香港半島酒店 HK$2,682味遊半島Staycation入住體驗
🎯優惠詳情及預訂網址：MrMiles.hk/the-peninsula-hong-kong/
過去星期六唔單止係我第一次入住香港半島酒店，仲係我第一次行入半島。唔知算唔算大鄉里出城，都三十有多居然今次係第一次行入半島。今次訂嘅係歷史新低價「味遊半島」$2,682 staycation package （已連加一）。
唔知咩原因，今次嘅入住比較感性，體驗上可謂震撼心靈。有啲似去旅行走去睇遺跡啊入教堂果種感覺。老實講未入住前我個人對半島品牌無咩特別好感，亦覺得咪又係一間酒店，只不過係價錢貴過人咁解，奢華品牌都叫做住過無十間都有八間我諗體驗上都係差唔多嘅啫...不過到訪過後我睇法係有啲改變。香港半島酒店對作為於香港長大嘅我嚟講係獨一無二嘅。2020年酒店業災難式生意下滑，價錢跌到去現時呢個震撼價...實屬可悲。
今次寫嘅入住體驗好多嘢想寫，而酒店都有好多細節可以寫，不過我就著量寫下，更多嘅位留返俾你去「開箱」。
1️⃣Preparation
入住半島的話建議可以睇下酒店嘅歷史，見証住香港嘅興衰繁榮與變遷而酒店都有跟住時代變化注入新元素。感性mode入住，那怕你是住最平最低級別嘅房間都別有一番體會。Dress code我自己係smart casual，有披返件jacket，著返條長褲帶返隻靚啲嘅錶去入住嘅。可能多餘，個人喜好啫。
你要睇返酒店歷史當然可以google，或者懶得睇嘅可以去到酒店先睇佢果本「半島美學」，我深夜時份花了半小時去細味，感受良多。眾人所知2020年係香港歷史轉列點，於歷史級酒店過夜，看著維港反思過去諗諗將來，今日有嘅香港半島風情未知日後如何變遷，可能因而慨嘆但都享受下當下感受。
借用書內一句說話：美是一種意識，一個人本概念，一條主觀同時客觀的哲學命題，但它始終和人的感受分不開。
美的主觀客觀我都講唔清楚，以下都係好片面嘅「我的感受」，其他留返你自己去感受吧！
2️⃣Checkin及Afternoon tea
正常為3pm checkin但我訂咗2:15pm下午茶，所以2pm就到酒店。一入門口其實有啲嚇親，因為入面好多人...checkin個位都有10幾20組人排隊...感覺有些少混亂。無法，價錢平咗多咗人住，星期六2pm入住高峰都可以理解。決定先食tea再攞房。
去The Lobby（食tea間餐廳）問一問，預訂的afternoon tea餐廳滿座，而職員都早有預備問我要唔要去樓上間露台餐廳到食。當時我心諗咁Q多人係到等食都係玩自己，最後答應到樓上食。對我嚟講係無選錯，樓上靜好多都有啲風景可以睇下。食物質素我就覺得唔錯，比我預想的好食（文內有圖😆）
食完後約三點半去返前台。Surprisingly人龍居然消散咗，不得不佩服職員嘅效率，我有數返原來同時有5-6個櫃位做嘢，所以即使有人龍但都清得好快。味遊半島個package會係check in時點埋你in-room dining食乜，tick完就可預約埋晚餐幾時送。
3️⃣房間
今次入住526號房。半島有分高低座，低座為1928年落城嘅建築物，而30層高座（Tower building）為90年代擴建落城嘅樓層。我住526就係經過半島正門會見到有兩個「露台」位嘅其中一間。個露台聽講以前係開到，呢加當然係封咗只係裝飾嚟。
正常高樓層個view應該會好好多，但係我個人覺得住底座又無乜壞，於半島入住歷史建築別有一番風味。本身最平package只包邊位房，我住呢隻叫「中庭房」正面向維港，check過貴$100，想住返呢隻嘅可以留意下。
房間裝修係我一入門果下真係已經嘩咗出聲，最平房型都好靚。事前我無睇過任何人寫的入住報告或相片，本身我以為會係Conrad/港島香格里拉/JW Marriott HK果種老派經典風格，但完全超乎我想像房間用上大量黑色鋼琴色木裝修非常modern，睇返資料應該係2012左右有做過房間翻新。而房間保養得好好同感覺非常乾淨。比較遺憾係浴室風格會比較舊，唔係嘩嘩聲咁靚但我自己覺得可以接受。
房內好多設備都好amazing，有nail drying machine，仲有影印fax機，音響都好好。最amazing係佢部touch panel 真係好好用，可以order DVD, room service, 控窗簾, 光暗, 選台, almost everything 。堅係好貼切到住客嘅需要。
4️⃣In-room dining
7:30pm預訂嘅嘢食就到咗，全部都唔差中西式都好食。我本身唔好甜食但兩個甜品都好美味令我都多吃了幾口。最差嘅係麵包，都幾硬，無乜誠意。兩個人食建議中西各樣都試下，menu上全部都值得試。
5️⃣早餐
會係大堂The Lobby用餐，10點落去食都唔覺多人，環境非常好感覺好嘆。點餐早餐嚟（I love it much more than buffet）有中西選擇，個人口味嚟講正常早餐我會叫中餐但佢個西式早餐個名叫「半島早餐」，改個咁嘅名初次入住無得唔揀啦...另有鮮果汁order，質素高但我都無謂吹到佢飛天，總括嚟講係普通材料但整得好食。必定要一提係個環境真係無得彈，係半島The Lobby食早餐都係一種體驗嚟。
Overall嚟講，$2682唔係平，但我覺得值。洗咗啲錢都希望你可以獲得多啲感受。香港人的品牌半島酒店唔係浪得虛名。
香港半島酒店room service menu 在 【香港半島酒店Staycation #2】味遊半島～ 三道菜晚餐In ... 的美食出口停車場
【 香港半島酒店 Staycation #2】味遊半島～ 三道菜晚餐In- Room Dining 與大堂中西式早餐❤️ （字幕待上） || dotdoT.茶. 1.6K views · 2 years ago 半島 ... ... <看更多>