今年在電競節主播台的鏡頭後，有這一幕：
「你好Hebe，我叫Devil。」
「吓，我當然知道你係Devil啦！」
「我唔知道你認唔認識我嘛。」
「我地上年已經見過啦！」
我半途出家為錢做主播，無受過主播訓練，只不過用講波佬方式，放進電競比賽中，NOW TV的陳葦如是我學習的對象。因電台的足球節目，我們有機會共事超過一年，他對足球的認識廣泛，資料庫深厚，固然是我欣賞的範疇。但最令我敬仰的，是他謙虛的做人態度，並沒有因為自己是講波佬，而覺得你不懂，他自己作是最棒。
做人，謙虛才是硬道理。Devil 做主播的時間比我長，我為錢打工，他不是。在主播台上先作自己介紹的應該是我，不是他。
我的工作是說話，在電台口嗡嗡講三五七小時是我的生活寫照，有時忘了說話可以救人和傷人，變成了工作的機器。前輩教落，世界永遠有不喜歡你的人，最重要記得不斷反省自己的表演，免得將自己的才能淪為每天工作的刻板機器。
不要成為別人的書籤，就做一本讓人值得一讀再讀的書！
【所謂暫別宣言】其實廢文一則
#無大綱無組織 #諗到咩就講咩 #真係鳩噏
正如我喺自己直播，同埋喺CGA聊天室度咁講
係完咗Esports Festival 2016之後，我將會暫別主播台
老實講，我都仲係幾鍾意講比賽，幾鍾意係唔同遊戲間來來回回
所以連我自己都唔敢包，究竟幾時又會心血來潮走返上台
若果有朋友想我客串講一兩場我係會幫手的，興趣工就係咁，想做就做，唔想做就唔做，無謂束縛自己
不過點都好，我需要些少時間，去畀自己個心情冷卻一下
即使我平時講到自己幾豁達，幾睇得開名利都好
但係我諗冇人會鍾意睇住自己不斷嘅付出，換嚟只有負面嘅收獲
我唔敢講鑽研，不過我的確有一直嘗試進步
留意唔同國家，唔同遊戲，唔同主播嘅唔同風格
同時回顧自己以前做得幾鳩，希望唔洗召喚阿寶
不過做主播、講比賽，實質都只不過係娛樂事業
如果所有範疇嘅娛樂界業者，最終目的都係娛樂大眾
一名藝人應否被市場淘汰，話事嘅一直都唔係該位從業者
觀眾先係話事人，重點唔係你嘅質素，而係佢地嘅興趣
係香港呢一個地方，電子競技嘅風氣真係差到極點
再加上香港人嘅核心價值就係多重標準
唔單止選手得唔到支持，主播得唔到鼓勵
而係成個電競界嘅所有相關人物，都生存係一片責罵聲之中
由「打機都係死廢青」去到「人地外國點點點」
代表住香港人就係有國際性嘅視野，但係無相對應嘅涵養
「純粹」嘅電子競技
電子競技同廣告業真係撇唔甩關係
香港嘅電競業仲只係處於成長期
想要純粹，無雜質嘅單方向發展其實無乜可能
就以今次CGA嘅Esports Festival 2016中我所見到嘅「意見」為例
有人話：「請埋啲垃圾YouTuber做乜啫，關電子競技撚事咩」
如果呢一個Event已經國際知名，或者當中嘅賽事係世界級水準
淨係活動或者內容本身都已經確保可以吸引到足夠嘅人流嘅話
的確可以撇開所有「無關係」嘅元素，搞一個純純粹粹只有電競嘅電競活動
可惜係香港呢個產業只係成長當中
無可否認，嗰班「垃圾YouTuber」係吸引到唔少嘅人流
而香港電競業就係靠住人流呢一個數據，去說服贊助商投資落去繼續搞
你估電競公司會唔想搵返啲完完全全係電競界嘅人咩
可惜結果一係就收唔到相應嘅宣傳效果，一係就唔符合成本效益
咁係香港電競有能力做到真正只靠電競嘅收支平衡之前
一係香港人爭氣啲，真係身體力行去支持香港電競
一係就隻眼開隻眼閉，淨係留意自己鍾意嘅項目
屌少兩句，畀少少機會呢個行業發展下，好嘛？
其實係關於YouTuber呢個話題，有個都幾有趣嘅現象
借問聲達哥又同電競有咩關係呢？
我有朋友話：「你睇佢玩街霸，識玩架有練過架」
咁就係各位心目中嘅「關電競事」咩？
我真係見唔到有人屌「做乜請達哥，佢又唔關電競事」
但係啲Youtuber已經自成一角，不過都唔少人爭住屌
即係鍾意嘅就唔屌，仆到去；唔鍾意就屌咗先，無視佢嘅價值同作用
所以話香港人嘅核心價值就係多重標準
水準與成長
先講主播，我明白講得好唔好，個風格啱唔啱聽真係好主觀
但係執小毛病，雙重標準，有仇記足兩萬年式嘅支持香港電競人士真係佔出聲嘅大多數
外國主播講錯重腳係中腳；香港主播講錯W技係E技
外國主播鳩噏笑到氣咳；香港主播攞選手名講笑
外國主播搞氣氛大聲叫；香港主播五速嘴玩緊張
外國主播重度口音；香港主播讀漏個音
上面全部都係外國主播就好平常無所謂，香港主播就菊花殘滿地傷嘅例子
香港人要嘅唔係質素同專業，而係名氣同偶像
真係唔需要鑽研，唔需要技巧；只要肯埋堆，造名氣，搏上位
知名乜乜乜呢個位就係屬於你嘅
唔係話真係做得專業同高質嘅一定會失敗
不過條路易行定難行，付出同收獲個比例大家有眼睇
可能坊間會有好多心得，點樣去講好一場比賽
究竟咩時候要講啲咩，有咩資料要集中講，團戰進行期間要專注係邊一部分
但係我唔係呢種做法，我認為與其教人背書，不如著重概念同小技巧，其餘就留返係發展風格上
我係一個全能型主播，特登放咗好多心機係氣氛同配合上，仲有唔同遊戲類型嘅講法
係遊戲咩時期要用啲咩語氣，搞清楚拍檔係乜嘢類型嘅人
搞Gag記得唔好嘗試去解釋，隔離嗰位係分析型我就要擔任鳩叫
有資料唔清楚就輕輕帶過，任何話題都唔好執著太耐，一句起兩句止
拍擋有咩錯盡量唔好一嘢屌埋去，要幫手圓滑帶過，轉落下一個話題
串鳩隊友唔係要置佢於死地，全部都係搞氣氛做效果，笑完就算數，贏輸唔重要
等等等等……
我係CGA講咗咁耐比賽，有講過LoL、CS:GO、Rainbow Six、FIFA、NBA、Overwatch、SFV、COD
夾嘅嘅拍擋有專業主播、職業選手、「網絡紅人」、教練級人馬，甚至係十二個鐘講唔多過二十句嘢嘅高端玩家
應付過嘅場合包羅萬有，吹足成粒鐘先有嘢睇、完全冇資料就要上場講、專業分析同比較、低俗搞笑吸人流、世界性賽事到本土細比賽
我唔敢講場場都係Good Show，次次都零失誤完場，不過起碼可以順順利利收到科
但係去到今時今日，做咗三年有多，我都仲係畀人屌緊做主播頭嗰兩三個月，第一次臨時臨急上場講CS:GO，將Scout講咗做AWP嘅偉大事跡。哈，真係非常值得名留青史嘅風流韻事
之後我講過咩Game？表現係點？有冇進步？Sor, No one give a single fuck.
同上一部分講到嘅一樣，香港容不下成長期
每粒蛋一爆出嚟隻嘢就要頂曬Level，爆曬種族值，直接究極體
唯我一接觸過真係正面，我非常鍾意嘅香港電競圈子就係街霸
真正符合曬我認為一個理想嘅電競圈子應有嘅形態
佢哋會睇比賽：留意大大小小嘅賽事，除咗世界級知名大賽，仲包括廣州、台灣等等鄰近地區。亦會特別關注係香港本土搞嘅比賽
佢哋尊重強者：欣賞世界各地高水準嘅玩家，唔會輸一兩個比賽就一沉百踩。黑馬出局都唔會出言侮辱，比起落敗更注重出色表現
佢哋支持香港：就算香港圈子有幾細，都不懈發展格Game群組，唔會一味吹捧日本台灣韓國而忽略香港。只要有港人參賽都會特別留意，唔理輸贏都一定撐盡。香港比賽有幾鳩都好，屌柒只為做得更好，而唔係希望收山唔搞
佢哋照顧新手：唔會踩沉新手，而係協助進步，肯多次解說知識，亦有研究打法。幾乎無階級觀念，勁人廢柴開開心心齊齊打機，經常有建設性意見，而唔係我鑽你銅收嗲啦
如果去返LoL？哈，大家想像到會係咩情況
屌，咁撚廢唔好學人打比賽啦
比賽搞到咁不如唔撚好搞
贏完上個冠軍之後都廢撚曬啦，佢哋冇撚用架喇
你得金牌就唔好講咁多廢話啦，好撚勁？
唔怕老實講，我一直都認為，香港電子競技係搞唔撚起的
你地唔會見到香港隊贏咩大型賽事，頂盡係香港人加入中國隊伍、台灣隊伍而打響名堂
最正路搞起「香港電競」就係靠地理優勢去搞比賽畀成個亞洲打，到時服務嘅就係講國語嘅台灣，講普通話嘅中國，講英文嘅新加坡同留意亞洲嘅外地觀眾，而唔係高尚嘅香港人
就等我拭目以待，繼續咁落去，究竟之後香港嘅比賽、香港嘅隊伍、香港嘅選手、香港嘅主播，會多咗定少咗
張相由 Tsui Chun Kit 於 Esports Festival 2016 攝影，多謝多謝
香港播坊加入咗動廢節目喇 在 無題 的美食出口停車場
You're offline. Check your connection. Retry ... ... <看更多>