【一個分手要坐監的小島】(27)
(上回連結： https://goo.gl/wJzhDs)
(由頭追起：https://goo.gl/pSyUsc）
阿晴離開陳經理的辦公室，阿傑一見到她就心急地問：「佢點答？Martin佢哋點？」
阿晴想了想，跟他說：「不如我哋唔好再理呢件事⋯⋯」
阿晴不知道真相，只是不想安穩的生活被打擾，但阿傑激動地說：「點解連妳都會咁諗！？係我累咗佢哋，點可以當冇事發生⋯陳經理同妳講咗啲咩？妳講畀我聽！」
阿晴一邊拉著阿傑離開，一邊支吾：「佢咩都冇答我，我咩都唔知⋯⋯我哋返去先再諗辦法啦！」
陳經理在辦公室內看著他們兩人離去，然後跟身邊的助手說：「幫我預備下間監獄。」
在路上，阿傑拿著Martin跟Rosanna的相片，不停問路過的情侶：「你哋認唔認得呢對夫妻？」
全部都只是停下來望兩眼，然後猛力搖頭，就急步離開了。
即使阿傑走到他們跟Martin、Rosanna第一次見面的餐廳，當值的正是當天那位侍應，但他卻說：「我從來都冇見過佢哋喎⋯⋯」就打發阿傑阿晴離開。
對於島上的人來說，Martin跟Rosanna就彷似沒有存在過，就算他們的腦裡閃過二人的樣子。
你永遠不能從裝傻的人口中問出真相。
「我好驚下個會到我哋呀⋯⋯」回到家裡，阿晴坐在梳化上，拉著身旁的阿傑擔憂地說：「我哋唔好理咁多嘢啦⋯⋯」
阿晴抱起小貓，再補充：「我唔想冇晒依家啲嘢呀⋯⋯我哋好難得先咁開心，點解我哋要咁多事，咪當咩都唔知囉，個個都係咁咋嘛，一樣生活得好好，點解我哋要去搞咁多嘢？」
阿晴擁著阿傑，她的每一句都不合情義，但那句：「我哋好難得先咁開心」令阿傑有少許猶豫。
他心想，來到這個小島，就只是為了現在一刻，什麼都擁有，什麼都不用擔心，只要聽聽話話，生活便安然度過，每天都過著渡假般的生活，為什麼還要為「公道」，為「真相」，而犠牲自己？大家都只會當你是「搞事份子」，為著做半秒英雄，為著沒有人理會的公義，實在不值得。
「我哋好好瞓一覺，聽日當咩事都冇發生過，好唔好？」阿晴拉阿傑到床邊。
【叮叮】
就在阿傑慢慢走向床邊時，他收到了一段影片。
片中第一個出現的是阿晴。
她身旁是陳經理。
而出現的對白則是：「我可以幫你更新個系統，你一撳就會變成阿傑手機嘅畫面，佢同過咩人傾計、睇緊啲咩，妳都會知道。同埋，會授權畀妳睇到島上某一啲閉路電視，可以睇住阿傑做緊啲乜。不過呢點妳就可以放心，我哋都會幫你睇住佢，佢唔會有機會比其他女人埋身。」
影片裡的阿晴，毫不猶豫地接下【同意】。
然後，阿傑再陸續收到其他影片，全都是他被監視著的情形，當中好幾段是阿傑跟Martin在露台對話。
阿傑立即衝到床上，搶過阿晴的手機，發現真的有監控程式，可以隨便切換至自己的手機畫面，也可以選擇不同的閉路電視，觀察自己的一舉一動，每天的生活，都被阿晴紀錄下來。
「妳起身，即刻起身！」阿傑對著阿晴大喝：「妳究竟做過啲乜！」
「做咩呀⋯⋯咩事？」阿晴答。
「點解妳要咁樣監視住我？」阿傑把影片展示給阿晴看。
「你講咩呀⋯⋯」阿晴仍扮作什麼都不知道。
當她在監視阿傑的時候，卻不知道自己也被操控著，埋下的惡果卻有一天被揭發。
「唔怪得妳叫我咩都唔好理啦⋯⋯」阿傑說：「原來所有嘢都係妳搞出嚟⋯⋯」
「唔係呀⋯⋯」阿晴不知所措地答：「我唔係諗住咁㗎。」
「妳冇諗住咁！？」阿傑仍激動地說：「但就係妳搞到佢哋畀人捉咗呀⋯⋯點解妳要咁做！？」
「我唔知呀，我咩都唔知⋯⋯」阿晴只能這樣說。
「你知唔知妳好恐怖，點解妳會變成咁⋯⋯」阿傑坐在地上，想不到身邊最親近的人原來竟這麼陌生。
「我唔知會搞成咁！」阿晴開始強辭奪理：「你怪我做咩啫，又唔係我捉咗Martin同Rosanna⋯⋯」
「夠喇⋯妳唔好再講⋯⋯我唔想聽到妳把聲。」阿傑把自己跟阿晴的手機都扔到地上。
「你咁唔滿意咪分手囉！講到我錯晒咁！」阿晴也開始失去理智。
「痴線⋯」
阿傑的話未說完，門鐘就響起，陳經理跟她的助手已站在門外⋯⋯
（待續）
－－－－－－－－－－－－－－－－
再次講同大家講聲唔好意思⋯⋯
上個星期我有啲緊要事發生。
我有啲地方做錯咗，令女朋友要同我分開。
一直都處理緊同埋諗緊好多嘢⋯⋯
希望大家體諒一下。
女朋友暫時未追得返，不過故事都要繼續。
今次唔要求任何Like & Shares，隨心吧。
如果你仍然支持，就加油一下。
多謝大家。
好對唔住⋯⋯
好對唔住⋯⋯
好對唔住⋯⋯
