#我知長文係冇乜人like
#但幾行字又真係唔夠講
唔係女友提我，我都唔記得咗原來個page今日啱啱2年了，估唔到女友除咗記仇之外，記日子都有一手。
成日都覺得呢壇嘢(即係個page)好奇妙，奇妙在一啲荒謬到以為得自己會經歷嘅事，原來有好多人有共鳴；奇妙在同一個post，男嘅會覺得「CLS咁都有得嬲！」，而女嘅會覺得「合理吖！係人都嬲啦！」，然後tag埋佢男友😂
但講到最奇妙，都算係大家肯向我呢個3唔識7嘅陌生人分享自己嘅故仔。我曾經向一位長輩講解過自己個page係點運作嘅。
「啲人投稿有乜好處？」
「冇㗎，有趣嘅咪會出post囉！」
「咁post出嚟又有咩好處？」
「er...又好似真係冇...」
原來，有一班人明知冇好處都不停向你分享自己嘅經歷，係十分難得嘅。
而除咗啲兩三句嘅投稿，其實仲有一班人當咗我地係佢嘅樹窿咁，嘢嘢都打晒千字文咁搵我地傾訴。
試過有人戴完綠帽send晒佢啲捉姦對話圖俾我地；有人由拍緊拖到分埋手都keep住同我地訴苦；有人個男友(而家老公)mean得濟，令佢打咗過百個故事俾我地；又有人啱啱拍拖就出錢請女友去日本，然後最後一日俾人block咗分埋手，佢懷疑自己受騙跟住搵我地傾計；有人由拍拖投稿到而家個仔都滿埋月；最誇張嘅係，有對情侶喺今年展覽時認識，到而家結婚仲請我地去飲😮
#受寵若驚
雖然我都算係搞social media 嘅，但其實我個人一啲都唔叻social，同啲唔熟嘅人基本上好難傾到計。多得呢壇嘢，令我接觸多咗唔同嘅人，見多咗世面。細過曾經羨慕老豆做的士司機，可以見盡人生百態，而家原來開個page就可以了。
睇到呢度嘅相信都係真fans，咁我都厚面皮地賣個廣告啦。嚟緊4日我地會搞兩個小型展覽，22,23日會喺油麻地YMCA，24,25日會喺美孚饒宗頤文化館（下館），如果大家放假冇節目嘅，不妨過嚟行過圈，同我地say個hi吖。
開放時間：
油麻地YMCA
22-23/12下午一點半至七點半
美孚饒宗頤文化館（下館）
24/12 下午兩點至八點
25/12 下午一點至八點
