.
【9月號 關於生活專欄】
.
香港今年奧運豐收，人皆賀之，突然間運動變成焦點，街市阿嬸會講劍擊，文青會捉你討論「凱林賽」同「競輪賽」分別，連十世都冇人提起嘅超小國聖馬利諾都有人留意。填詞人個腦，又點會唔參與埋一份？學黃偉文話齋，填詞人同時裝設計師其中一種絕活，就係將任何嘢嘗試放喺自己作品中。
然後又開始摷吓，究竟廣東歌同運動呢個題目，有幾多詞人寫過呢？相信最多嘅，就係足球，而用足球做主題嘅原因，就係卡通片或動畫。〈足球小將〉呢首係「廣一」（唔係世一，係廣東歌第一），鄭國江老師包辦片頭片尾兩曲，張衛健殿堂作。之後有李克勤〈足球小旋風〉，至到千禧後周國賢〈黃金入球〉，至於純粹唔關動畫事但又講足球嘅，就有C AllStar 嘅〈足球先生〉，小克填詞，用字獨到：扱、斬、推、扭、恰西、挑、剔、剷、窩利⋯⋯旁述員常用動詞都被佢用咗三分一。（至於足球會會歌則另計，好奇可以搵下陳年〈擁南躉之歌〉同〈精工體育〉。）
至於其他運動，長跑有陳奕迅〈人生馬拉松〉（潘源良填），借練跑講對抗失戀嘅有連詩雅〈起跑〉（係呀我填嘅），當然仲有容祖兒〈跑步機上〉（黃偉文填）。〈單車〉，係講父子，運動成份唔太重，唔算，反而〈韻律泳〉（何韻詩唱）就入圍，兩首都係黃偉文填。有一首算偏門，何雁詩嘅〈洞天〉，講高爾夫球（何小姐本身係高手，歌名係向衛斯理同名小說致敬，點解會知，因為都係我填嘅）。拳擊都有一首，〈鐵拳之道〉（Kolor唱），填詞嘅連揸筆嘅基本腕力都冇，我自己唔知點寫出嚟。
當然仲有好多遺珠，一時間醒唔起，但可以肯定嘅係，每一項運動嘅動作或者專有名詞，都未必個個識，歌手同聽眾都有機會黑人問號，再者點將呢項運動投放感情，此難之二。另外歷代除咗某三兩位填詞人係經常運動之外，其他都係文官，你叫林夕寫摔交同擲鐵餅，唔係唔得，有得揀佢未必會揀咁囉。之但係歌詞同運動紀錄一樣，係不斷玩突破嘅，如果Mirror、Error 可以講奧運，叫佢哋唱馬術同自由體操亦唔係冇可能嘅事。
.
——〈歌詞運動會〉
文／梁栢堅
.
關於生活專欄載於九月號《藝文青》。九月號《藝文青》已上架，可在7-11便利店、OK便利店以及各大書報攤購買。
.
#梁栢堅 #奧運 #藝文青 #藝文青9月號 #asartisticasyou #asartisticasyou43
