《以青春的名義》陳心遙
《信報》2018年1月10日《視線所及》專欄
青春片一向好窄，大家都傾向用包裝去定義。一係就玩啲後生仔玩意，着啲好似潮流尖端嘅服飾，邪邪哋，但結局又改邪歸正咁。一係就校園校服，加上初戀，田徑同合唱團，最後發現成長嘅真諦咁。以上嘅類型都有分好睇唔好睇嘅作品，不過近年又有啲變化，幾年前日本樂團Mr Children的MV《歌ってみた》及台灣某銀行廣告《夢騎士》引起話題：老友記更可以比年輕人更青春熱血。又有《風雲耆英會》同埋《醉爆伴郎團》，雖然格式唔同，不過又真係有青春嘅活力同熱情。
所以電影世界嘅事唔存在法律，就算有法，都係觀眾都有權釋法嗰一種，冇咁多權威一錘定音嘅。
如果講師生戀，相信對部分人嚟講都有唔多道德嘅聯想，偏偏呢啲題材就有好多創作人鍾意涉獵，如果係講女教師嘅我比較深印象嘅係《鋼琴別戀》同Notes On A Scandal。同埋譚惠貞導演最近嘅作品《以青春的名義》。
導演話佢唔係拍一部社會題材嘅電影。我同意，因為可能係中學女生同男教師會合乎現實多少少。導演自言：「只要感情係真誠嘅，唔存在傷害，就唔存在爭議。正如法國總統所言：『可能我哋唔係正常嘅一樣，但愛情永遠只係兩個人嘅事。』」
因為拍攝同美術都恰如其分，所以觀眾如我可以抽離些少，唔係好現實去睇入面個世界，甚至個世界唔喺香港發生嘅錯覺。咁我就可以純粹當一個愛情故事去睇。
吳肇軒飾演嘅中學生因為母親好早就拋夫棄子，有些少戀母情結；代課老師劉嘉玲知道丈夫出面有第二個女人，各自背後孭住嘅傷口，就成為男女關係嘅最佳藥引，二人相遇嘅泳池，就成為心理實驗嘅嗰條吊橋。呢種相濡以沫，你可以認為係愛情嘅假象，不為世人所容，但試問，為世人所容嘅戀愛，又有幾多係真象呢？所以入面最懂得愛情嘅可能係董瑋飾演嘅父親，唔知真瘋還是假喪，就係一心一意等妻子返嚟。呃自己呃到忘記咗自己呃緊自己，只係為愛同等待而苟活下去。
不過呢套戲拍得男人特別好睇。俾好多人話戲入面似梁朝偉嘅吳肇軒、近年好少出現大銀幕嘅謝君豪，同埋放低拳腳、純以演技折服你嘅董瑋，都各有神采。
近年香港影壇嘅流行現象係：青春嘅人唔睇青春片，香港人唔睇香港電影。縛住手扣腳扣去跳一場未必精采但要無悔嘅舞蹈，就係呢兩年純港產片嘅寫照。「以青春的名義」，希望大家會重新入戲院支持2018年上映嘅香港電影。
#以青春的名義 #譚惠貞 #劉嘉玲 #吳肇軒 #董瑋 #謝君豪 #青春片 #香港電影 #信報 #陳心遙
