冇訪問過10 F，我覺得一科A同埋F 難度都唔係高，但科科F你個人係要睇得好化同埋好透徹！你唔係冇去喎，你係有去到會場，但係唔屈服於呢一個考試制度，默默地喺成績度做手腳，係對於成個考試制度嘅控訴。
呢個世界咩先叫做叻呀？識時務係咪就係叻呀？如果未來我國民教育攞A係咪叻呀？個世界就係咁虛偽，一方面又同人哋講讀書唔係淨係求分數，唔係求分數係求咩啊？點解你哋又忽視嗰啲考得差嘅學生呀？我哋嘅城市真係鼓勵我哋做我哋想做嘅事？咁請問有幾多人想做嘅事係幫大公司入靚盤數呀？係咪好刺激㗎？入咗啦！goal！係咪咁呀？又有冇人嘅夢想係教導下一代愛國嘅定義啊？嗱黨呢，執政都係為國家就好辛苦嘅，所以我哋係唔應該批評佢，我哋係應該尊重佢！有冇人係想做呢啲嘢啊？
到底我哋讀書嚟係做咩呢？係為乜嘢呢？小學就為咗升一間好嘅中學，中學就為咗入大學，咁又點解我哋就算入到大學，都叫完成咗一個check point啦，但係入到大學都會有一啲科俾人叫做廢科，點解呢？我諗最主要嘅原因就係「咁之後又點？」因為某啲科目出到嚟都冇咩工作可以接軌，就算你對soci幾有興趣都好，你對人文學幾有研究都好，你研究宗教研究到已經放棄咗食肉都好，讀完書後又點呢？除咗教返呢一科又可以做啲乜嘢呢？結果就會衍生一啲高學歷，但係做嘅嘢唔關事嘅職員出嚟，有好多做疊埋心水去考公務員添，喺香港讀書係為咗下一步，下一步就係搵份相應嘅職業，所以出嚟做咗咁多年野之後，都相信仲係有好多同學仔都未知道當年為乜嘢而讀書？
所謂精英嘅教育，人生嘅每一個階段都係一塊跳板，從來冇人享受過游水嘅樂趣，因為呢個係一個比賽，最緊要就係落水嗰下冇乜水花，湖面平靜，之後？搵到錢最好就潛埋水啦，最好就唔好同跳落去好大水花嗰啲同學有咩聯絡啦，對事業上亦都冇咩正面影響吖，最重要係冇用吖嘛，我哋讀讀埋埋咁多嘢到最後都係冇用嘅，識埋嗰啲人又係冇用嘅，全部野都係過目即忘、閱後即焚、用完即棄，喺目標為本呢一個大口號底下，你發現讀咁耐書都冇教過乜嘢叫做快樂，好似有時唔教你都會自己知咁，而明明哩樣嘢應該係最重要個喎。
人係為咗咩而生活啊？你搵錢又好、追求啲咩成就又好、甚至乎你人生做嘅每一個決定，最終導向其實都係為咗快樂啫，但如果你唔師道乜嘢叫做快樂，又或者你唔清楚自己嘅快樂係由乜嘢建構而成，咁我哋一直以來做嘅種種屈服、要承受嘅不快樂，會唔會Mislead咗我哋去另一個方向呢？係咪努力讀書就可以得到快樂呢？係咪搵到份穩定嘅薪金就可以得到快樂呢？不如我哋掉轉諗一次到底乜嘢係快樂，要做啲乜嘢先至叫快樂，然後你再衡量返要達成咩條件先可以做到嗰一樣嘢，係咪完成呢個考試就OK？努力唔係問題，為乜嘢而努力先？人人補習你就要補習咩？拎補習錢去買模型練習吓砌模型唔好咩？點解唔可以呀？如果呢個世界唔需要靚模型，呢個世界就唔會出模型吖，佢出得即係有市場啦，咁如果你決定將來係要砌模型，你讀咩書啫？
唔係個世界同你講有既定路線，你就一定要跟住嚟行，喺呢個年代，當教育唔可以比到你獨立思想，你就要自己勇敢少少去想像，可能會行多咗少少路，好過你repeat同一條人哋set俾你嘅路，加油啊！不過冇話一定要加喺讀書嗰邊㗎，反正讀書個方面，如果你而家先知加油都冇用㗎喇。
