如果沒有愛情（下）
上集：http://bit.do/e4wNy
三個女人，三個做法，我究竟應該聽邊個話？
我好迷茫咁喺條街度行，經過一間新式咖啡廳，我見到大少爺同雯雯，坐喺落地玻璃窗旁邊，拎住本書一齊討論。
佢哋傾得好開心，我情不自禁咁行埋去，愈行愈近，近到見到書上密密麻麻嘅字，但我一個都唔識。
大少爺似有所覺，抬頭望到我，四目交投，我下意識咁落荒而逃。
趙姨一定會講，我係拜過堂嘅正妻，大條道理去鬧佢哋。
但就算我鬧走咗雯雯，我坐喺大少爺隔離，我可以同佢講咩？我睇得明佢嘅書咩？
我好羨慕，但我羨慕嘅，與其話係雯雯，不如話係嗰種生活，
嗰種有文化、可以睇報紙睇書，知道個世界發生咩事嘅生活。
夜晚，大少爺返到屋企，有啲侷促不安：「阿花，你今日撞到我哋，我知道你唔好受，但我哋係自由戀......」
我打斷佢嘅說話：「大少爺，你可唔可以教我認字？」
「認字？」大少爺驚訝。
我點頭：「老爺唔肯畀你離婚，多少係因為佢同我阿爸嘅情義，如果我都提出離婚，老爺同意嘅機會大好多。」
大少爺問：「我教你認字，你肯配合我，同我離婚？」
「嗯，你要畀心機教我，我考到大學，就同你離婚。」我笑一笑。
「你連自己個名都未識寫，想考大學？自細讀書嘅人都未必考到大學。」
大少爺翻白眼：「等你考到大學，可能我頭髮都白晒。」
我真係唔知大學有幾難考，我尷尬一笑：「咁......中學程度啦。」
我同大少爺達成協議，佢買咗一堆啟蒙嘅書，得閒就教吓我。
我記低佢講嘅每一個字，每日做完家務，就努力溫習，盡力將啲字塞入腦海。
吳嬸、趙姨同陸大姐都讚我聰明，大少爺鍾意雯雯，大概因為佢哋都係知識份子，
等我努力學習，變埋知識份子，就有機會爭番大少爺個心。
老實講，我初時都有咁諗。
不過，當我識嘅嘢愈嚟愈多，當我第一次自己買書、第一次睇得明報紙、第一次認識廿六個英文字母，我比新婚更興奮。
大少爺都讚我刻苦勤奮，但我嘅目光，唔再追隨住佢嘅神情變化，我更在乎佢會教咩新嘢畀我。
後來，大少爺幫我報咗一個成人學堂，我哋一齊瞞住老爺奶奶，話我係去學廚藝同女紅。
因為大少爺無同我圓房，老爺奶奶對我好愧疚，我反而比喺娘家嘅時候更自由。
我開始讀中學教材，其實大少爺已經完成咗佢嘅承諾。
但係，佢無提我搞離婚，我就無主動出聲，或者我心底都係有啲幻想。
除咗讀書之外，我仲搵咗份兼職，做一個七歲女仔嘅家庭教師。
好多家庭唔畀女仔出去返學，但時代變遷，女仔都要識番幾個字，
所以女家教好受歡迎，連文化水平唔高嘅我，都可以搵到職位。
第一次出糧，我拎住我親手賺番嚟嘅大洋，淚如雨下。
所有人都話我知，女人離婚後好淒慘，自己無謀生嘅能力，娘家又未必靠得住，所以要死死抓住丈夫。
到呢一刻，我終於唔駛擔心，離婚後嘅我會餓死。
到我收到大學錄取通知書嗰日，大少爺話，佢嘅責任已經完成，佢叫我一齊去搵老爺，講我哋離婚嘅事。
我嘅努力無打動到佢，依加我都算係知識份子，係新時代女性，但佢愛嘅依然係雯雯。
到最後，我嘅丈夫依然唔愛我，從來無愛過我。
雖然有啲可惜，但係，我對未來充滿希望。
愛情帶來希望，係黑暗中嘅光芒。
但同時，愛情係運氣，係謀事在人，成事在天，唔係每個人都會得到愛情。
更重要嘅係，當我哋抓唔住愛情，我哋仲擁有能力，令我哋唔會被挫折擊敗，有條件追求新嘅幸福。
或者，呢樣嘢，比愛情更重要。
－完－
將專頁設定為「搶先看」/ "See first"，最新故仔馬上睇！
新書《寓言地府動物園》已經出版了，現正發售中，
詳情可點擊這裡：http://bit.do/e37JG
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #如果沒有愛情
