【曱甴】
我承認我超驚曱甴。
年頭去南美時，房裡面出現曱甴，我嚇到成個人彈咗上床，而床嘅正上方係一把高速運轉中嘅吊扇，好似血滴子咁兜嘢炒落我個頭度，爆哂血。
就係有咁驚。
不過，唔能夠否認嘅事實係——曱甴，可能係地表最頑強嘅生物。甚至有科學家形容，曱甴係上帝最完美嘅創造。
由恐龍時代開始，經歷幾次生命大滅絕，曱甴仍然存活至今，而且外型並冇太大改變，證明佢嘅身體構造已經能夠適應各種惡劣環境。
冇錯，或者曱甴係人見人憎，但有一個簡單道理相信正常人都會明白——
唔係因為有曱甴所以間屋污糟，而係因為間屋污糟所以有曱甴！
一味噴殺蟲水去趕去殺，但又唔執乾淨間屋，殺得一次，下次只會有更多。然後你又再噴更多更多殺蟲水，臭到間屋都唔適合人住，但曱甴依然喺度。
所以，真係驚曱甴嘅，唔該處理下間屋嘅問題先。
#今次係生物課
#順便講句香港人加油
#知呢張圖係乜嘅香港人應該都有返咁上下年紀😏
