其實WFH嘅原意就係想啲人少啲出街，少啲聚會，少啲接觸人，減少感染嘅可能性（唔係俾MT去行山🤣）。偏偏啲客就係因為WFH得閒冇嘢做就過黎睇醫生。
真係普通過普通嘅鼻敏感佢會入嚟攞藥。好心提佢診所其實好污糟，你見我地個個都着到去打仗咁。我哋不知幾唔想喺度，你就偏偏自己龔入嚟。普通收鼻水藥真係周街都買到。你鍾意嘅咪攞張單去Claim返保險囉。我哋要/會睇大陸客，一出一入你吸到佢噴出嚟嘅廢氣咁就中招就唔好啦。
啲客竟然冇諗過呢個問題。有啲蠢但係仲受教嘅就會恍然大悟。有啲死蠢嘅仲同你講覺得診所乾淨過出街就真係冇辦法。你去藥房買藥，你哋排埋隊幾分鐘就搞掂。你黎我呢度又要登記又要等睇醫生又要等攞藥。你估中間你吸廢氣可能性有幾高呢？仲要隨時唔知邊個講咗大話原來最尾佢中招，呢間野突然之間要關門大吉兩個禮拜跟住你發覺中間你嚟過，你仲唔嚇死？值得咩？
除咗無聊嘅鼻敏感，仲有便秘左N年今日鍾意過嚟睇醫生，俾紙介親但係冇流血冇發炎嘅手指（頂，我真係就咁比一塊酒精棉同膠布佢就算，佢仲想洗傷口！），隻眼有少少乾想攞人造淚水，背脊痛左半年*呢排好得閒*想做物理治療攞轉介信，*呢排好得閒*想去搵皮膚科電走面上嘅疣等等…… （我同佢地講其實物理治療/皮膚科診所都可以有大陸人睇病佢地當然係諗都冇諗過～）
當然我寧願睇呢啲都唔睇疑似個案或PK賤人。例如2個禮拜來睇左幾次醫生嘅肥佬，每次入到黎都係咳！次次叫佢自備口罩，次次都唔帶。仲聲大夾惡話：「我有口罩就唔使去診所攞啦！」依家全城缺口罩！我哋迫於無奈唔想你野我哋同其他病人，先心不甘情不願俾個口罩你！你有禮貌啲都話呀！咳咗咁耐都未好返叫佢照肺片又唔肯，我地好鬼驚會瀨嘢啊😭😭😭😭
#診所唔係自己開就可以咁任性咁講
#繼續打開門做生意但係最好你唔好黎
#大家醒少少減低社區爆發得唔得
#邊個再同我講呢排好得閒我同你死過
***
1、2: 自製精油：用酒精搓手液搞到隻手龜裂啦！
3: 真正嘅小情人們🤩🥰
