哥哥為咗救妹妹而走去上精神領袖課程，本身其實冇刻意舖排，起因只係我個EX讀完一個階段後有「畢業禮」，傳銷洗腦集團會叫學員廣邀親朋好友出席，表面上好似大學畢業戴四方帽咁嘅排場，實則都係想學員藉此sell埋身邊嘅人上堂，總之佢哋唔會計錯數，每個部署都係有目的。
我個EX當時叫咗佢兩老出席「畢業禮」，本來冇邀請哥哥，後者只係唔放心而死跟埋去，佢話當時見個妹同其他學員相擁痛哭，全場都刻意營造感動氣氛，運動員喺奧運攞金牌都冇咁誇張，不過兩老見到個女好似「學有所成」，都不其然一齊眼濕濕，其實佢哋根本唔知咩係精神領袖課程，情緒牽動只因為愛錫仔女。
哥哥知道兩老一定支持個妹，勸又搞到家嘈屋閉，所以寧願一齊上堂，有咩都可以第一時間救駕，只係上咗大約四堂之後，已經見到有位學員話屋企有事而「走堂」，導師仲發起群眾力量去畀壓力呢位學員，叫大家一齊用電話同Whatsapp轟炸，結果對方要講到報警先嚇走班牛鬼蛇神。
就住呢件事，哥哥成功說服到兩老唔好再上堂，但個妹就始終救唔到，不過兩老愛女心切，即使冇被洗腦，依然不斷畀錢我個EX進行各種投資，前前後後已經超過30萬。
後來嘅幾年，EX都活躍喺呢個傳銷圈子，fb一時賣還原水、一時sell指紋性格分析、一時又靈氣轉運套餐、一時就推介唔知咩牌子嘅超級無敵洗頭水，數之不盡嘅奇怪商品同服務，當然唔少得帶團睇骨灰龕場，成班學員仲創立咗唔知乜春嘢商會，個個西裝骨骨咁食飯影相，營造出一種成功商人嘅感覺。
我哋之間有啲互相認識嘅朋友，間唔中會有人同我講:「你個EX好似撈得好掂喎！」其實風光背後，EX仲有啲電話費單同銀行信件寄去我屋企，提咗佢好多次要改郵寄地址又唔聽，唯有丟埋一邊，但有幾個月keep住收到啲大大隻字「最後通知」同埋追數公司嘅信，呢幾封焗住要開嚟睇，跟住先發覺電話費又幾個月冇交，卡數又積咗十幾萬，仲有申請貸款唔批嘅通知。
曾經以為會結伴走到最後嘅人，如今變得非常陌生，本來以為大家已經各不相干，從此唔會再見面，但係一年前我哋又再聚頭，因為哥哥通知我出席伯母嘅喪禮，我見到EX喺靈堂上不斷啜泣，其實佢心底裡係好錫媽媽，做傳銷sell埋兄弟姐妹同父母，只能怪當時被完全洗腦，佢以為可以幫到人，唔知道其實係身邊嘅人幫緊佢。
我記得EX曾經同我講過，結咗婚要同媽媽住，呢個係佢細細個許下嘅諾言，點知最後無法圓夢，呢幾年更因為做傳銷嘅關係，冇畀家用之餘，仲頻頻要兩老喺經濟上支持同援助，所以屋企嘅生活差咗好多，又係一個人做傳銷累及全家嘅例子。
至親離世，EX開始有所改變，哥哥話佢搵咗份正經嘅full time工作，儘管債務問題依然令到生活捉襟見肘，但至少停止更多借貸，唔再每個月用不同藉口向家人同朋友攞錢，起碼見到少少曙光，雖然人生最大嘅遺憾係苦日子過完之後，最希望一齊過好日子嘅人已經唔喺身邊，但相信佢媽媽在天之靈都應該感到安慰，唔使喺天國繼續擔心個女。
做傳銷身光頸靚只係假象，朋友敬而遠之，屋企人日夜操心，仲有一屁股嘅債務，都係表面睇唔到嘅傷痕，希望更多身陷傳銷泥沼嘅人可以睇到呢個真實故事，盡快重回正軌，唔好再令自己嘅生活一塌糊塗。
如果可以的話，請廣傳，幫到一個得一個。
《前度 希望你過得好 1》
https://www.facebook.com/officedaily/posts/580261339087358
《前度 希望你過得好 2》
https://www.facebook.com/officedaily/posts/581498205630338
《前度 希望你過得好 3》
https://www.facebook.com/officedaily/posts/585969298516562
還原水傳銷 在 直銷傳銷背後真相- <Enagic 還原水機直銷騙局> 長期飲用電解水 的美食出口停車場
直銷傳銷背後真相. 2018年11月18日. <Enagic 還原水機直銷騙局> 長期飲用電解水、離子水並不可改善體質: 研究學者們都反對大量飲用電解水、離子水等，並指出改善 ... ... <看更多>