關於 阿媽有咗第二個影評 ，我們在網路上蒐集到這些相關的討論、資訊與評價

疫情緩和了很多，我們家亦終於解禁去戲院看電影，為的是Disney與Pixar繼《玩轉極樂園》、《靈魂奇遇記》後推出嘅最新動畫《盛夏友晴天》Luca，朋友間口碑亦非常不錯，小朋友看到哈哈大笑😆 媽媽見到佢笑成咁都覺得好搞笑。

Bat Bat 原來早已忘記上次去看電影看了些甚麼，今次正好再為他累積與爸爸媽媽去戲院的童年回憶🥰

說回這套《盛夏友晴天》，作為今個暑假必看的親子電影，各位應該都會去看，我就不劇透了，但想說為人父母去看真的有深深的體會，這是一個關於小孩子去追夢的故事，其間關卡困難重重，小孩子除了要突破自己的心理關口，還要克服爸爸媽媽的「恐嚇」，才能勇敢邁出第一步探索外面風大雨大的世界‼️

我們因怕小孩受傷，在他們成長中一定都會常對小孩說，不要這樣不要那樣，恨不得為他們劃個安全區，以後不准走出這個框框，這樣我們才安心。但是，孩子總有自己的路要走，而且在路上他們可能會很開心，也走得很好，父母是否應該給他們多點信心呢？

雖然有時可能受傷，可能有危險，可能會失敗，但他們卻會因此成長，過一個更豐富更精彩的人生。

整套戲Bat Bat 看到笑卡卡，媽媽卻愈看愈想東想西不自覺連眼眶都濕潤了。各位爸爸媽媽，暑假和小孩一起去看LUCA吧，一定不會後悔。

(另外有個媽媽會心微笑嘅位，就係個仔變咗第二個樣，阿媽都一定會認得，不過爸爸就未必啦 😆 so true~ ）

英文預告： https://youtu.be/8OTgShkpB-Y
粵語配音預告：https://youtu.be/KlzI-v88cO8
片長：96分鐘

#迪士尼與彼思感動呈獻
#盛夏友情天 #追夢歷險
#暑期活動 #不專業影評
#Disney #Pixar #電影

#throwback

老早看過九把刀的《等一個人咖啡》小說，剛剛也看完由九把刀重新改編的《等一個人咖啡》電影。我是萬中無一的畸形人，喜歡看文字多過畫面，因為文字讓人有想像空間，而畫面則移動得太快，沒有足夠時間咀嚼這一場戲的時間，就要被扯到另一幕的劇情去，我轉數慢，好多時會跟唔到。

不過《等一個人咖啡》這部電影很特別，雖然人物性格勾畫得沒有小說般細緻，而很多小說裏有趣的角色也沒有出場的戲份，但《等一個人咖啡》電影要表達的訊息，比小說更加 powerful。

我不是寫影評，只是覺得電影所帶出的訊息很特別，而且表達手法非常天才，讓我看完後先是呆一呆，然後就很想打開電腦把感受寫下來。

未入正題前，先來句老土的開場白：借問聲，你，有冇試過等一個人？

以上所說的「等」，當然不是「等你半個鐘都未出得門口」嗰啲等，而是「等你終有一天愛上我」呢隻等。關於「等」的學問，千祈唔好問我，我阿媽生我出嚟，絕對沒有生到呢條「等一個人」咁浪漫嘅慧根，所以我幾乎沒有試過等一個人。

第一，我沒有這個需要。如果我鍾意一個女仔，通常兩三吓手勢，又或者最多三四吓手勢，佢就會自動飛埋嚟。唔係我叻，只係大部份香港女仔太易捉摸。

第二，我沒有這個耐性。你話個地球得番我同你兩個就話啫，呢個世界咁多女仔，要我等你一個，咁即係要我錯過幾多個先？唔好話等你一年，等你一個禮拜我已經覺得好對唔住自己。機會成本太重，而且沒有guaranteed return，等嚟托。

第三，我沒有這個勇氣。有時候，人好得意，等緊嗰陣時，你覺得自己可以為佢愛得死去活來，到最後俾你等到、得到，甚至乎完全擁有和控制嘅時候，你先發覺，原來你都唔係咁愛佢，仲嫌佢有啲煩。我沒有勇氣接受一個如此犯賤的自己，所以一句講晒，我唔會等。

不過，我是說我幾乎沒有試過等一個人。

幾乎沒有，但我等過。

那個女人，我等得唔算耐，最多只有一個鐘，但可說是人生裏非常浪漫的一小時。你不是當事人，沒有可能感受那刻骨銘心的一小時。好像全世界的人也在靜止着，只有她是有生命力的。

鏡頭一轉，我們來個曼克頓的wide shot，這是八年前的一個下午。

紐約市的感恩節很冷，走在街上，口裏會噴「煙」。的士去到酒店，立刻飛奔走入大堂，已相約移民那邊超過20年的幾位親戚吃午飯自助餐。上到餐廳，看見他們，高興地逐個打招呼。酒店內那家餐廳充滿柔和的淺綠色，地氈是淺綠色，牆身也是淺綠色。坐低，加點蜜糖，呷一口還在冒煙的熱水，舒服死。正當熱水的暖流慢慢在身內擴散，我抬起頭，就看見她。

那一眼，那第一眼，我看到她左邊的側面，她還沒注意到我。年紀看似跟我差不多的她，正跟身旁一位老婆婆交頭接耳，然後咧嘴而笑。跟着她拿起面前的茶杯，正要喝一口的時候，終於看見我，看見我望着她。這下突如其來的四目交投，火頭由我挑起，自己當然不會尷尬，但她也沒有太過錯愕。我把視線慢慢從她身上移走，嘗試把焦點放在其他人身上。但約十秒鐘後，我又看着她，而她又注意到我的目光。

這頓飯我也沒有吃到甚麼，因為我的頭盤主菜甜品都是她。當她那張枱埋完單的時候，我們的對望可謂更趨激烈，心知這場遊戲很快就要結束。果然，我還沒出去拿第二次甜品的時候，她的親朋戚友已經站起來，準備向門口出發。她左手拿着大褸，右手扣着手袋，一步一步走出去，最後她沒有回望一眼，而我也沒有做甚麼。只是眼白白讓這份微妙的感覺，在我面前蒸發。美國女作家Maya Angelou有句名言：「別人可能會忘記你做過的事，可能會忘記你說過的話，但他不可能忘記你曾經給他的感覺。」到今天，我仍然記得這份感覺。

喂，你千祈唔好以為我想教大家「珍惜眼前人」，我冇咁感性。我只係想同大家解釋，當一個俊男遇着一位美女，雙方總是會死要面而懶得首先出手，最後搞到大家都冇着數。每次我到銅鑼灣的時代廣場逛，我總看到一個個悲哀的「錯配」現象，就是美女十居其九都會拖住隻野獸，而靚仔就總會拖住一件……實在太悲情，我都唔想講落去。為甚麼會出現這個錯配現象呢？就是因為靚仔和靚女都要面，最後冇人主動出擊，乜嘢都做唔到。就因為呢份自我，靚仔同靚女等咗好耐，都等唔到一個「人」，最後惟有將自己獻畀隻豬。

《等一個人咖啡》電影包含一些科幻元素，但完全沒有那種「唔係啩咁都得」的感覺，這些科幻元素反而令每一幕情節更連貫。但現實生活中，就算沒有科幻元素，一切都可以來得很科幻。八年前在紐約市的邂逅，今天竟然可以來個續集。那天我突然在facebook收到一個message，有個女人用英文問：「八年前的感恩節，你是不是在紐約呢？」我們之間竟然有兩個mutual friends。

我立刻走入她的面書看一看，結果她可能把私隱度調校到最高，我甚麼也看不到，除了她的profile picture。半身相，黃色裙，我研究咗好耐，真是八年前那個蒸發在我面前的她。我額頭冒出一點汗，手微微抖震，慢慢回覆她的message：「我諗你認錯人。」繼續凝視她那條黃色裙子，如果她八年前穿着那條黃色裙子，看起來可能會像一彎皎潔的明月。但今天這個她，穿着這條黃色裙子，簡直就是一個基因突變的巨型芒果。

各位美女，趁你哋仲有bargaining power嘅時候，就好放下矜持，主動出擊吧。

===============

本身有幾分姿色，吊高嚟賣，呢啲叫矝持；本身神憎鬼厭，仲要冥頑不靈，呢啲叫臭 high。

品格下流無關寄生

坊間影評對韓國電影《寄生蟲》評價，大多認為導演批判資本社會萬惡，刻劃韓國社會之貧富懸殊，為主角一家抱打不平，意見相當大路，如非友人極力推薦，我應該唔會去睇。然而，睇完之後，其實導演嘅訊息相當明確，就係窮人之所以窮係有原因，而窮人情緒爆發過後嘅結果，往往亦只係兩敗俱傷一場空。導演對人性醜惡之刻劃，以及階級秩序自然生成之理解，相當深刻，作品可以打動國際電影人，奪得金棕櫚獎，實至名歸。

首先，奉俊昊導演嘅思維，同佢前作《雪國列車》一脈相承，就係寄生蟲無分國界，都有佢地無法上流嘅致命理由。佢承認現代文明同資本主義邏輯，亦理解貧窮苦況，但佢想點出嘅係，人類要唔要成為寄生蟲，其實係有得揀，而以主角一家為代表嘅窮人心態出錯——不負責任、不務正業、規劃無度以及盲目仇富，正正係部分窮人最後自我毀滅嘅源頭，自食惡果，與人無尤。

戲中，有錢家庭夫妻角色性格討好，獲得社會地位，明顯係因為佢地處世有方。丈夫如何成為企業家，劇本未有交代，但從種種蛛絲馬跡可知，佢做人原則清晰，待人界線分明，引人詬病之處相當少。丈夫嘅對白，多次強調只要唔好逾越佢嘅界線，佢都可以接受，例如主角細妹用自己條底褲插贓嫁禍尹司機之後，佢只係話喺前座玩都還好，玩到去佢坐嘅後座就太誇張；主角阿爸行車時掛住同佢傾偈傾到唔望路面情況之時，佢亦有客氣提醒佢專心駕駛，做好本分；而佢客氣拜託主角阿爸同佢一齊扮演美洲原住民畀驚喜細仔，但主角阿爸態度奇怪，無心投入之時，佢嘅回應亦係嚴肅提醒對方要認真打好份工。加上導演多次強調丈夫係最佳企業家，可見就算佢本身贏喺起跑線，都有喺商場上盡己所能，至會勝過其他企業家。

而妻子雖然思想單純，亦略為昧於現實，但佢對家庭亦係絕對上心，處處自省，例如細仔小一曾經受驚，佢就份外緊張佢嘅心理成長，正係表現出佢對小朋友嘅關愛。當全家決定露營，長女唔情願去，佢都唔係用權力或物質去迫佢就範，而係話唔同一家人玩係佢損失，亦反映佢重視家庭。以上事例，所反映嘅都係導演無意貶損有錢家庭，因為有錢人絕對可以係心地善良，處事公道，唔靠作奸犯科致富，事業有成其實可以係精進自身嘅延伸。打破有錢即奸惡，窮苦即善良之刻板印象，正係作品嘅目的。

相反，主角一家倒果為因，認定對方係因為家境富裕至可以心地善良，正反映佢地對自身以及世界嘅認知都唔準確。主角一家趁有錢家庭出外露營入侵大宅之時，個阿媽講咗一句，如果佢係有錢，佢都可以心地善良，但隨後故事發展就已經即刻令佢自打嘴巴。前管家喺防空洞之中，跪地相求，懇請主角阿媽代為照顧避債丈夫，但主角阿媽聽完都係無動於衷，無意憐憫。直至對方發現自己把柄，用電話錄低主角一家如何以父子相稱，主客逆轉，佢又即刻求和，要求前管家網開一面。窮窮相遇，彼此理應互相理解，但可悲嘅係，前管家動之以情，說之以理，再奉上酬金拜託，主角一家都只係考量自身利益，多於共存共榮。最後，窮窮相遇演成窮窮相鬥，妥協無方，集體還原叢林法則，人多力壯一邊自動勝利，可謂突顯出唔講道理嘅窮人一旦掌權之恐怖，如同共產主義社會之縮影——主角兄妹較有人性，會追問前管家夫妻境況，但主角雙親之不擇手段，罔顧他人生死，完全係滅絕人性。

由此可知，前管家雖窮，但品性相對良善，優於主角一家。前管家寄生於有錢家庭，雖有取巧，但佢堅持用自己錢援助自己丈夫，未有貪心，擅取大宅資源，堪稱窮得有底線而有骨氣。相反，主角接到友人介紹嘅補習之後，心生歪念，為咗自身家庭利益，不惜傷害盡忠職守嘅尹司機同前管家，自私自利，而主角一家趁有錢家庭出外露營入侵大宅之舉，亦反映佢地唔識珍惜機會，好好為僱主服務，改變生活，而係的確如同寄生蟲一樣，人心不足，見風使盡艃，禍及宿主。最後主角阿爸殺人而唔自首，更加唔覺自己需要接受法律制裁，思維之扭曲，亦係瘋狂至極。主角一家無藥可救，死不足惜，足證導演無意諷刺資本家壓榨勞工，而係志在探討緊社會寄生蟲為禍之現象。

劇情發展至中段，主角一家經歷暴雨水災避入社區中心。鏡頭對準主角阿爸，安排佢道出自己處世之道，絕對係導演心思所在。主角阿爸不知悔改，惹禍之後，體悟居然係「人生唔好有計劃，有計劃就會有意外」同埋「有期待就會有失望，所以就要隨波逐流」，呢種人生觀，其實正正就係佢地全家淪落街頭嘅原因。所謂天道酬勤，出身係唔可以改變，但心態同努力係絕對有可能改變命運。主角一家只睇到人地嘅成功，從來唔去思考人地背後付出幾多，難得有得為有錢家庭打工，但不論係補英文、教美術、做司機定做管家都做到一塌糊塗，可謂不思進取，自取其辱。窮酸氣味飄揚，的確無法控制，但向上流動，洗脫氣味，係視乎人有幾想擺脫現狀，認真生活。認真生活嘅人，係唔會兼職摺pizza外賣盒都摺到有四分之一係唔用得。有錢家庭多次提及主角一家有特殊氣味，但從來唔會當住對方面前露出嫌棄表情，正係因為佢地識得顧及他人感受，就算對方不如自己，但睇喺主角阿爸眼中，佢就認為呢啲係偽善同狗眼看人低，呢種因自卑而生嘅仇富心理，對社會嘅危害絕對比偽善嘅有錢家庭大。

主角一家家破人亡之後，主角幻想自己賺大錢買起大宅，同阿爸一家團聚，心態似乎有變，但導演不留情咁擊碎佢嘅不切實際，再次反映出佢希望大家唔好對主角一家心存寄望。呢類窮人之所以翻身無期，其中一個原因，正係諗多過做，更甚嘅係得個諗字，乜都唔做，到最後推卸責任於社會不公同出身清貧。不論貧富，任何人都應該要有自知之明，了解自己能力所及，先至再去講目標講理想，如果有目標但能力未及，就應該精進自身，為目標而奮鬥不息，萬不得已，都唔好諉過於人。偏偏，主角一家雖有目標，但全部都係用旁門左道去達成——主角想同有錢家庭長女結婚，打算請替身演員飾演父母瞞騙對方，而唔係諗住靠自己嘅能力去融入對方嘅世界，又係證明佢地得過且過嘅例子。主角一家集多種人性缺點於一身，僥倖得以寄生上流但只係識得殺雞取卵，而唔識長期利用，慢慢吸乾，或用時間證明自己真係可以做好一件事，又更反映佢地只睇到眼前利益，缺乏對未來嘅想像之短視。

反觀前管家夫妻，同樣貧苦，但佢地識得飲水思源，對有錢家庭心存感激。前管家盡心盡力，連僱主養嘅三隻狗仔都會跟住佢出出入入，可見佢係有用心打工。而匿藏喺防空洞內嘅丈夫，以北韓民眾供奉金正恩嘅心態去供奉有錢家庭一家之主，亦可見佢係清楚知道自己係寄生上流，所以唔會仇視對方，而係如同佢自己所講，只有respect。直到主角一家害死前管家之後，佢生無可戀，衝上地面，想同主角一家同歸於盡，復仇目標明確，亦證明佢深明怨有頭而債有主之理，只係有仇報仇，而唔係無理取鬧。寄生蟲有唔同求生方式，蚊蚤之類，取食之後就會離開宿主，蠅蛆之類，則趁宿主傷口外露至乘機入侵，但主角一家不但名副其實寄生，更處心積慮，如同錐蟲一樣損害宿主神經系統，最終奪取宿主性命——劇本安排兩類寄生蟲作對比，用意顯而易見。

寄生上流，同樣可以識得愛人，前管家夫妻相依為命，明顯係願意共渡時艱嘅一對，但主角阿爸對家庭付出少之又少，根本豬狗不如。佢兩次問及有錢家庭丈夫關於愛嘅問題，正反映出佢自以為理解乜嘢係愛，但其實完全無知。第一次，有錢家庭丈夫聽到問題，略為遲疑，思考咗幾秒，至答應該算係愛，而第二次，二人隱身於草叢之內，主角阿爸則係以輕蔑態度去嘲諷對方嘅愛流於形式化。愛係人類想像之物，對於停留生物層嘅生物而言，相當抽象，此之所以，主角阿爸其實根本無法理解有錢家庭丈夫所想，問完都抽取唔到任何資訊，而有錢家庭丈夫之所以唔會不加思索就答愛，係因為佢會反思自己行為配唔配得上有愛。

主角雙親只係捱苦共同體，就算心存不滿都唔可以發脾氣，係因為發完日子都係咁樣過，多一事不如少一事，主角一家趁有錢家庭出外露營入侵大宅之時，二人有共識咁態度軟化，正係最佳證明。而有錢家庭丈夫即使日理萬機，都會抽時間同細仔玩，亦知道如何借助派對儀式去表達愛，就算勞累不堪都願意付出心思去令家人開心，呢啲都係超出主角一家認知範圍嘅家庭想像。而細仔喺花園露營，夫妻留守客廳所發生嘅性愛前戲，亦反映佢地係對對方有超越動物本能嘅慾望，因為佢地嘅性係有交流有想像，係人類性愛而非動物性交。兩相對比，又見思想差異。

普遍而言，中產出身者，的確會流於偽善，甚至脫離現實，但要糾正問題始終唔難。主角一家嘅問題則在於，佢地所受嘅教育都係經後期社教化而習得，而非自幼受家庭薰陶而成，最終發自內心。人類理應學習真誠待人同埋尊重秩序，再學識如何保護自己，而唔係一開始就懷疑他人，以小人之心度君子之腹，次序一錯，就會萬劫不復。人類社會一直進步，靠嘅就係建立呢種共識，如果認定人性本惡，人類就會無法想像同接受人性光輝，最後自然淪落到只識得猜忌努力善待他人嘅好人。概而言之，人嘅真正差異無關階級，成長中見識到嘅人性上限下限以至無限，至係品格嘅分水嶺。

最後不得不提嘅係，貫穿全劇嗰舊幸運石頭所承載嘅象徵意義。主角友人送石頭畀主角，係出於好意，而具體嘅好意，就係帶挈佢去有錢家庭短期代課。導演想表明嘅係，寄生上流之機會，由一開始就係他人借出，主角一家必須誠懇領受，至係對得自己對得人。偏偏，主角竟然背信棄義，明知友人想同有錢家庭長女交往，但都若無其事咁奪人所愛，甚至將等到對方入讀大學至正式交往嘅打算都據為己有，可謂無恥。而一人得道，妄想雞犬皆可升天，透支友人信任，無視是非曲直，德行之薄，令人心寒。

原名《寄生蟲》比譯名《寄生上流》更為貼切，係因為寄生對象唔一定要係上流，只要對方比寄生蟲稍為富裕，稍為顧及道德，就可以發動寄生。寄生係一種不勞而獲嘅心態，非關貧富，而在於如何看待生命嘅意義。主角一家的而且確係社會以至文明中嘅寄生蟲，但於我而言，所謂寄生蟲，並非韓國獨有，而係遍佈全球，不分種族國籍。權力至上，社會道德秩序形同虛設，設想人性至最壞則有利生存，都係寄生蟲最愛嘅棲息環境，經濟有成嘅韓國絕對唔係世界上最多寄生蟲嘅國度。唯有社會文化一直演進，共同體想像一直更新，各地寄生蟲數量至會得以改變，故此，要世界變得更加健康，首要就係盡力感化呢啲缺乏人性嘅生物，而若然感化不果，就唯有狠心懲教，嚴厲整治。資本主義人類文明受到拖累，大幅倒退，係全人類嘅浩劫，電影之人文關懷，因普世皆同而獲得嘉許，合情合理。面對人形寄生蟲威脅，所有人都有責任挺身對抗，捍衛自由，《寄生蟲》出現於如此年代，可謂時代精神之體現，號召戰鬥之呼聲，不可多得。

gnimmm.com/2019/10/10/parasite/