［冇咗10%資產！］冇事嘅。你買股票，美股一個月都跌兩三成啦。你死咗未丫？
1. TL：DR- 檔嘢100億book value，冇乜負債，但33億市值。公司就不停回購，幾時賣盤／私有化？
2. 其實呢隻嘢寫過幾次。可以睇medium（https://bit.ly/2WGd7uX）。仲好得閒睇埋香港人壽賣盤撻Q嘅，可以睇返舊post（https://bit.ly/3cGQYlB）（https://bit.ly/2TeGMt7）（https://bit.ly/2LCRw0c）．最尾嗰篇有講埋孔令成的說。
3. 哈哈哈，如果我真係仲做緊分析員，應該真係會寫「香港巴郡」。實不相瞞N年前我都真係工作上寫過亞洲金融（662）（＊）嘅報告，可惜當年諗唔到呢啲題。
4. 事實，如果知662係做乜生意嘅，咁出盈警真係完全唔意外。我甚至懷疑股價會唔會隊at all（寫嗰時係週末，未開市）。不過股價其實今年跑贏大市的說。過去幾年就……睇你咩位買咯
5. 講返，公司業務，幾簡單下。自從亞洲商業銀行都冇埋（都冇咗好多年），公司本業就差不多只做保險。仲要差不多全部係non life，GI．人壽呢？就冇自己做，係入股其他公司。包括大陸嘅人保壽險（PICC下面嘅壽險，不大，但中國太大了，計埋662度都幾係嘢），同埋之前幾乎賣但又冇賣到嘅香港人壽—同永亨上商創興永隆之類合營的。
6. 公司自己業務，極簡單，就係非人壽嘅保險，車保醫險勞保之類嘅東西。特色係乜？一般年年清，同人壽唔同，變咗就冇咩embedded value 呀，asset mismatch之類嘅麻煩嘢
7. GI業務，都幾易解。收你保險金，然後賠畀你。咁簡單。呢個差價就係承保利潤。但有時可以係負數（662冇乜見，但大陸啲公司周不時有），而呢堆嘢亦未計公司交租呀坐冷氣房班友要出糧呀之類。
8. 當中仲有乜？就係好似巴郡咁，投資嘛！保險公司就係咁嘅一回事，收你保險金，賠畀人，中間就拎咗你啲錢去投資，唔深啦下話？投資嘅嘢很多，除咗上面講，香港人壽，人保壽險，仲有銀聯信託，泰國康民醫院（medical tourism），盤谷銀行，仲有啲新嘅fin tech乜鬼。當然簡單收下息亦都係投資。
9. 所以，股市咁情況，梗係盈警啦，唔使多講。特別係GI嘅，年年清嘛，咁你唔會買啲幾十年嘅債券，一般都係短期投資，股票會多，就更加受市況影響。事實662發親盈警都係啲大股災之後。例如2008，2018之類。十分正常
10. 今次預輸錢，但冇講幾多。不過仲有講，個總資產跌咗10%以內—就當10%啦下（如果係5%就會寫5%以內啦）。另外亦有理由相信最近反彈返，跟市啫，但就當10%
11. 嘩，如果係銀行呢，其實就好大鑊的說。因為銀行係高度槓杆嘅，講過無數次，左手交右手，中間濕下手。中銀香港（2388）之類，差不多一蚊股東資金做十蚊生意。10蚊asset，1蚊股東資金，9蚊負債。Asset跌10%你就已經成個股本wipe out 了，資不抵債。化學？金融海嘯前其實講緊十幾廿倍，鬼佬行幾十倍都有，所以asset跌幾個%就反底
12. 但銀行畢竟唔同，啲貸款唔會忽然間冇咗10%，加上平時有撥備，加上唔係所有資產都係貸款。保險公司就唔同了，真係可以多數資產係投資，咁冇咗10%有幾奇？你見美股一個月都跌兩三成。
13. 幸好，保險公司就唔會咁大槓杆。662講緊103億股東資金（Book value），45億負債，148億資產咁咯。咁你所謂資產冇10%，即係冇15億，咁去個book value，冇咗15%左右咯。食得起。
14. 公司一向都穩健，金融海嘯當然都中招，蝕咗8億—當年海嘯前先50億book咋下。但打後，而家你見到，book value已經一個開，103億。都話世界係進步，企業係成長的。陳智思呢檔嘢未必係一流企業，但都見到係咁。近年每年都有3/4億純利。你估容易？
15. 好啦，另外講返，其實講咗好多年，大折讓嘛。33億市值，但book value 103億。我當你盈警講蒸發晒10% asset落晒book（應該冇咁多），減多15億都仲有88億。33億市值喎
16. 當然好多公司都大折讓，隨手都一大堆。但保險公司有啲唔同，因為asset差不多全部係金融嘢—絶大部份都mark to market，亦都唔多存在好似啲機械呀咁年年depreciation．照計你見到盤數嘅東西，就幾接近實際真係清盤出街嘅價值。
17. 當然唔係話會清盤（你清佢都未清），但，私有化呢？賣盤呢？就有可能了。雖然，其實都講咗十幾廿年。係咁架啦，炒呢啲梗係要有無比耐性。你係畢菲特嘛，唔係咩？
18. 講多樣，公司係不停咁回購嘅。舊年就回購咗差不多1%嘅股票，其實自金融海嘯以嚟，個股本已經縮咗7%。
19. 當然啦下，隻嘢係悶到七彩的。唔知等到幾時。
20. 講開又講，原來有日本仔股東的說。不過我都唔記得幾時埋咗枱，損害保險日本興亞．
（＊）講過多次但都講返，泰國嘅電話country code 正係66。曼谷地區就係2．陳智思家族泰國華僑嘛
———————
版務：收費專欄已推出，支持埃汾高質文章。幾舊水睇三個月，一星期三篇
請去呢度訂：bit.ly/2wVXndj
課程編號填: CC01
科咗水後後有Login及Password畀你
逢一三五入去 homebloggerhk.com （見到就睇到《事先張揚》），亦睇得返以前嘅文。一般我都係會黃昏出文嘅。
