中午時分, 我來到一間歷史悠久的老人院, 準備與一位婆婆的媳婦討論預設醫療計劃。
預設醫療計劃 (Advance Care Planning), 就是透過溝通, 與病人或其家屬, 討論日後的照顧選擇; 當中包括在心臟停頓時是否施行心外壓、插喉等俗稱急救的程序。
我要探訪的婆婆已經96歲了, 住在這間老人院已超過20年。這幾年機能退化已再不能與人溝通, 雙腳彎曲亦只能躺在床上, 最近更因進食問題在外科病房入院期間被插上了胃喉。她有3個女兒,年紀也不少了, 身體也不太健康; 兒子又因病過身; 媳婦不想奶奶辛苦, 希望日後她百年歸老可順應自然。故此我們約了她在老人院討論預設醫療指示。
看過了婆婆, 我跟媳婦走到老人院大廳, 外展護士也已經在那裏等候我們。
「叫埋老人院職員一齊傾啦。」我向外展護士説。通常我會譤請職員一起討論, 讓他們也知道家人心意。
「唔好叫佢, 頭先先同佢嘈完嚟。」外展護士向我打眼色。
為什麼呢? 心裏帶着疑問。。。
討論完畢, 我走到老人院的辦公室, 跟職員傾講一下。有時不了解就會製造不必要的誤會。
「想同你講吓呢。。。」
「我都同你地講咗啦, 我反對你地攪啲咁嘅野, 你地要簽我無得阻止你, 但係唔關我地事。」
想不到我還未開控, 職員已反應激烈。
「我同你講呀, 呢度開咗廿幾年, 我大大話話照顧咗佢地廿幾年, 個個我地都咁錫, 我想佢地個個都長命百歳㗎。我係基督徒, 我唔會接受你地咁做。。。」職員充滿怒氣, 但似乎對老友記還是不錯的。
「咪住先。 我解釋俾你聽我地做緊乜同為乜野先。有啲年紀好大, 有好多長期病患嘅老友記, 咁佢真係有日會走㗎嘛, 咁你都知㗎啦, 就算點搓點㩒佢個心佢都唔會番轉頭, 你認唔認同先。」我嘗試解釋。
「我知呀, 好似佢咁, 個心停咗, 緊係順其自然啦。但係為乜要簽呢張野先? 明明有時入咗院處理吓, 就好地地番番嚟個啦。」
很多人的確有個誤解, 簽了不作心肺復甦治療, 就等於我們放棄照顧長者, 是見死不救; 也有不少人懷疑, '無事無幹' 為什麼突然要簽份文件, 你們究竟有何居心。
我停了一停, 再慢慢説: 「聽到呢到, 其實我同你諗法係一致㗎喎, 大家都係想呀婆, 大家都係想呀婆有日要走嘅時候順其自然唔想佢辛苦。」
職員聽到我這樣說, 怒氣好樣減退了點。
「其實就算簽咗個文件, 我地都係咁照顧同醫治婆婆嘅問題㗎。我都唔係第一日上嚟啦, 你知我地點做野㗎。」
我停了一會又再説: 「如果無傾過, 屋企人又無心理準備, 有時三更半夜突發嚟, 佢地點反應過嚟呢?」
「咁你地醫生個刻可以做决定, 由得佢自然去㗎嘛。」
「咁既然係咁, 點解唔早啲傾, 俾番個選擇權俾屋企人呢? 佢聽完, 可以選擇唔簽㗎喎。但係起碼有多個選擇呀。」
聽到這裏, 職員似乎多了點明白。
或許, 大家的最終希望, 都是婆婆舒舒服服, 活得快樂, 只是觀點與角度的不同。
但我仍然認同, 通過溝通、了解、認識,明白不同選擇的意義和理念, 就能為長者計劃最適當的照顧方案。
