《道歉》
♂：早晨啊
♀：早，我有個問題，點解運動員輸左要喊住道歉呢？
♂：唔……我都覺得好奇怪
♀：雖然佢地係代表香港，但有時候技不如人輸都無辦法啊
♂：體育就係咁，咁多個國家參加，贏既就只有一個，有牌既都係得三個，失敗佔既係大多數
♀：咪係，輸，有幾出奇啊？
♂：我覺得只要佢既代表資格，係公平公正憑實力去拎返黎，咁佢已經代表係全港最強，盡左全力，輸，又道乜歉呢
♀：做運動員真係好辛苦，我自己個陣玩田徑都係，日練夜練，我試過練練下嘔出黎，但外人只會睇你贏定輸
♂：係嫁，到奧運完左，我諗大部份人只係記得張家朗，記得何詩蓓，或者其他拎到獎既運動員，而大部份輸既，連新聞都未必會報出黎
♀：所以你話贏係幾咁重要，成日話過程比結果重要，但講係好聽，現實就係殘酷既
♂：唔好講佢地，我相信我同你到之後都唔會記得失敗既人
♀：Sad but true
♂：運動員從來都無欠香港人，認真，有邊個香港人係覺得我地會拎金牌？大家一直都係睇美國同中國邊個可以拎得多，香港人對於運動有幾熱愛，大家心中有數啦
♀：係……你見伍家朗佢連sponsor都無埋，就知道從商業上睇，一個曾經打敗林丹既球手，都係唔夠商業價值
♂：啱啊，幾多明星佢地出一個show就拎五位數六位數，代一個言可以有七位數，係，我知佢地都好努力，但運動員唔努力咩？人地可能由八歲就開始努力，努力左十幾年先可以登上呢個場地，一個唔好彩失手第一輪就輸左，就只會成為一個得三十字都無既報導
♀：個日張家朗咪拎冠軍既，我一完左就上網，見到唔到一分鐘傳媒就出到報導，有圖有字，我都幾肯定，佢地一早準備左佢贏同埋輸既圖同字，只係等待結果
♂：咁呢個係人地專業黎既，有準備總好過無準備
♀：係，但呢種準備，令我覺得唔太人性……
♂：個人先講人性，商業從來都只係睇成果
♀：如果將運動當成一種商業，我覺得運動員真係好可憐
♂：你又咁睇喎，如果連呢種商業都無，咁佢地咪更少人知道
♀：係既……
♂：你好似好感概咁
♀：少少，唔駛理我
♂：喂，其實有咩你都可以同我講喎
♀：真心，我同你講得唔算少
♂：我諗，係香港人欠運動員一個道歉，無論精神又好，金錢又好，時間都好，我地都比唔到支持佢地，唔講乜，你睇其他國家，佢地運動員真係拍得住明星，唔講太遠，至少佢地生活無憂先，但香港，退役運動員連搵食都未必搵到，成績唔錯既都係咁講，都未計成績同名氣一般既
♀：算啦，道歉其實係無意思，無實際行動既道歉，仲難聽過粗口
♂：運動其實係一種興趣，我地平常人做運動，係會開心同放鬆，但只要將佢變成職業就會變成工作同壓力，我地唔會理解到職業運動員既苦
♀：有好多興趣成為職業都係會好痛苦，當一諗到生計的話就會好煩，所以我放棄左運動呢條路
♂：係啊……興趣成為職業……真係會好辛苦……
♀：你好似又好感概
♂：少少啦
♀：又炒我
♂：我想講我今日好攰……
♀：工作？
♂：係
♀：咁你既攰，係唔係你應該付出既攰？
♂：係
♀：既然係應該要做既，咁點攰都要撐落去，因為你知道有日你會得到回報
♂：但有時回報同付出唔合正比既
♀：咁你要諗下班運動員，天時地利人和，有時你即使係世界冠軍都好，狀況一唔好，你都會輸，比起佢地，你會唔會叫做比較易掌握啊？
♂：係既
♀：雖然我唔係邊個，亦做唔到乜，但我都會撐你既
♂：唔……雖然呢個撐字，無任何成本，但我都好似多返少少力量
♀：喂咩料啊你，本小姐撐你，幾多人恨都恨唔到，知足啦！
♂：係係係，我知足，咁你係唔係幾時都咁撐我先？
♀：係喇，幾時都咁撐你
♂：好，你話嫁
♀：我好少應承人野，但呢樣，我應承你，我一定會做到
♂：麻煩你再撐我一下
♀：撐你！加油！
♂：再黎，唔該
♀：撐你……
♂：唔要點點
♀：撐你
♂：喂，愈黎愈少字既
♀：撐你！！！（見好就收喇）
♂：再黎多次！
♀：撐你！！！
♂：好啦，今日就撐住咁多先，聽日我需要再同你講
♀：仆街……我覺得我中左伏
♂：頭先有人好口響話應承我
♀：okok，我認，但你唔好迫我有日扮睇唔到你，要忙緊
♂：我會就住你既
♀：……你要訓？
♂：係啊，真係攰
♀：咁晚安啦，唔好好似尋日咁
♂：知，我會掛住你
♀：肉麻
♂：晚安，聽日傾
♀：你話會掛住我，記得啊，晚安
呢個故事踏入左100like既門檻
如果你喜歡的話，請睇完比個like，到越過300like時
會比一個大家參與故事既獨家體驗
尋日差少少，加油啊大家！
——
長傾·不見@筆友
https://bit.ly/LongchatEP1
長傾·不見@緣份
https://bit.ly/LongchatEP2
長傾·不見@年齡
https://bit.ly/LongchatEP3
長傾·不見@拜金
https://bit.ly/LongchatEP4
長傾·不見@笑話
https://bit.ly/LongchatEP5
長傾·不見@外表
https://bit.ly/LongchatEP6
長傾·不見@等待
https://bit.ly/LongchatEP7
長傾·不見@飲酒
https://bit.ly/LongchatEP8
長傾·不見@奧運
https://bit.ly/LongchatEP9
長傾·不見@人事
https://bit.ly/LongchatEP10
長傾·不見@第一
https://bit.ly/LongchatEP11
長傾·不見@晚安
https://bit.ly/LongchatEP12
